NUMBERS 34 - Edisana ñwed Abasi Ibom

Mme Adaŋa ke Isɔŋ Nditɔ Israel

¹ NDIEN Jehovah ɔdɔhɔ Moses, ete, Teme nditɔ Israel, nyuŋ dɔhɔ mmɔ, ete,

² Ke adaŋemi mbufo edukde ke isɔŋ Canaan, emi edi isɔŋ emi ediwɔrɔde edi udeme mbufo, kpa isɔŋ Canaan ke ofuri adaŋa esie.

³ Ndien edem mbufo ke usuk-usuk eyetɔŋɔ ke wilderness Zin adiana ke mben Edom, ndien adaŋa mbufo edem usuk eyetɔŋɔ ke utit Inyan Inuŋ ke edem usiaha-utin:

⁴ Ndien adaŋa mbufo eyewɔrɔ aka ke edem usuk usuk obot Akrabbim, onyuŋ ebe osim Zin: ndien ɔkɔwɔrɔ ke edem usuk-usuk Kadesh-barnea, onyuŋ ebe aka Harzar-addar, onyuŋ ebe osim Azmon:

⁵ ndien adaŋa ɔkpɔŋ Azmon, ɔwɔŋɔre aka ke akpa Egypt, ndien ɔkɔwɔrɔ ke inyaŋ.

⁶ Ndien ama edi adaŋa ke edem usop-utin, akamba inyaŋ edidi adaŋa mbufo: emi edidi adaŋa mbufo ke edem usop-utin.

⁷ Ndien emi edidi adaŋa mbufo ke edem edere: mbufo etɔŋɔ ke akamba inyaŋ enim obot Hor (ke adaŋa) mbufo:

⁸ etɔŋɔ ke obot Hor esiak adaŋa tutu osim ke ebiet emi edukde Hamath: ndien adaŋa mbufo eyeda ɔkɔwɔrɔ ke zedad:

⁹ ndien adaŋa eyebe osim Ziphron, eyenyuŋ oto osim ke Hazar-enam: emi edidi adaŋa mbufo ke edem edere.

¹⁰ Ndien mbufo enim adaŋa mbufo ke edem usiaha-utin, ɔtɔŋɔde ke Hazar-enam tutu osim ke Shepham:

¹¹ ndien adaŋa oro eyekpɔŋ Shepham ɔsuhɔre ke Riblah, ke edem usiaha-utin Ain; ndien adaŋa eyesuhɔre akatuak mben mmɔŋ Chinnereth ke edem usiaha-utin:

¹² ndien adaŋa eyesaŋa ke Jordan ɔsuhɔre, ndien ɔwɔrɔ osim ke Inyaŋ Inuŋ. Emi edi isɔŋ mbufo, ye mme adaŋa esie emi akande ekuk.

¹³ Ndien Moses eteme nditɔ Israel, ete, Emi edi isɔŋ emi mbufo edidade afia edeme, emi Jehovah eketemede ete eda enye enɔ mme esien usukkiet ye ubak esien eken:

¹⁴ koro esien nditɔ Reuben ke ufɔk mme ete mmɔ, ye esien nditɔ Gad ke ufɔk mme ete mmɔ ema ebɔ; ubak esien Manasseh ama onyuŋ ɔbɔ udeme mmɔ:

¹⁵ mme esien iba ye ubak esien ema ebɔ udeme mmɔ ke edem Jordan Jericho oko, ese edem usiaha-utin.

¹⁶ Ekem Jehovah ɔdɔhɔ Moses, ete,

¹⁷ Emi edi enyiŋ mme mmɔ emi enyenede ndideme isɔŋ Joshua eyen Nun.

¹⁸ Mbufo enyuŋ esio ɔbɔŋ kiet kiet ke kpukpru esien, ete edeme isɔŋ.

¹⁹ Ndien emi edi enyiŋ mmɔ oro: eke esien Judah, Caleb eyen Jephunneh.

²⁰ Ye eke esien nditɔ Simeon, Shemuel eyen Ammihud.

²¹ Eke esien Benjamin, Elidad eyen Chislon.

²² Ye ɔbɔŋ esien nditɔ Dan, Bukki, eyen Jogli.

²³ Ɔbɔŋ nditɔ Joseph, ke eke esien nditɔ Manasseh, Hanniel eyen Ephod.

²⁴ Ye ɔbɔŋ esien nditɔ Ephraim, kemuel eyen Shiphtan.

²⁵ Ye ɔbɔŋ esien nditɔ Zebulon, Elizaphan eyen Parnach.

²⁶ Ye ɔbɔŋ esien nditɔ Issachar, Paltiel eyen Azzan.

²⁷ Ye ɔbɔŋ esien nditɔ Asher, Ahihud eyen Shelomi.

²⁸ Ye ɔbɔŋ esien nditɔ Naphtali, Pedahel eyen Ammihud.

²⁹ Mme mmɔ emi ke Jehovah omowuk ete enɔ nditɔ Israel udeme ke isɔŋ Canaan.