OBADIAH 1 - Edisana ñwed Abasi Ibom

Abasi Ɔŋwɔŋɔ Ndisuhɔre Edom ke Ntak Ntaŋidem Mmɔ

¹ NKUKUT OBADIAH. Ntem ke Ɔbɔŋ Jehovah ɔdɔhɔ abaŋa Edom; ete, Nnyin imekop etop emi otode Jehovah; emenyuŋ edɔŋ mme isuŋ utom ke otu mme idut, ete, Mbufo edaha ke enyɔŋ, nnyin idaha ke enyɔŋ ika ekɔŋ ye enye.

² Sese, mmanam fi akabare ekpri ke otu mme idut: emesin fi ke ndek eti-eti.

³ Iseri esit fo ememenere fi ke enyɔŋ; afo oduŋ ke ndudu ikpɔ itiat: ebiet iduŋ esie omokoŋ; enye ɔdɔhɔ ke esit esie, ete, Anie edisuhɔre mi onim ke isɔŋ?

⁴ Jehovah ɔdɔhɔ, ete Afo ama onim efɔk fo edikoŋ nte ntrukpom, onyuŋ onim enye ke otu ntantafiɔŋ, nyesio fi do nsuhɔre nnim.

⁵ Inɔ ema ekpedi ke ebiet fo, ye mbon-ŋwo ke okon-eyo, (afo abiara didie!) nte mmɔ ikpeyipke se ikemde? Mme etet-mfri vine ema ekpedi ke ebiet fo, nte mmɔ ikpesuhɔke baba ŋkeŋe-ŋkeŋe?

⁶ Enam didie eyep Esau? eduŋɔre ndibe-ndibe ebiet esie?

⁷ Kpukpru mmɔ emi ediomide ediomi ye afo esin fi ke adaŋa: mmɔ emi etiede ufan-ufan ye afo ebiaŋa fi enyuŋ ekan fi: mmɔ emi etade uyo fo ekɔk afia esin ke idak ukot fo: eti ibuot iduhe enye ke idem.

⁸ Jehovah ɔdɔhɔ ete, Nte ndisoboke mme ɔfiɔkŋkpɔ owo mfep ke Edom, ye eti-ibuot ke obot Esau ke usen oro?

⁹ Ndien idem eyekpa mbon-uko fo, O Teman, man esibe owo ke obot Esau efep ke afai.

¹⁰ Afai oro afo akanamde ye Jacob eyen-usɔ eyesin but ofuk fi, eyenyuŋ esibe fi efep ke nsinsi.

¹¹ Ke usen oro afo akadade ke edem usua, ke usen emi isen owo eketaŋde mbon-ekɔŋ esie efep, emi isen owo enyuŋ edukde ke inua-otop esie, enyuŋ esinde afia ebaŋa Jerusalem, afo ŋko eketie nte owo mmɔ kiet.

¹² Edi ukpesehe ke usen eyen-usɔ, ke usen oro enye akabarede edi esen owo; ukponyuŋ udatke esit ubaŋa nditɔ Judah, ke usen oro ekesobode mmɔ; ukponyuŋ ubureke mbure ke usen nnan-enyin.

¹³ Ukpodukke ke inua-otop ikɔt mi ke usen nsobo mmɔ; afo ŋko ukponyuŋ usehe idiɔk itie mmɔ ke usen nsobo mmɔ, ukponyuŋ udorike ubɔk ke inyene mmɔ ke usen nsobo mmɔ;

¹⁴ ukponyuŋ udaha ke ŋwaŋa-usuŋ usibe mmɔ eke edide esie eke ebɔhɔde ufep; ukponyuŋ umenke mmɔ eke edide esie eke esukde, uyak unɔ, ke usen nnanenyin mmɔ.

¹⁵ Koro usen emi Jehovah edinamde ikɔ ye kpukpru mme idut emekpere: kpa nte afo akanamde, kpa ntre ke edinam ye afo: utip fo eyefiak ɔtɔ fi ke ibuot.

¹⁶ Koro kpa nte emi mbufo ekeŋwɔŋde ke enyɔŋ edisana obot mi, kpukpru mme idut eye-ŋwɔŋ kpukpru ini, mmɔ eyenyuŋ eŋwɔŋ, enyuŋ emen esin ke idibi, ndien eyetie nte se mikoduhe.

¹⁷ Edi ubɔhɔ eyedu ke obot Zion, enye eyenyuŋ edi edisana; ufɔk Jacob eyenyuŋ eda udeme mmɔ.

¹⁸ Ndien ufɔk Jacob eyedi ikaŋ, ufɔk Joseph eyenyuŋ edi edeme-ikaŋ, ufɔk Esau eyenyuŋ edi mbio, ndien mmɔ eyesak ke esit, enyuŋ eta mmɔ; ndien baba ŋkpɔ kiet idisuhɔke inɔ ufɔk Esau; koro Jehovah ɔdɔhɔ.

¹⁹ Ndien mbon edem usuk eyeda obot Esau; mbon una-isɔŋ edem-inyaŋ eyenyuŋ eda mme Philistine: mmɔ eyenyuŋ eda obot-iŋwaŋ Ephraim, ye obot-iŋwaŋ Samaria: ndien Benjamin eyeda Gilead.

²⁰ Ndien akwa otu nditɔ Israel emi eketaŋde efep, emi edude ke otu mme Canaanite, tutu osim ke Zarephath, ye mbio-obio Jerusalem emi eketaŋde efep, emi edude ke Sepharad, eyeda mme obio edem usuk.

²¹ Ndien mbon eke enyaŋade eyedɔk ke obot Zion, edikpe ikpe obot Esau, ndien Jehovah eyeda ubɔŋ.