NUMBERS 24 - Edisana ñwed Abasi Ibom

Balaam Afiak Ɔnɔ Balak Etop Abaŋa Nditɔ Israel

¹ NDIEN adaŋemi Balaam okutde nte Jehovah amade ndidiɔŋ Israel, enye ikaha idiɔŋ, nte akakade ke ini efen, edi owuk iso esie ese wilderness.

² Ndien Balaam emenere enyin esiemɔ okut Israel etiede ke ataya ke ubon, ke ubon: ndien spirit Abasi oduk enye ke idem.

³ Ndien enye emen uyo esie, onyuŋ ɔdɔhɔ ete, Uyo Balaam eyen Beor, uyo owo emi enyin esie etarade:

⁴ Uyo andikop ikɔ Abasi, emi okokutde ŋkukut Ata Ɔkpɔsɔŋ, nte enye ɔduɔde, ke enyin anana:

⁵ Ho, sese, nte mme ataya fo eyede, O Jacob! ye iduŋ fo, O Israel!

⁶ Mmɔ enyanare ena nte mme ebedeŋ, ye nte ndiye iŋwaŋ ke mben inyaŋ, nte eto aloe eke Jehovah ɔtɔde, ye nte cedar ke mben mmɔŋ.

⁷ Mmɔŋ eyeto ke mme abaŋ esie ɔduɔ, ubon esie onyuŋ odu ke mben ediwak mmɔŋ; edidem esie eyenyuŋ oforo akan Agag, ubɔŋ esie eyenyuŋ okpon.

⁸ Abasi okosio enye ke Egypt; enye enyene odudu nte editim. Enye eyedia mme idut mme asua esie, onyuŋ anuak mme ɔkpɔ mmɔ, onyuŋ etiga mmɔ ke idaŋ esie.

⁹ Enye ɔkubɔ, ana nte lion, ye nte abak lion: anie edimenere enye? ɔfɔfɔn ɔnɔ owo eke ɔfɔnde ye afo, onyuŋ ɔdɔdiɔk ɔnɔ owo eke osuŋide fi.

¹⁰ Ndien Balak ayat esit ye Balaam, onyuŋ amia ubɔk esiemɔ: ndien Balak ɔdɔhɔ Balaam, ete, Ŋkokot fi edi nte afo edisuŋide mme asua mi, ndien, sese, afo ama ɔdiɔŋ mmɔ utim ikata emi.

¹¹ Daha ndien, fehe, nyɔŋ ebiet fo: ŋkaduak ndikpono fi eti-eti; ndien, sese, Jehovah iyakke fi okut ukpono.

¹² Ndien Balaam ɔdɔhɔ Balak, ete, Nte ŋkɔdɔhɔke nde ye mme isuŋ-utom fo emi afo ɔkɔdɔŋde utom ke ɔtɔ mi, nte,

¹³ Edieke Balak edinɔde mi adaŋa silver ye gold nte ɔyɔhɔde ufɔk esie, ndikwe nte mbede uyo Jehovah, ndinam eti ŋkpɔ mme idiɔk eke otode ke esit mi: edi se Jehovah edidɔhɔde, oro ke nditiŋ?

¹⁴ Ndien, sese, ami mmɔŋ nnyɔŋ ntiene oruk mi: yak nsian fi ndien se mbon emi edinamde mbon fo ke ini iso.

¹⁵ Ndien enye emen uyo esie, onyuŋ ɔdɔhɔ ete, Uyo Balaam eyen Beor, ye uyo owo emi enyin esie etarade:

¹⁶ Uyo andikop ikɔ Abasi, ye eke andifiɔk ifiɔk Ata Edikoŋ, emi okokutde ŋkukut Ata Ɔkpɔsɔŋ, nte enye ɔduɔde, ke enyin anana:

¹⁷ Ŋkut enye, edi idige ke emi: nsese enye, edi ikpereke: ntantafiɔŋ asaŋa oto ke Jacob, esaŋ onyuŋ adaha ke enyɔŋ ke Israel, ndien enye eyenuak mme adaŋa Moab, onyuŋ asuan kpukpru mbon ndutime.

¹⁸ Ndien Edom eyedi se edidade, Seir eyenyuŋ edi se mme asua esie edidade; ndien Israel eyenam uko.

¹⁹ Ndien (ɔbɔŋ emi otode) ke Jacob eyeda ubɔŋ, onyuŋ osobo mme mmɔ emi efeŋede ke obio ebɔhɔ.

²⁰ Ndien enye ese Amalek, onyuŋ emen uyo esie, ete, Amalek ekedi mbemiso idut; edi utit esie eyedi nsinsi nsobo.

²¹ Ndien enye ese mme Kenite, onyuŋ emen uyo esie, ɔdɔhɔ ete, Iduŋ fo ɔsɔsɔŋ, afo omonyuŋ odori efɔk fo ke akamba itiat;

²² Koro nte Kain eyedi se edidiade, tutu Asshur edimen fi efep?

²³ Ndien enye emen uyo esie, ete, Ho! anie edidu uwem ke ini Abasi edinamde ntem?

²⁴ Ndien ubom mbakara eto ke edem Kittim, edifik Asshur, enyuŋ efik Eber, ndien eyesobo enye ŋko ke nsinsi.

²⁵ Ekem Balaam adaha ke enyɔŋ, ɔnyɔŋ ke ebiet esie: Balak onyuŋ ɔnyɔŋ esie ŋko.