NUMBERS 3 - Edisana ñwed Abasi Ibom

Nditɔ Aaron

¹ NDIEN ŋko mme mmɔ emi edi emana Aaron ye Moses, ke usen oro Jehovah ɔkɔdɔhɔde ye Moses ke obot Sinai.

² Mme mmɔ emi enyuŋ edi enyiŋ nditɔ Aaron; Nadab akpan, ye Abihu, ye Eleazar, ye Ithamar.

³ Mme mmɔ emi edi enyiŋ nditɔ Aaron mme oku emi ekeyerede aran, emi eyɔhɔde mmɔ ubɔk, ete eda oku.

⁴ Ndien Nadab ye Abihu ema ekpa ke iso Jehovah ke ini mmɔ edade esen ikaŋ edi ke iso Jehovah, ke wilderness Sinai, mmɔ ikenyuŋ inyeneke nditɔ; ndien Eleazar ye Ithamar eda oku ke iso Aaron ete mmɔ.

⁵ Ekem Jehovah ɔdɔhɔ Moses,

⁶ ete, Da esien Levi di ken, nyuŋ nim mmɔ ke iso Aaron oku, man enam ŋkpɔ enɔ enye.

⁷ Ndien mmɔ edikpeme kpukpru se ekpekpemede enɔ enye, ye ofuri esop, ke iso efe esop, man enam utom ebiet-iduŋ.

⁸ Mmɔ edinyuŋ ekpeme kpukpru ŋkpɔ efe esop, ye se ekpekpemede enɔ nditɔ Israel, man enam utom ebiet-iduŋ. Da ndien mme Levite nɔ Aaron, ye nditɔ esie:

⁹ eda mmɔ ke otu nditɔ Israel enɔ enye.

¹⁰ Nyuŋ nim Aaron ye nditɔ esie, ete etiŋ enyin ke idaha oku mmɔ; ndien esen owo eke asaŋade ekpere enyene ndikpa.

¹¹ Ndien Jehovah ɔdɔhɔ Moses, ete,

¹² Ndien, sese, ami mma nda mme Levite ke otu nditɔ Israel ke ibuot kpukpru akpan eke esirerede itie-eyen ke otu nditɔ Israel: mmɔdo mme Levite edidide okim;

¹³ koro kpukpru akpan edide okim: ke usen ami ŋkowotde kpukpru akpan ke isɔŋ Egypt, ndianare kpukpru akpan Israel nda ke idem mi, ye owo ye unam: mmɔ edidi okim: ami ndi Jehovah.

¹⁴ Ndien Jehovah ɔdɔhɔ Moses ke wilderness Sinai, ete,

¹⁵ Bat nditɔ Levi, nte ufɔk mme ete mmɔ edide, ye nte oruk mmɔ edide; kpukpru iren-owo, ɔtɔŋɔde ke eyen ɔfiɔŋ kiet ye mmɔ eke ebede oro, ke afo edibat mmɔ.

¹⁶ Ndien Moses abat mmɔ, ke uyo Jehovah, kpa nte eketemede enye.

¹⁷ Ndien mme mmɔ emi edi nditɔ Levi, nte enyiŋ mmɔ edide; Gershon, ye Kohath, ye Merari.

¹⁸ Mme mmɔ emi ŋko edi enyiŋ nditɔ Gershon, nte oruk mmɔ edide:

¹⁹ Libni ye Shimei. Ye nditɔ Kohath, nte oruk mmɔ edide; Amram, ye Izhar, ye Hebron, ye Uzziel.

²⁰ Ye nditɔ Merari, nte oruk mmɔ edide; Mahli, ye Mushi. Mme mmɔ emi edi ubon mme Levite, nte ufɔk mme ete mmɔ edide.

²¹ Oruk mme Libnite, ye oruk mme Shimeite edi eke Gershon:

²² mme mmɔ emi edi oruk mme Gershonite. Owo mmɔ emi ekebatde, ke ibat kpukpru irenowo, ɔtɔŋɔde ke eyen ɔfiɔŋ kiet, ye mmɔ eke ebede oro, kpa mme mmɔ emi ekebatde, edi tɔsin owo itiaba, ye ikie ition.

²³ Mme oruk mme Gershonite ediwuk tent ke etak efe, edem emi utin osopde.

²⁴ Ndien Eliasaph eyen Lael edidi etubom ufɔk ete mme Gershonite.

²⁵ Ndien utom emi nditɔ Gershon edinamde ke efe esop, edidi ebiet-iduŋ, ye tent, ye ufɔhɔ-ŋkpɔ esie, ye ikpehe emi eyiride ke enyin-usuŋ efe esop,

²⁶ ye mme ikpehe okure, ye ikpehe enyin-usuŋ okure, emi akande ebiet-iduŋ, ye itie-uwa okuk, ye uruk esie, eke kpukpru ŋkpɔ utom esie.

²⁷ Ndien ŋko oruk mme Amramite, ye oruk mme Izharite, ye oruk mme Hebronite, ye oruk mme Uzzielite edi eke Kohath: mme mmɔ edi oruk mme Kohathite.

