NUMBERS 25 - Edisana ñwed Abasi Ibom

Nditɔ Israel Eduɔ Eduk ke Ndikpono Baal-peor

¹ NDIEN Israel etie ke Shittim, ndien mmɔ etɔŋɔ ndise use ye nditɔ Moab iban.

² Ndien mmɔ (iban oro) ekekot mmɔ edi ke ebiet uwa ndem mmɔ: ndien mmɔ edia ŋkpɔ, enyuŋ enuhɔ enɔ ndem mmɔ.

³ Israel enyuŋ edian idem ye Baal-peor: ndien Jehovah ayat esit ye Israel.

⁴ Jehovah onyuŋ ɔdɔhɔ Moses, ete, Da kpukpru mme etubom mbio emi; ndien yiri mmɔ oro ke iso utin nɔ Jehovah, man ifiopesit Jehovah ɔkpɔŋ Isarel.

⁵ Ndien Moses ɔdɔhɔ mme ebierikpe Israel, ete, Kpukpru mbufo eka ekewot ikɔt mbufo emi ekediande idem mmɔ ye Baal-peor.

⁶ Ndien, sese, owo Israel kiet ada ŋwan a Midian kiet etiene nditɔ ete esie ke iso Moses, ye ke iso ofuri esop nditɔ Israel, emi etuaŋade eyet ke enyin-usuŋ efe esop.

⁷ Ndien adaŋemi Phinehas eyen Eleazar, eyen Aaron oku, okutde, enye adaha ke ufɔt mbon esop, onyuŋ ada eduat ke ubɔk esie;

⁸ ndien ebine eyen Israel oro oduk ke ubet nna, okokim mmɔ mbiba, eyen Isreal ye ŋwan oro ke idibi esie. Ndien idiɔk udɔŋɔ oro etre ke otu nditɔ Israel.

⁹ Ndien mme mmɔ emi ekpaŋade ke idiɔk udɔŋɔ oro esim tɔsin owo edip ye inaŋ.

¹⁰ Ndien Jehovah ɔdɔhɔ Moses ete, Phinehas eyen Eleazar,

¹¹ eyen Aaron oku, omosuk mi iyaresit ye nditɔ Israel, ke ufup emi enye okofibede ke otu mmɔ ɔnɔ mi, ndien ami ntre ndisobo nditɔ Israel ke ufup mi.

¹² Dɔhɔ ndien, ete, Sese, ami mmɔnɔ enye ediomi ufan mi:

¹³ ndien enye eyena ɔnɔ enye ye ubon esie emi editenede enye ke nsinsi ediomi itie oku: ke usiene emi enye okofibede ufup Abasi esie, onyuŋ osiode isop ɔnɔ nditɔ Israel.

¹⁴ Ndien enyiŋ eyen Israel emi ekewotde, kpa enye oro ekewotde ye ŋwan a Midian oro, ekere Zimri, eyen Salu, akamba owo ufɔk ete ke otu mme Simeonite.

¹⁵ Ndien enyiŋ aŋwan a Midian emi ekewotde, ekere Cozbi, eyen Zur: enye ekedi ɔbɔŋ oruk kiet ke ufɔk ete kiet ke Midian.

¹⁶ Ekem Jehovah ɔdɔhɔ Moses, ete,

¹⁷ Mbufo edutuhɔ nditɔ Midian, enyuŋ esuan mmɔ:

¹⁸ Koro mmɔ ekedutuhɔde mbufo ke ŋkari emi mmɔ ekaride mbufo ke ikɔ Peor, ye ke ikɔ Cozbi, eyen ɔbɔŋ Midian, eyen-ete mmɔ aŋwan, emi ekewotde ke usen idiɔk udɔŋɔ (emi otibede) abaŋa Peor.