NUMBERS 23 - Edisana ñwed Abasi Ibom

Se Balaam Eketiŋde Ɔnɔ Balak Abaŋa Nditɔ Israel

¹ NDIEN Balaam ɔdɔhɔ Balak, ete, Nam itie-uwa itiaba mi nɔ mi, nyuŋ diɔŋ enaŋ itiaba ye okukim itiaba ŋko nɔ mi ke ebiet emi.

² Ndien Balak anam kpa nte Balaam ɔkɔdɔhɔde; Balak ye Balaam enyuŋ ewa enaŋ kiet, ye okukim kiet, ke itie-uwa kiet kiet.

³ Ndien Balaam ɔdɔhɔ Balak, ete, Da mi ke ɔtɔ ufɔp uwa fo, ndien ami nyeka: ndusuk Jehovah eyedi edisobo ye ami: ndien ŋkpɔ eke enye ediwutde mi, oro ke nditiŋ nnɔ fi. Ndien enye aka ke ibuot obot kiet.

⁴ Ndien Abasi edisobo ye Balaam: ndien enye ɔdɔhɔ Enye, ete, Mmɔdiɔŋ itie-uwa itiaba, mmonyuŋ ŋwa enaŋ kiet ye okukim kiet ke itie-uwa kiet kiet.

⁵ Ndien Jehovah esin Balaam ikɔ ke inua, onyuŋ ɔdɔhɔ ete, Fiak edem tiene Balak, nyuŋ dɔhɔ ntem.

⁶ Ndien enye afiak etiene enye, ndien, sese, enye ke adada ke ɔtɔ uwa esie, enye, ye kpukpru mbɔŋ Moab.

⁷ Ndien enye (Balaam) emen uyo esie, onyuŋ ɔdɔhɔ ete, Balak edidem Moab ada mi ke Aram, ke ikpɔ obot edem usiaha-utin, edi ete, “Di disuŋi Jacob nɔ mi, nyuŋ di ditɔk Israel.”

⁸ Ami ndisuŋi didie se Abasi misuŋike?

⁹ Ndinyuŋ ntɔk didie se Jehovah mitɔkke? Koro ntiede ke enyɔŋ mbuot ikpɔ itiat ŋkut enye, nnyuŋ ntie ke ikpɔ obot nse enye: sese, edi mbio emi editiede ikpɔŋ ke idem mmɔ: idinyuŋ ibatke mmɔ isin ke otu mme idut.

¹⁰ Anie abat obu Jacob, ye ibat ɔyɔhɔ Israel inaŋ? Ŋkpakam mkpa mkpa eti owo, utit mi akam onyuŋ etie nte esie!

¹¹ Ndien Balak ɔdɔhɔ Balaam, ete, Nso ŋkpɔ ke afo anam emi ye ami? Ŋkada fi ndi nte edisuŋi mme asua mi, ndien, sese, afo amakabare ɔdiɔŋ mmɔ.

¹² Ndien enye ɔbɔrɔ, ete, Nte nnyeneke nditim ndɔhɔ se Jehovah esinde mi ke inua?

¹³ Ndien Balak ɔdɔhɔ enye ete, Mbɔk, kam tiene mi di ke ebiet efen, emi afo edikutde mmɔ do: afo ukwe mmɔ uma, ibɔhɔke ubak, ukwe mmɔ kpukpru: ndien da do suŋi mmɔ nɔ mi.

¹⁴ Ndien enye ada enye aka iŋwaŋ Zophim, ke enyɔŋ ibuot Pisgah, ndien anam itie-uwa itiaba, onyuŋ awa enaŋ kiet, ye okukim kiet, ke itie uwa kiet kiet.

¹⁵ Ndien enye ɔdɔhɔ Balak, ete, Da mi ke ɔtɔ ufɔp-uwa fo, ndien ami mmɔŋ ŋka ko ŋkosobo (ye Jehovah).

¹⁶ Ndien Jehovah edisobo ye Balaam, onyuŋ esin enye ikɔ ke inua, onyuŋ ɔdɔhɔ ete, Fiak tiene Balak, nyuŋ tiŋ ntem.

¹⁷ Ndien adaŋemi enye osimde enye, sese, enye ke adada ke ɔtɔ ufɔp uwa eise, ye mbɔŋ Moab ŋko. Ndien Balak obup enye, ete, Jehovah ɔdɔhɔ didie?

¹⁸ Ndien enye emen uyo esie, onyuŋ ɔdɔhɔ ete, Daha ke enyɔŋ, Balak, kop; kpaŋ utɔŋ ke ikɔ mi, O eyen Zippor:

¹⁹ Abasi idige owo eke enye okposude nsu, inyuŋ idige eyen owo eke enye ɔkpɔkpuhɔre. Nte enye ɔdɔhɔ, ndien etre ndinam?

²⁰ Nte enye ɔŋwɔŋɔ, ndien etre ndinam osu? Sese, ewuk mi ete ndɔdiɔŋ: enye omonyuŋ ɔdiɔŋ; ndien ami ŋkwe nte ŋkabarede enye.

²¹ Enye isehe idiɔk ke Jacob, inyuŋ ikwe ŋkwaŋa ke Israel: Jehovah Abasi esie odu ye enye, mkpo edidem onyuŋ odu ke otu mmɔ.

²² Abasi okosio mmɔ ke Egypt; enye enyene odudu nte editim.

²³ Koro idiɔŋ miduhe ke Jacob, mfa inyuŋ iduhe ke Israel; ke ekem ini mmɔ emen se Abasi anamde, etiŋ ɔnɔ Jacob ye Israel.

²⁴ Sese mbon emi edaha ke enyɔŋ nte lion, enyuŋ emen idem nte abak lion: enye idisuhɔkede ina, tutu ata se awaide, onyuŋ ɔŋwɔŋ iyip ŋkpɔ eke enye owotde.

²⁵ Ndien Balak ɔdɔhɔ Balaam, ete, Kusuŋi aba mmɔ, kunyuŋ udɔdiɔŋ aba mmɔ.

²⁶ Ndien Balaam ɔbɔrɔ Balak, ete, Nte Ŋkɔdɔhɔke fi, nte, Kpukpru se Jehovah edidɔhɔde, oro ke ndinam?

²⁷ Ndien Balak ɔdɔhɔ Balaam, ete, Mbɔk, kam di, nyeda fi ŋka ebiet efen; ndusuk eyenen ke iso Abasi nte afo osuŋi mmɔ do ɔnɔ mi.

²⁸ Ndien Balak ada Balaam aka ke enyɔŋ ibuot Peor, emi esede edem wilderness.

²⁹ Ndien Balaam ɔdɔhɔ Balak, ete, Nam itie-uwa itiaba mi nɔ mi, nyuŋ diɔŋ enaŋ itiaba ye okukim itiaba mi ŋko nɔ mi.

³⁰ Ndien Balak anam kpa nte Balaam ɔkɔdɔhɔde enye onyuŋ awa enaŋ kiet ye okukim kiet ke itie-uwa kiet kiet.