NUMBERS 30 - Edisana ñwed Abasi Ibom

Mme Ewuhɔ Emi Abaŋade Akaŋa

¹ EKEM Moses ɔdɔhɔ ikpɔ owo mme esien nditɔ Israel, ete, Emi edi se Jehovah etemede.

² Ke adaŋemi owo edikaŋade akaŋa ɔnɔ Jehovah, mme edinyuŋ ɔŋwɔŋɔde uŋwɔŋɔ ete ibet idem esie ibet; yak enye okubiat uyo esiemɔ, yak enye anam kpukpru se ikotode enye ke inua iwɔrɔ.

³ Ndien edieke ŋwan edikaŋade akaŋa ɔnɔ Jehovah, edinyuŋ ebetde idem esie ibet, ke ufɔk ete esie, ke ini uyen esie;

⁴ ndien ete esie onyuŋ okopde akaŋa esie oro, ye ibet emi enye ebetde idem esiemɔ, ete esie minyuŋ itiŋke ikɔ inɔ enye; ndien kpukpru akaŋa esie enyene ndisɔŋɔ nda, kpukpru ibet emi enye ebetde idem esie, eyenyuŋ esɔŋɔ eda.

⁵ Edi ete esie ama akpan enye ke usen emi enye okopde; baba akaŋa esie kiet, ye ibet emi enye ebetde idem esie, idisɔŋɔke ida: ndien Jehovah eyedahado ɔnɔ enye, koro ete esie akpande enye.

⁶ Ndien edieke enye edide ŋwan owo, ndien akaŋa akaŋa, mme ada inua esie etiŋ se enye adade ebet idem esie ibet;

⁷ ndien ebe esie edikop, ndien mitiŋke ikɔ inɔ enye, ke usen eke enye okopde: ndien mme akaŋa esie eyesɔŋɔ eda, mbet eke enye ebetde idem esie, eyenyuŋ esɔŋɔ eda.

⁸ Edi edieke ebe esie akpande enye, ke usen emi enye okopde; ntem ke enye abiat akaŋa esie emi enye akaŋade, ye ŋkpɔ oro okotode enye ke inua, emi enye adade ebet idem esie: ndien Jehovah eyedahado ɔnɔ enye.

⁹ Edi kpukpru akaŋa ebe-akpa, ye eke ŋwan eke esiode ndɔ, eke enye adade ebet idem esie, eyena enɔ enye.

¹⁰ Ndien edieke enye akaŋade ke ufɔk ebe esie, mme ekebetde idem esie ibet ke uŋwɔŋɔ;

¹¹ ndien ebe esie okop, ndien mitiŋke ikɔ ye enye, minyuŋ ikpanke enye: ndien kpukpru akaŋa esie, ye kpukpru mbet emi enye adade ebet idem esie, eyesɔŋɔ eda.

¹² Edi edieke ebe esie abiatde mmɔ, ke usen emi enye okopde; baba ikɔ kiet eke otode enye ke inua, ke akaŋa esie, ye ke ibet ukpɔŋ esie, ididaha: ebe esie ama abiat mmɔ; ndien Jehovah eyedahado ɔnɔ ŋwan.

¹³ Kpukpru akaŋa, ye kpukpru mbet emi enye ɔŋwɔŋɔde ndituhɔ idem esie, ebe esie onyuŋ ekeme ndibiat.

¹⁴ Edi edieke ebe esie mitiŋke ikɔ ye enye baba usen kiet: ntre ke enye anam kpukpru akaŋa esie oro eda, ye kpukpru mbet esie eke enye ebetde enye anam mmɔ esɔŋɔ eda, koro enye miketiŋke ikɔ ye ŋwan ke usen emi enye okopde.

¹⁵ Ndien edieke enye abiatde mmɔ, ke enye ama okokop; enye enyene ndibiom ukwaŋ-ŋkpɔ aŋwan.

¹⁶ Mme mmɔ emi edi mme ewuhɔ emi Jehovah okowukde Moses, ke ufɔt owo ye ŋwan esie, ye ke ufɔt ete ye eyen esie aŋwan, ke ini uyen esie, ke ufɔk ete esie.