PHILEMON 1 - Edisana ñwed Abasi Ibom

Paul Anam Ŋkpe-Ubɔk ke Ibuot Onesimus

¹ PAUL, emi edide owo-ŋkpɔkɔbi Christ Jesus, ye eyen-ete nnyin Timothy, ewet enɔ esɔk Philemon, edima ufan ye nsaŋa-utom nnyin,

² ye Apphia eyen-ete nnyin aŋwan, ye Archippus nsaŋa nnyin ke ekɔŋ, ye ufɔk Abasi emi odude ke ebiet fo;

³ mfɔn ye emem akpakam oto ke ubɔk Abasi Ete nnyin ye Ɔbɔŋ Jesus Christ etiene mbufo.

⁴ Mmɔkɔm Abasi mi kpukpru ini eke nsiakde fi enyiŋ ke akam mi,

⁵ koro ŋkopde mbaŋa ima fo, ye mbuɔtidem emi afo enyenede ye Ɔbɔŋ Jesus, ye kpukpru ikɔt Esie;

⁶ Nnyuŋ mbeŋe nte mfɔn-ido emi otode ke mbuɔtidem fo edikabare enyene ukeme ke ŋkpɔ Christ, ke eritim mfiɔk kpukpru nti ŋkpɔ emi edude nnyin ke idem.

⁷ Ima fo ama anam mi nnyene akwa idaresit ye ndɔŋesit, koro afo akanamde ikɔt Abasi ekop inemesit, eyen-ete mi.

⁸ Mmɔdo okposuk edi nte nnyenede ɔyɔhɔ uko ke Christ ndidɔhɔ fi anam se idotde,

⁹ edi ke ntak ima mmakam ŋkabare ŋkpe ye afo, sia ntiede nte Paul, akani owo, nnyuŋ ndide owo-ŋkpɔkɔbi Christ Jesus ke emi;

¹⁰ mmekpe fi ubɔk mbaŋa eyen mi, emi mma mbon ke ŋkpɔkɔbi mi, kpa Onesimus, emi mikɔfɔnke ye afo ke ini oko;

¹¹ edi ke emi enye ɔfɔn ye afo, onyuŋ ɔfɔn ye ami ŋko.

¹² Mmɔdɔŋ enye afiak etiene fi, kpa enye, oro edi esit mi.

¹³ Ŋkpama ndida enye nnim ete odu ye ami, man enye etie ke ibuot fo anam ŋkpɔ ɔnɔ mi ke itie ŋkpɔkɔbi mi kabaŋa gospel;

¹⁴ edi adaŋa nte mmemfiɔkke ekikere fo, nnyinmeke ndinam baba ŋkpɔ kiet, kpaŋ mfɔnido fo okutie nte ŋkpɔ nnanenyin, edi oto ke erinyime fo.

¹⁵ Koro ndusuk ekedianare enye ye afo ke ekpri ini, man afo ekpenyene enye ke nsinsi;

¹⁶ idige aba nte ofin, edi nte se ikande oro, nte edima eyen-ete: mmama enye eti-eti; adaŋa didie ke afo edima enye akan, ke idem esie, ye eke Ɔbɔŋ.

¹⁷ Edieke afo abatde mi ndien ke nsaŋa, da enye nte akpadade idem mi.

¹⁸ Edieke enye ekeduede fi ke usuŋ ekededi, onyuŋ akamade fi isɔŋ, bat oro nɔ mi; ami Paul nda ubɔk mi ŋwet nte, Nyesio nnɔ fi.

¹⁹ Ŋkɔm afo akama mi isɔn ebe oro, kpa idem fo.

²⁰ Ntem, eyen-ete mi, nam mi nnyene idaresit ke ubɔk fo: nam mi ŋkop inemesit ke Christ.

²¹ Sia mburede mfiɔk nte afo eyenam nte uyo mi edide, ŋwet nnɔ fi; koro mmɔfiɔk nte afo eyenam ebe se ndɔhɔde.

²² Edi nim itie eke ndaŋde ebeŋe mi, koro ndoride enyin nte eyeyak mi mfiak ntiene mbufo oto ke akam mbufo.

²³ Epaphras nsaŋa-ŋkpɔkɔbi mi ke Christ Jesus ete, ekɔm fi.

²⁴ Mark, ye Aristarchus, ye Demas, ye Luke, mme nsaŋa-utom mi, enyuŋ enɔ ekɔm ŋko.

²⁵ Mfɔn Ɔbɔŋ nnyin Jesus Christ akpakam odu ye spirit mbufo.