NUMBERS 29 - Edisana ñwed Abasi Ibom

Mme Uwa Obufa Isua

¹ NDIEN ŋko ke ɔyɔhɔ ɔfiɔŋ itiaba, ke akpa usen ɔfiɔŋ, ke mbufo edisop edisana esop; ekunam baba ubɔk-utom kiet: mbufo enim enye ke usen erifuri ukorowo.

² Ndien mbufo ewa edifɔp uwa enɔ Jehovah ke edinem utebe; abak enaŋ kiet, ye okukim kiet, ye nditɔ erɔŋ isua kiet kiet itiaba, eke efɔnde ema:

³ ye inuak-udia mmɔ ke omer eti ndom-uyo ita, eke abuahade ye aran, ke enaŋ omer iba ke okukim,

⁴ ewa omer kierakiet ye eyen erɔŋ kiet, ke ofuri nditɔ erɔŋ mbitiaba oro:

⁵ ye okpo ebot kiet ke uwa idiɔk ido, eke edade esio isop mbufo:

⁶ ekɔrɔ ke edifɔp uwa, ye inuak-udia esie, ye ediŋwɔŋ uwa mmɔ, nte ido mmɔ asaŋade, ke edinem utebe, uwa ikaŋ Jehovah.

⁷ Ndien ke ɔyɔhɔ usen duop, ke ɔyɔhɔ ɔfiɔŋ itiaba emi, ke mbufo edisop edisana esop; ndien mbufo etuk esit mbufo: ekunam baba ubɔk-utom kiet ke esit:

⁸ edi mbufo ewa edifɔp uwa enɔ Jehovah ke edinem utebe: ke abak enaŋ kiet, ye okukim kiet, ye nditɔ erɔŋ isua kiet kiet itiaba; mbufo eyom eke efɔnde ema:

⁹ ye inuak-udia mmɔ ke eti mdom-uyo eke abuahade ye aran, omer ita esaŋa ke enaŋ kiet, omer iba ke okukim,

¹⁰ ewa omer kierakiet ye eyen erɔŋ kiet, ke ofuri nditɔ erɔŋ mbitiaba oro:

¹¹ ye okpo ebot kiet ke uwa idiɔk ido: ekɔrɔ ke uwa idiɔk ido usio-isop, ye nsinsi edifɔp uwa, ye inuak-udia esie, ye ediŋwɔŋ uwa mmɔ.

¹² Ndien ke ɔyɔhɔ usen efut, ke ɔyɔhɔ ɔfiɔŋ itiaba, ke mbufo edisop edisana esop; ekunam baba ubɔk-utom kiet; edi enim usɔrɔ enɔ Jehovah ke ofuri usen itiaba:

¹³ ndien mbufo ewa edifɔp uwa, kpa uwa ikaŋ, enɔ Jehovah, edinem utebe; ke abak enaŋ duopeta, ye okukim iba, ye nditɔ erɔŋ isua kiet kiet duopenaŋ; yak mmɔ efɔn ema:

¹⁴ ye inuak-udia mmɔ, ke eti ndom-uyo emi aran esinede ke esit, omer ita esaŋa ye enaŋ kiet kiet, ke ofuri enaŋ duopeta oro, omer iba ke okukim kiet kiet, ke okukim mbiba oro,

¹⁵ ewa omer kiet kiet ye eyen erɔŋ kiet ke ofuri nditɔ erɔŋ duopenaŋ oro:

¹⁶ ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

¹⁷ Ndien ke udiana-akpa usen (mbufo enyuŋ ewa) abak enaŋ duopeba, ye okikum iba, ye nditɔ erɔŋ isua kiet kiet duopanaŋ, eke efɔnde ema:

¹⁸ ye inuak-udia mmɔ, ye ndiŋwɔŋ uwa, mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, nte ido mmɔ asaŋade:

¹⁹ ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa mmɔ.

²⁰ Ndien ke ɔyɔhɔ usen ita, (mbufo enyuŋ ewa) enaŋ duopekiet, ye okukim iba, ye nditɔ erɔŋ isua kiet kiet duopenaŋ, eke efɔnde ema:

²¹ ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ,

²² ke adaŋa ibat mmɔ, ye nte ido mmɔ asaŋade: ye okpo ebot kiet ke uwa idiɔk ido, ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

²³ Ndien ke ɔyɔhɔ usen inaŋ, (mbufo ewa) enaŋ duop ye okukim iba, ye nditɔ erɔŋ isua kiet kiet duopenaŋ, eke efɔnde ema:

²⁴ ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade: ye okpo ebot kiet, ke ibat mmɔ, nte ido mmɔ asaŋade:

²⁵ ye okpo ebot kiet, ke uwa idiɔk ido: ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

²⁶ Ndien ke ɔyɔhɔ usen ition, (mbufo ewa) enaŋ usukkiet, ye okukim iba, ye nditɔ erɔŋ isua kiet kiet duopenaŋ, eke efɔnde ema:

²⁷ ye inuak-udia mmɔ, ye ediŋwɔŋ uwa mmɔ, ke eke enaŋ, ye eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

²⁸ ye okpo ebot kiet ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye endiŋwɔŋ uwa esie.

²⁹ Ndien ke ɔyɔhɔ usen itiokiet, (mbufo ewa) enaŋ itiaita, ye okukim iba, ye nditɔ erɔŋ isua kiet kiet duopenaŋ, eke efɔnde ema:

³⁰ ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

³¹ ye okpo ebot kiet, ke uwa idiɔk ido; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

³² Ndien ke ɔyɔhɔ usen itiaba, (mbufo ewa) enaŋ itiaba, ye okukim iba ye nditɔ erɔŋ isua kiet kiet duopenaŋ, eke efɔnde ema:

³³ ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke eke nditɔ erɔŋ, ke adaŋa ibat mmɔ, ye nte ido mmɔ asaŋade:

³⁴ ye okpo ebot kiet ke uwa idiɔk ido ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

³⁵ Ke ɔyɔhɔ usen itiaita, mbufo enim usɔrɔ: ekunam baba ubɔk-utom kiet:

³⁶ mbufo enyuŋ ewa edifɔp uwa, kpa uwa ikaŋ, ke edinem utebe, enɔ Jehovah: abak enaŋ kiet, ye okukim kiet, ye nditɔ erɔŋ isua kiet kiet itiaba, eke efɔnde ema:

³⁷ ye inuak-udia mmɔ, ye ediŋwɔŋ uwa mmɔ, ke eke enaŋ, ye ke eke okukim, ye ke nditɔ erɔŋ, ke adaŋa ibat mmɔ, ye nte ido edide:

³⁸ ye okpo ebot uwa idiɔk ido kiet; ekɔrɔ ke nsinsi edifɔp uwa, ye inuak-udia esie, ye ediŋwɔŋ uwa esie.

³⁹ Mbufo enam ŋkpɔ emi enɔ Jehovah ke ini emi edoride enɔ mbufo, ekɔrɔ ke mme akaŋa mbufo, ye ke uwa ima mbufo, ye ke edifɔp uwa mbufo, ye ke inuak-udia mbufo, ye ke ediŋwɔŋ uwa mbufo, ye ke mme uwa emem mbufo.

⁴⁰ Ndien Moses emen kpukpru etiŋ ɔnɔ nditɔ Israel, kpa nte Jehovah eketemede Moses.