NUMBERS 36 - Edisana ñwed Abasi Ibom

Mme Ewuhɔ Emi Abaŋade Iban Emi Enɔde Udeme

¹ NDIEN mme etubom mme ete mme ubon nditɔ Gilead, eyen Machir, eyen Manasseh, emi etode ke mme ubon nditɔ Joseph, esaŋa ekpere, ekedɔhɔ ikɔ ke iso Moses, ye ke iso mbɔŋ, kpa mme etubom mme ete nditɔ Israel:

² ndien mmɔ edɔhɔ ete, Jehovah okowuk ɔbɔŋ mi, ete ada afia edeme isɔŋ emi ɔnɔ nditɔ Israel enyene: Jehovah okonyuŋ owuk ɔbɔŋ mi, ete enye ada udeme Zelophehad eyen-ete nnyin ɔnɔ nditɔ esie iban.

³ Ndien edieke edikade ekedɔ owo ke otu nditɔ mme esien nditɔ Israel efen, mmɔ eyedianarede udeme mmɔ ke udeme mme ete nnyin efep, eda edian ke udeme esien eke edinyenede mmɔ: ndien eyedianare enye efep ke udeme eke ɔwɔrɔde ke afia ɔnɔ nnyin.

⁴ Ndien adaŋa jubilee nditɔ Israel edidide, udeme mmɔ eyediana ke udeme esien eke edinyenede mmɔ ntre ke edidianare udeme mmɔ ke udeme esien mme ete nnyin efep.

⁵ Ndien Moses ada uyo Jehovah eteme nditɔ Israel, ete, Ke ekem ntre ke uyo esien nditɔ Joseph.

⁶ Ŋkpɔ emi ke Jehovah owuk nditɔ iban Zelophehad, ete, Yak mmɔ edɔ owo nte mmɔ emade: edi suk ke otu ubon esien ete mmɔ ikpɔŋ-ikpɔŋ ke mmɔ enyene ndidɔ ndɔ.

⁷ Ndien udeme nditɔ Israel okuto ke esien kiet oduk ke eken: edi nditɔ Israel kiet kiet eyire ke udeme esien mme ete mmɔ.

⁸ Ndien kpukpru nditɔ-iban eke edidiade udeme ke otu mme esien nditɔ Israel enyene ndidɔ owo ke otu oruk esien ete mmɔ, kpaŋ kpukpru owo nditɔ Israel kiet kiet ekpedia udeme mme ete mmɔ.

⁹ Ndien udeme okuto ke esien kiet ebe ke esien efen; edi kpukpru mme esien nditɔ Israel kiet kiet esuk eyire ke udeme mmɔ.

¹⁰ Kpa nte Jehovah eketemede Moses, kpa ntre ke nditɔ-iban Zelophehad enam:

¹¹ koro Mahlah, ye Tirzah ye Hoglar, ye Milcah, ye Noah, nditɔ Zelophehad iban, edɔ nditɔ eyen-ete ete mmɔ:

¹² mmɔ edɔ owo ke otu ubon nditɔ Manasseh eyen Joseph, ndien udeme mmɔ atak ke esien ubon ete mmɔ.

¹³ Mme mmɔ emi edi mme ewuhɔ ye mme item emi Jehovah akadade ubɔk Moses eteme nditɔ Israel, ke una-isɔŋ Moab, ke mben Jordan Jericho.