NUMBERS 9 - Edisana ñwed Abasi Ibom

Passover Emi Nditɔ Israel Ekenamde ke Obot Sinai

¹ NDIEN Jehovah ɔdɔhɔ ye Moses ke wilderness a Sinai, ke akpa ɔfiɔŋ ke udiana-akpa isua nte mmɔ ekewɔŋɔ ke Egypt, ete,

² Yak nditɔ Israel enam passover ŋko ke ekem ini esie.

³ Ke ɔyɔhɔ usen ɔfiɔŋ emi duopenaŋ, ke mbubreyo, ke mbufo edinim enye ke ekemini esie nte kpukpru ido esie, ye kpukpru mme ewuhɔ esie esaŋade, ke mbufo edinim enye.

⁴ Ndien Moses ɔdɔhɔ nditɔ Israel, ete enim passover.

⁵ Ndien mmɔ enim passover ke akpa ɔfiɔŋ, ke ɔyɔhɔ usen ɔfiɔŋ oro duopenaŋ, ke mbubreyo, ke wilderness a Sinai: nditɔ Israel enam kpukpru se Jehovah eketemede Moses.

⁶ Ndien enyene ndusuk owo emi okpo owo asabarede mmɔ, ndien ikwe nte enimde passover ke usen oro: ndien mmɔ eto edi ke iso Moses ye ke iso Aaron ke usen oro:

⁷ Ndien mbon oro edɔhɔ enye, ete, Okpo owo amasabare nnyin: nsinam ekpande nnyin ete ikuda enɔ isɔk Jehovah ke ekem ini esie, ke otu nditɔ Israel?

⁸ Ndien Moses ɔdɔhɔ ete, Mbufo ebet, man ŋkop se Jehovah editemede mi abaŋa mbufo.

⁹ Ekem Jehovah ɔdɔhɔ Moses, ete, Dɔhɔ nditɔ Israel, ete

¹⁰ Edieke okpo edisabarede owo ekededi ke otu mbufo, ye ke otu emana mbufo, mme owo edikade anyan usuŋ, enye okutre ndinim passover nnɔ Jehovah.

¹¹ Yak enim enye ke udiana-akpa ɔfiɔŋ, ke ɔyɔhɔ usen duopenaŋ, ke mbubreyo, yak mmɔ eta enye ye uyo eke leaven miduhe, ye ndot-ndot ikɔŋ.

¹² Ekusuhɔ udaŋ, ekunyuŋ ebom ɔkpɔ esie baba kiet: yak mmɔ enim enye nte kpukpru mme ewuhɔ passover esaŋade.

¹³ Edi ama edi owo eke asanade, minyuŋ ikaha idut, ndien etre ndinim passover, yak mmɔ esibe ukpɔŋ oro ke mbio-obio mmɔ efep: owo oro enyene ndibiom idiɔk ido esie, koro enye mikadaha enɔ Jehovah idi ke ekem ini esie.

¹⁴ Ndien edieke esen owo ediduŋde ke otu mbufo, onyuŋ oyom ndinim passover nnɔ Jehovah: yak enye anam nte mme ewuhɔ passover, ye ido esie esaŋade: yak esen owo ye amana ke isɔŋ enim ubɔk ido kiet.

¹⁵ Ndien ekem ke usen emi ekewukde ebiet-iduŋ, obubit enyɔŋ edifuk ebiet-iduŋ, kpa efe ntiense: ndien, ke mbubreyo, ebiet ikaŋ ke enyɔŋ ebiet-iduŋ, tutu eyo esiere.

¹⁶ Osuk edi ntre kpukpru ini: obubit enyɔŋ ofuk enye (ke uwemeyo), onyuŋ ebiet ikaŋ ke okoneyo.

¹⁷ Ndien adaŋemi obubit enyɔŋ adahade ke efe, nditɔ Israel ewuhɔre: ndien ke ɔtɔ eke obubit enyɔŋ adade, do ke nditɔ Israel ewuk tent.

¹⁸ Nditɔ Israel ewuhɔre ke uyo Jehovah, enyuŋ ewuk ŋko ke uyo Jehovah: kpukpru usen eke obubit enyɔŋ odorode ke ebiet iduŋ ke mmɔ etie ke tent mmɔ;

¹⁹ Ndien adaŋemi obubit enyɔŋ ebigide usen ediwak ke ebiet-iduŋ, nditɔ Israel ekpeme ewuhɔ Jehovah, inyuŋ iwuhɔkede tent.

²⁰ Ndien ntre ke ini obubit enyɔŋ etiede ke enyɔŋ ebiet-iduŋ usuk usen, mmɔ etie ke mme tent ke uyo Jehovah, ndien mmɔ enyuŋ ewuhɔre ke uyo Jehovah.

²¹ Ndien ntre ke ini obubit enyɔŋ ebigide ke mbubreyo tutu eyo esiere, ndien obubit enyɔŋ edidaha ke usenubɔk, mmɔ ewuhɔre: edide ke uwemeyo, onyuŋ edide ke okoneyo ke obubit enyɔŋ adaha, mmɔ ewuhɔre.

²² Ekpedi usen iba, ekpedi ɔfiɔŋ kiet, ekpedi isua, ke obubit enyɔŋ ebigi ke ebiet-iduŋ, onyuŋ odoro ke enyɔŋ, nditɔ Israel etie, inyuŋ iwuhɔkede; edi ke enye ama adaha, mmɔ ewuhɔre.

²³ Ke uyo Jehovah ke mmɔ etie ke nna, ke uyo Jehovah ke mmɔ enyuŋ edaŋa; mmɔ ekpeme ewuhɔ Jehovah, ke uyo Jehovah, ke ubɔk Moses.