²⁸ Ibat iren-owo emi, ɔtɔŋɔde ke eyen ɔfiɔŋ kiet, ye mmɔ eke ebede oro, edi tɔsin owo itiaita ye ikie itiokiet, eke ekpemede se ekpekpemede ke edisana ebiet.

²⁹ Mme oruk nditɔ Kohath ediwuk tent ke ŋkaŋ ebiet-iduŋ edem usuk.

³⁰ Ndien Elizaphan eyen Uzziel edidi etubom ufɔk ete mme oruk mme Kohathite.

³¹ Ndien se mmɔ edikpemede edi ekebe, ye okpokoro, ye uwuk-utuenikaŋ, ye mme itie uwa, ye ŋkpoduoho edisana ebiet eke edade enam ŋkpɔ ke esit, ye ukara, ye kpukpru se enamde ke esit.

³² Ndien Eleazar eyen Aaron oku edidi etubom mme etubom mme Levite, onyuŋ edi andise mme mmɔ emi ekpemede se ekpekpemede ke edisana ebiet.

³³ Oruk mme Mahlite, ye oruk mme Mushite enyuŋ edi eke Merari: mme mmɔ emi edi mme oruk Merari.

³⁴ Ndien mme mmɔ emi ekebatde, ke ibat kpukpru iren owo, ɔtɔŋɔde ke eyen ɔfiɔŋ kiet, ye mmɔ eke ebede oro, edi tɔsin owo itiokiet, ye ikie iba.

³⁵ Ndien ŋko Zuriel eyen Abihail edi etubom ufɔk ete oruk Merari: mme mmɔ emi ediwuk ke ŋkaŋ ebiet-iduŋ edem edere.

³⁶ Ndien yak nditɔ Merari ese enyuŋ ekpeme mme obukpɔk ebiet-iduŋ, ye mme bar esie, ye mme obubɔk esie, ye mme socket esie, ye kpukpru ŋkpɔ unam-utom esie, ye kpukpru se mmɔ enamde ke esit,

³⁷ Ye mme obubɔk okure emi akande okuk, ye socket mmɔ, ye ɔkpɔhɔ mmɔ, ye uruk mmɔ.

³⁸ Ndien mme mmɔ emi ediwukde tent ke iso ebiet-iduŋ ke iso efe esop, ke edem usiaha-utin, edidi Moses, ye Aaron ye nditɔ esie, emi ekpemede se ekpekpemede ke edisana ebiet, emi edide se nditɔ Israel ekpekpemede: ndien esen owo eke asaŋade ekpere enyene ndikpa:

³⁹ kpukpru mme Levite emi ekebatde, emi Moses ye Aaron ekebatde ke uyo Jehovah, nte oruk mmɔ esaŋade, kpukpru iren-owo, ɔtɔŋɔde ke eyen ɔfiɔŋ kiet, ye mmɔ eke ebede oro, edi tɔsin owo edip ye iba.

⁴⁰ Ndien Jehovah ɔdɔhɔ Moses ete, Bat kpukpru akpan ke otu iren nditɔ Israel, ɔtɔŋɔde ke eyen ɔfiɔŋ kiet, ye mmɔ eke ebede oro nyuŋ da ibat enyiŋ mmɔ.

⁴¹ Ndien da mme Levite sɔk mi, (ami ndi Jehovah) ke ibuot kpukpru akpan ke otu nditɔ Israel; ye ufene mme Levite ke ibuot kpukpru akpan nditɔ ufene nditɔ Israel.

⁴² Ndien Moses abat kpukpru akpan ke otu nditɔ Israel, kpa nte Jehovah eketemede enye.

⁴³ Ndien kpukpru akpan iren-owo ke ibat enyiŋ ɔtɔnɔde ke owo ɔfiɔŋ kiet, ye mmɔ eke ebede oro, nte owo mmɔ emi ekebatde esaŋade, edi tɔsin edip ye iba, ye ikie iba ye ata ye duopeta.

⁴⁴ Ndien Jehovah ɔdɔhɔ Moses, ete,

⁴⁵ Da mme Levite ke ibuot kpukpru akpan ke otu nditɔ Israel, nyuŋ da ufene mme Levite ke ibuot ufene mmɔ; ndien mme Levite eyedi okim: Ami ndi Jehovah.

⁴⁶ Ndien ŋko ama edi mme mmɔ emi enyenede ndifak, kpa akpan nditɔ Israel ikie iba ye ata ye duopeta, emi edorode ekan mme Levite:

⁴⁷ Bɔ mmɔ kiet kiet shekel ition; nte edisana shekel asaŋade ke afo edibɔ mmɔ: (shekel kiet ekem gerah edip):

⁴⁸ Ndien men okuk emi edade efak mme mmɔ emi edorode, nɔ Aaron, ye nditɔ esie.

⁴⁹ Ndien Moses emen silver ufak mɔ emi edorode ekan mmɔ emi edade mme Levite efak;

⁵⁰ Ɔbɔ akpan nditɔ Israel silver oro; tɔsin shekel, ye shekel ikie ita, ye ata ye ition, nte edisana shekel asaŋade.

⁵¹ Ndien Moses emen silver mme mmɔ emi efakde, ɔnɔ Aaron, ye nditɔ esie, ke uyo Jehovah, kpa nte Jehovah eketemede Moses.