NUMBERS 31 - Edisana ñwed Abasi Ibom

Nditɔ Israel Eŋwana Ekɔŋ ye Idut Midian

¹ NDIEN Jehovah ɔdɔhɔ Moses, ete,

² Sio usiene ye nditɔ Midian nɔ nditɔ Israel: ndien afo eyebono ye oruk fo.

³ Ndien Moses ɔdɔhɔ kpukpru owo, ete, Yak ndusuk owo ke otu mbufo ebɔbɔ mbɔbɔ ekɔŋ, eka ekeŋwana ye Midian, esio usiene ye Midian enɔ Jehovah.

⁴ Mbufo esioŋo tɔsin owo kiet kiet ke kpukpru mme esien, ke ofuri mme esien Israel, edɔŋ mmɔ eka ekɔŋ.

⁵ Ndien mmɔ edianare tɔsin owo kiet ke esien, ke ofuri mme tɔsin Israel, tɔsin owo duopeba, emi ekebɔbɔde mbɔbɔ ekɔŋ.

⁶ Ekem Moses ada mmɔ kpa tɔsin owo ke kpukpru mme esien, ɔdɔŋ mmɔ eka ekɔŋ, mmɔ, ye Phinehas eyen Eleazar oku, ye mme edisana ŋkpɔ, kpa mme ukorowo eke enye akamade ke ubɔk aduat.

⁷ Ndien mmɔ eŋwana ekɔŋ ye Midian, kpa nte emi Jehovah okowukde Moses; enyuŋ ewot kpukpru iren owo.

⁸ Mmɔ enyuŋ ewot mbɔŋ Midian, ekɔrɔ ye mmɔ (efen) emi mmɔ ekewotde; Evi, ye Rekem, ye Zur, ye Hur, ye Reba, mbɔŋ Midian ition: mmɔ enyuŋ ewot Balaam eyen Beor ke ofut.

⁹ Ndien nditɔ Israel etaŋ iban Midian, ye nditɔwɔŋ mmɔ, eda enyɔŋɔ, enyuŋ ebume kpukpru enaŋ mmɔ, ye kpukpru ŋkpri ufene mmɔ, ye kpukpru inyene mmɔ.

¹⁰ Mmɔ enyuŋ ekim ikaŋ ke kpukpru obio mmɔ, ke ebiet emi mmɔ eduŋde, ye ke kpukpru nna tent mmɔ.

¹¹ Ndien mmɔ eda kpukpru ŋkpɔ mbume, ye kpukpru se mmɔ ekemumde, owo ye ufene.

¹² Enyuŋ emen kpukpru mbuot ekɔŋ, ye se mmɔ ekemumde, ye ŋkpɔ mbume mmɔ, edisɔk Moses, ye Eleazar oku, ye mbon esop nditɔ Israel, ke ebiet nna, ke una isɔŋ Moab, emi odude ke mben Jordan Jericho.

¹³ Ndien Moses, ye Eleazar oku, ye kpukpru ikpɔ owo esop, ewɔŋɔ eka ndisobo ye mmɔ ke edem nna.

¹⁴ Ndien Moses ɔtɔhɔ ye mme andidaha mbon ekɔŋ, mme etubom mme tɔsin, ye mme etubom mme ikie, emi eketode ke itie ekɔŋ.

¹⁵ Ndien Moses obup mmɔ, ete, Emi mbufo emenim kpukpru iban emi uwem?

¹⁶ Sese, edi mme mmɔ emi ekesin nditɔ Israel edue Jehovah ke ikɔ Peor, ke uyo Balaam, ndien idiɔk udɔŋɔ oro otibe ke otu mbio esop Jehovah.

¹⁷ Mbufo ewot, ndien kpukpru iren owo ke otu nditɔwɔŋ, enyuŋ ewot kpukpru iban emi efiɔkde owo, ke eridaŋ ye eren-owo.

¹⁸ Edi ama edi kpukpru nditɔwɔŋ ke otu iban, emi mikefiɔkke owo ke eridaŋ ye eren-owo, mbufo enim mmɔ uwem enɔ idem mbufo.

¹⁹ Ndien mbufo edaŋ ke edem nna ke ofuri usen itiaba: kpukpru mbufo emi ekewotde owo, ye emi eketukde okpo owo, enam idem mbufo ye mbuot ekɔŋ mbufo esana ke ɔyɔhɔ usen ita, ye ke ɔyɔhɔ usen itiaba.

²⁰ Enyuŋ esio ndek efep ke kpukpru ɔfɔŋ-idem, ye kpukpru ŋkpɔ ikpa, ye kpukpru se enamde ke idet ebot, ye ke kpukpru ŋkpɔ eto.

²¹ Ndien Eleazar oku ɔdɔhɔ ye kpukpru mbon ekɔŋ emi ekekade ekɔŋ, ete, Emi edi ibet ewuhɔ emi Jehovah okowukde Moses;

²² suk gold, ye silver, ye okpoho, ye ukwak, ye tin, ye ŋket,

²³ kpukpru ŋkpɔ eke ekemede ndiduk ke ikaŋ, ke mbufo edida esin ke ikaŋ, ndien enye eyedi edisana: edi mbufo ekutre ndida mmɔŋ udarade ndek nsio mmɔ ndek mfep: edi mbufo eda kpukpru ŋkpɔ eke mikemeke ndiduk ke ikaŋ, esin ke mmɔŋ.

²⁴ Mbufo enyuŋ eyet edisine ŋkpɔ mbufo ke ɔyɔhɔ usen itiaba, ndien mbufo eyesana, ndien eduk ke nna.

