NUMBERS 20 - Edisana ñwed Abasi Ibom

Mmɔŋ Meribah Ɔwɔrɔ ke Itiat

¹ EKEM nditɔ Israel, kpa ofuri esop, ekesim wilderness Sin ke akpa ɔfiɔŋ: ndien mmɔ etie ke Kadesh: ndien Miriam akpa do, onyuŋ ɔbuhɔ do.

² Ekem mbon esop ikwe mmɔŋ: ndien mmɔ esop idem enam ikɔ ye Moses ye Aaron.

³ Mmɔ enyuŋ etɔhɔ utɔk ye Moses, ete, Nnyin ikpakam ikpaŋa ke ini nditɔ ete nnyin ekpaŋade ke iso Jehovah!

⁴ Ndien nsinam mbufo ekedade mbon esop Jehovah edi ke wilderness emi, man nnyin, ye ufene nnyin ikpaŋa ke esit?

⁵ Ndien nsinam mbufo ekenyuŋ enamde nnyin iwɔŋɔ ke Egypt, enyuŋ eda nnyin eduk ke idiɔk ebiet emi? Idige ebiet mkpasip, inyuŋ idige ebiet eto fig, ye vine eke pomegranate; mmɔŋ eke iŋwɔŋde inyuŋ iduhe.

⁶ Ndien Moses ye Aaron edaha ke iso esop oro eka ke usuŋ efe esop, ndien eduɔ ke isɔŋ ekubi iso mmɔ: ndien Jehovah owut mmɔ ubɔŋ esie.

⁷ Ekem Jehovah ɔdɔhɔ Moses, ete, Da esaŋ oro,

⁸ nyuŋ bon mbon esop, afo, ye Aaron eyen-uka, ndien mbufo edɔhɔ itiat emi ke iso mmɔ; ndien enye eyewɔrɔ mmɔŋ esie, afo eyenyuŋ anam mmɔŋ ɔwɔrɔ ke itiat oro ɔnɔ mmɔ. Ntem ke afo edinɔ esop ye ufene mmɔ mmɔŋ eŋwɔŋ.

⁹ Ekem Moses emen esaŋ oro efep ke iso Jehovah, kpa nte Enye eketemede enye.

¹⁰ Ndien Moses ye Aaron ebon kpukpru owo ke iso itiat oro, ndien enye ɔdɔhɔ mmɔ ete, Mbufo mbon nsɔŋ-ibuot, ekop ndien; nte nnyin inyene ndinam mmɔŋ ɔwɔrɔ ke itiat emi nnɔ mbufo?

¹¹ Ndien Moses emenere ubɔk esie ke enyɔŋ, ada esaŋ oyibi itiat oro utim ikaba: ndien mmɔŋ ɔwɔrɔ ediwak: ndien kpukpru owo ye ufene mmɔ eŋwɔŋ.

¹² Ndien Jehovah ɔdɔhɔ Moses ye Aaron, ete, Koro mbufo mikenimke uyo mi ke akpanikɔ, inyuŋ ikpono mi ke iso nditɔ Israel, mmɔdo mbufo mididaha mme mmɔ emi iduk ke isɔŋ emi nnɔde mmɔ.

¹³ Emi edi mmɔŋ utɔk (Meribah), emi nditɔ Israel etɔhɔde ye Jehovah ebaŋa, ndien enye ada mmɔ ukpono ke idem.

¹⁴ Ekem Moses etie ke Kadesh ɔdɔŋ mme isuŋ-utom ke ɔtɔ ɔbɔŋ Edom, ete, Ntem ke Israel eyen usɔ ɔdɔhɔ, ete, Afo ɔmɔfiɔk kpukpru ukut emi nnyin ikokutde:

¹⁵ nte mme ete nnyin ekesuhɔrede ke Egypt, nnyin ikenyuŋ iduŋ ke Egypt anyan ini; nditɔ Egypt enyuŋ ediɔk ye nnyin, ye mme ete nnyin:

¹⁶ Ndien adaŋemi nnyin isemede inɔ Jehovah enye okop uyo nnyin, onyuŋ ɔdɔŋ angel okosio nnyin ke Egypt: ndien sese, nnyin idu ke Kadesh, ke obio emi anade ke adaŋa isɔŋ fo:

¹⁷ Mbɔk, yak nnyin isaŋa le isɔŋ fo ibe: nnyin idisaŋake ke iŋwaŋ, idinyuŋ isaŋake ke iŋwaŋ vine, idinyuŋ iŋwɔŋke mmɔŋ obube: nnyin iyesaŋa ke ɔkpɔ-usuŋ edidem, idiwahake ke nnasia, idinyuŋ iwahake ke ufien, tutu nnyin ibe adaŋa fo.

¹⁸ Ndien Edom ɔdɔhɔ enye, ete, Afo udubehe mi, mbak ndiwɔrɔ ye ofut mbiɔŋɔ fi.

¹⁹ Ndien nditɔ Israel edɔhɔ enye, ete, Nnyin iyesaŋa ke ɔkpɔ-usuŋ: ndien edieke ami ye ufene mi iŋwɔŋde mmɔŋ fo nyenɔ fi ŋkpɔ ke esit: ndinamke baba ŋkpɔ kiet, ibɔhɔke ke ndisaŋa ke ukot mi mbe.

²⁰ Edi enye ɔdɔhɔ ete, Udubehe. Edom onyuŋ ɔwɔrɔ ye owo ekese, ke ɔkpɔsɔŋ ubɔk, ndibiɔŋɔ enye.

²¹ Ntem ke Edom esin ndinɔ nditɔ Israel usuŋ esaŋa ke adaŋa esie ebe: ndien Israel ɔwɔŋɔre ɔkpɔŋ enye.

²² Ndien nditɔ Israel, kpa ofuri esop, ewuhɔre, edaŋa ke Kadesh, edisim ke akamba obot Hor.

²³ Ndien Jehovah ɔdɔhɔ Moses ye Aaron ke obot Hor, ke adaŋa isɔŋ Edom, ete, Aaron edibono ye oruk esie:

²⁴ koro enye mididukke ke isɔŋ emi nnɔde nditɔ Israel, koro mbufo mikekopke uyo mi ke ɔtɔ mmɔŋ Meribah.

²⁵ Da Aaron ye Eleazar eyen esie, dɔk ke obot Hor:

²⁶ Ndien sio Aaron edisine-ŋkpɔ esie, sine Eleazar eyen esie ke idem: ndien Aaron eyekpa do, okobono ye oruk esie.

²⁷ Ndien Moses anam kpa nte Jehovah eketemede: ndien mmɔ edɔk ke obot Hor ke iso ofuri esop.

²⁸ Ndien Moses osio Aaron edisine-ŋkpɔ esie, ada esine Eleazar eyen esie ke idem; ndien Aaron akpa do ke enyɔŋ obot: ndien Moses ye Eleazar eto ke obot esuhɔre.

²⁹ Ndien adaŋemi ofuri esop ekutde ete ke Aaron amakpa, ofuri esop Israel etuaŋa Aaron ke usen edip ye udop.