NUMBERS 28 - Edisana ñwed Abasi Ibom

Uwa Emi Enyenede Ndiwa Kpukpru Usen

¹ NDIEN Jehovah ɔdɔhɔ Moses, ete Wuk nditɔ Israel, nyuŋ dɔhɔ mmɔ, ete,

² Mbufo etiŋ enyin ke ndida enɔ mi, kpa udia uwa ikaŋ mi, ke edinem utebe, nnɔ mi ke ekem ini esie.

³ Nyuŋ dɔhɔ mmɔ, ete, Emi edi uwa ikaŋ eke mbufo ediwade enɔ Jehovah; nditɔ erɔŋ isua kiet kiet iba eke efɔnde ema, kpukpru usen, ke nsinsi edifɔp uwa.

⁴ Wa eyen erɔŋ kiet ke usenubɔk, nyuŋ wa eyen erɔŋ eken ke mbubreyo:

⁵ ye omer kiet eti ndom-uyo ke inuak-udia, emi abuahade ye quart editim aran;

⁶ nsinsi edifɔp uwa oro ekewade ke Sinai, ke edinem utebe, uwa ikaŋ Jehovah.

⁷ Nyuŋ wa ediŋwɔŋ uwa esie, quart kiet ye eyen erɔŋ kiet: ŋwaŋa wine ke ediŋwɔŋ uwa nɔ Jehovah ke edisana ebiet.

⁸ Ndien ŋko wa eyen erɔŋ eken ke mbubreyo: kpa nte inuak-udia usenubɔk, ye nte ediŋwɔŋ uwa esie edide, ke afo ediwa uwa ikaŋ ɔnɔ Jehovah, ke edinem utebe.

⁹ Ndien ŋko ke usen sabbath, wa nditɔ erɔŋ isua kiet kiet iba eke efɔnde ema, ye omer eti ndom-uyo iba, ke inuak-udia, eke abuahade ye aran, ye ediŋwɔŋ uwa esie:

¹⁰ edifɔp uwa sabbath ke kpukpru usen sabbath kɔrɔ ke nsinsi edifɔp uwa, ye ediŋwɔŋ uwa esie.

¹¹ Ndien ŋko mbufo eda edifɔp uwa esɔk Jehovah ke iso ɔfiɔŋ mbufo; abak enaŋ iba, ye okukim kiet, ye nditɔ erɔŋ isua kiet kiet itiaba, eke efɔnde ema;

¹² omer eti ndom-uyo ita, ke inuak-udia, emi abuahade ye aran, enyuŋ esaŋa ye enaŋ kiet; omer eti ndom-uyo iba emi abuahade ye aran, ke inuak-udia, esaŋa ye okukim kiet;

¹³ omer eti ndomo-uyo kiet emi abuahade ye aran, ke inuak-udia, onyuŋ asaŋa ye eyen erɔŋ kiet, ke edifɔp uwa eti utebe, uwa ikaŋ Jehovah.

¹⁴ Ndien ediŋwɔŋ uwa mmɔ edidi wine ke qaurt iba ke enaŋ kiet, ye qaurt ye udori ke okukim kiet, ye quart kiet ke eyen erɔŋ kiet: emi edide edifɔp uwa kpukpru ɔfiɔŋ, ke ofuri ɔfiɔŋ isua.

¹⁵ Mbufo enyuŋ ewa okpo ebot kiet enɔ Jehovah ke uwa idiɔk ido, ekɔrɔ ke nsinsi edifɔp uwa, ye edinwɔŋ uwa esie.

¹⁶ Ndien ŋko mbufo enim passover enɔ Jehovah, ke ɔyɔhɔ usen akpa ɔfiɔŋ duopenaŋ.

¹⁷ Mbufo enyuŋ edia usɔrɔ ke ɔyɔhɔ usen ɔfiɔŋ emi efut: enyuŋ eta uyo eke leaven miduhe, ke ofuri usen mbitiaba.

¹⁸ Mbufo esop edisana esop ke akpa usen; ekunam baba ubɔk-utom ke esit:

¹⁹ ndien mbufo ewa uwa ikaŋ, kpa edifɔp uwa enɔ Jehovah; abak enaŋ iba, ye okukim kiet, ye nditɔ erɔŋ isua kiet kiet itiaba: mbufo eyom eke efɔnde ema:

²⁰ mbufo ewa omer ita ye enaŋ, wa omer iba ye okukim;

²¹ nyuŋ da omer kierakiet wa ye eyen erɔŋ kiet, ke ofuri nditɔ erɔŋ mbitiaba:

²² ye okpo ebot kiet ke uwa idiɔk ido, man osio isop mbufo.

²³ Mbufo enyene ndiwa mme mmɔ emi ŋkɔrɔ ke edifɔp uwa usenubɔk eke edide nsinsi edifɔp uwa.

²⁴ Ke ntem ke mbufo ediwa inuak-udia uwa ikaŋ, ke edinem utebe, enɔ Jehovah, kpukpru usen, ke ofuri usen mbitiaba: ewa enye ekɔrɔ ke nsinsi edifɔp uwa, ye ediŋwɔŋ uwa esie.

²⁵ Ndien ke ɔyɔhɔ usen itiaba ke mbufo esop edisana esop; ekunam baba ubɔk-utom kiet.

²⁶ Ndien ŋko ke usen akpa mfri, ke ini mbufo ewade obufa inuak udia enɔ Jehovah, ke mme urua mbufo ekurede, ke mbufa edisop edisana esop; mbufo ekunam baba ubɔk-utom kiet:

²⁷ ndien mbufo ewa edifɔp uwa enɔ Jehovah ke edinem utebe: abak enaŋ iba, ye okukim kiet, ye nditɔ erɔŋ isua kiet kiet itiaba;

²⁸ ye inuak-udia mmɔ ke eti ndom-uyo eke abuahade ye aran, omer ita esaŋa ye enaŋ kiet, omer iba ye okukim kiet,

²⁹ ewa omer kierakiet ye eyen erɔŋ kiet, ke ofuri nditɔ erɔŋ mbiatiaba:

³⁰ ye okpo ebot kiet eke edade esio isop mbufo.

³¹ Mbufo enyene ndiwa mmɔ ŋkɔrɔ ke nsinsi edifɔp uwa, ye inuak-udia esie (mbufo eyom eke efɔnde ema), ye mme ediŋwɔŋ uwa mmɔ.