²⁵ Ekem Jehovah onyuŋ ɔdɔhɔ Moses, ete,

²⁶ Afo, ye Eleazar oku, ye mme etubom mme ete esop, ebat ibat mbume, ye mbuot ekɔŋ, ke owo, ye ke ufene:

²⁷ ndien bahare se emumde ke mbak iba ukem-ukem, nɔ mme mmɔ emi ekesinde ubɔk ke ekɔŋ, enyuŋ ewɔŋɔde eka ekɔŋ, nɔ kpukpru mbon esop ŋko:

²⁸ ndien bɔ mbon ekɔŋ emi ekewɔŋɔde eka ekɔŋ, utomo nɔ Jehovah: ukpɔŋ kiet ke itie ikie ition, ke owo, ye ke enaŋ, ye ke mme ass, ye ke ŋkpri ufene:

²⁹ mbufo esio enye ke udeme mmɔ, ndien da enye nɔ Eleazar oku, ke edimenere uwa Jehovah.

³⁰ Ndien ŋko, ama edi udeme nditɔ Israel, sio kiet ke itie aba ye duop, ke owo, ye ke enaŋ, ye ke mme ass ye ke ŋkpri ufene, ye ke kpukpru oruk unam, ndien da mmɔ nɔ mme Levite emi enyenede nditiŋ enyin ke ebiet-iduŋ Jehovah.

³¹ Ndien Moses ye Eleazar oku enam kpa nte Jehovah eketemede Moses.

³² Ndien se mmɔ ekemumde kpa nsuhɔ mbume emi mbon ekɔŋ ekebumede, edi tɔsin, tɔsin ŋkpri ufene ke itie ikie itiokiet, ye tɔsin ke itie ata ye efut;

³³ ye tɔsin enaŋ ata ye duopeba;

³⁴ ye tɔsin ass ata ye kiet,

³⁵ ndien kpukpru owo ke otu nditɔ-iban emi mikɔfiɔkke eren-owo, edi tɔsin edip ye duopeba.

³⁶ Ndien ubak emi edide udeme mme mmɔ emi ekewɔrɔde eka ekɔŋ, osim ibat ŋkpri ufene tɔsin ke itie ikie ita, ye tɔsin edip ye efureba, ye ikie ition:

³⁷ ndien utomo Jehovah ke ŋkpri ufene edi ikie itiokiet ye ata ye efut.

³⁸ Mme enaŋ enyuŋ esim tɔsin edip ye efurekiet: ndien ubak mmɔ eke edide utomo Jehovah edi ata ye duopeba.

³⁹ Mme ass enyuŋ edi tɔsin edip ye duop ye ikie ition; ndien ubak mmɔ eke edide utomo Jehovah edi ata ye kiet.

⁴⁰ Mme ukpɔŋ owo enyuŋ esim tɔsin efurekiet; ndien ubak mmɔ eke edide utomo Jehovah edi owo edip ye duopeba.

⁴¹ Ndien Moses ada utomo, kpa edimenere uwa Jehovah, ɔnɔ Eleazar oku, kpa nte Jehovah eketemede Moses.

⁴² Ndien ama edi udeme nditɔ Israel, emi Moses akebaherede ɔbɔ mmɔ emi ekekade ekɔŋ,

⁴³ (ndien udeme mbon esop osim tɔsin ŋkpri ufene ke itie ikie ita ye tɔsin edip ye efureba, ye ikie ition,

⁴⁴ ye tɔsin enaŋ edip ye efurekiet,

⁴⁵ ye tɔsin ass edip ye duop, ye ikie ition,

⁴⁶ ye tɔsin owo efurekiet);

⁴⁷ kpa ke udeme nditɔ Israel Moses osio kiet ke itie aba ye duop, ke owo, ye ke unam, ndien ada mmɔ ɔnɔ mme Levite emi etiŋde enyin ke ebiet-iduŋ Jehovah; kpa nte Jehovah eketemede Moses.

⁴⁸ Ekem mme ndidaha mme tɔsin mbon ekɔŋ, kpa mme etubom mme tɔsin, ye mme etubom mme ikie, eto edi ke ɔtɔ Moses:

⁴⁹ ndien mmɔ edɔhɔ Moses, ete, Nnyin ikɔt fo imebat mbon ekɔŋ emi edude nnyin ke ubɔk, ndien owo nnyin baba kiet ikatakke.

⁵⁰ Ndien kpukpru nnyin emi ikekutde mbana-ŋkpɔ gold, ŋkpɔ idibi ubɔk, ye ŋkpɔ itɔŋ ubɔk, ye mkpanuen, ye mkpanuen utɔŋ, ye ŋkwa gold, ida enɔ isɔk Jehovah, ndida nsio isop ukpɔŋ nnyin ke iso Jehovah.

⁵¹ Ndien Moses ye Eleazar oku ebɔ mmɔ gold oro, kpa kpukpru ŋkpɔ ubɔk-usɔ.

⁵² Ndien ofuri gold edimenere uwa emi mmɔ emenerede enɔ Jehovah, edi tɔsin shekel efurekiet, ye ikie itiaba ye aba ye duop, emi mme etubom mme tɔsin, ye mme etubom mme ikie enɔde.

⁵³ Kpukpru mbon ekɔŋ kiet kiet ema ekebume ŋkpɔ ke idem mmɔ.

⁵⁴ Ndien Moses ye Eleazar oku ebɔ gold oro ke ubɔk mme etubom mme tɔsin ye eke mme ikie, emen enye enim ke efe esop ke iso Jehovah, ke editi ŋkpɔ nditɔ Israel.