NUMBERS 16 - Edisana ñwed Abasi Ibom

Korah ye Dathan ye Abiram Esɔŋ Ibuot

¹ EKEM Korah, eyen Izhar, eyen Kohath, eyen Levi, ye Dathan, ye Abiram, nditɔ Eliab, ye On, eyen Peleth, nditɔ Reuben, eda owo:

² ndien mmɔ ye owo nditɔ Israel ikie iba ye aba ye duop ŋko, ikpɔ owo esop, emi ekotde ke odu, mbon etop, edaha ke enyɔŋ ke iso Moses.

³ Ndien mmɔ esop idem enam ikɔ ye Moses ye Aaron, ekedɔhɔ mmɔ, ete, Eke mbufo ekem ke adaŋa oro: koro ofuri esop kpukpru edide edisana, Jehovah onyuŋ odu ke otu mmɔ ŋko: nsinam ndien mbufo emende idem mbufo ke enyɔŋ ntre ekan esop Jehovah.

⁴ Ndien adaŋemi Moses okopde, enye ɔduɔ ke isɔŋ okubi iso esie:

⁵ Ndien ɔdɔhɔ Korah, ye kpukpru nsaŋa esie, ete, Eyo esiere, Jehovah eyewut eke edide esiemɔ, ye eke onyuŋ asanade: eyenyuŋ ada enye adian ke idem: enye eyeda owo eke enye edimekde adian ke idem.

⁶ Mbufo enam ntem; mbufo Korah ye ofuri nsaŋa esie eda censer;

⁷ Enyuŋ esin ikaŋ ke esit, enyuŋ eda incense edori ke esit ke iso Jehovah, mkpɔŋ: ndien ama ekem, owo eke Jehovah edimekde, enye eyedi edisana: eke mbufo ekem ke adaŋa oro, nditɔ Levi.

⁸ Ekem Moses ɔdɔhɔ Korah ete, Mbɔk, mbufo nditɔ Levi ekop:

⁹ Nte mbufo ebat ke ata ekpri ŋkpɔ, emi Abasi Israel akadianarede mbufo ke mbon esop Israel, onyuŋ ada mbufo adian ke idem, man mbufo enam utom ebiet-iduŋ Jehovah, enyuŋ eda ke iso mbon esop enam ŋkpɔ mmɔ?

¹⁰ Enye ama onyuŋ ada fi ye kpukpru nditɔ usɔ, nditɔ Levi ŋko, adian ke idem: ndien mbufo emɔŋ eyom itie oku ŋko.

¹¹ Edi emi esin fi ye nsaŋa fo esop idem enam ikɔ ye Jehovah: ndien Aaron edi anie eke mbufo esukde enye uyo?

¹² Ndien Moses ɔdɔŋ ekekot Dathan ye Abiram, nditɔ Eliab: edi mmɔ edɔhɔ ete, Nnyin idige:

¹³ Nte emi afo okosiode nnyin ke isɔŋ emi ɔfiɔrɔde mmɔŋ-eba ye aran-ɔkɔk, ndiwot nnyin ke wilderness, ikemke fi, ibɔhɔke ini afo onyuŋ ada ubɔŋ ke otu nnyin ŋko?

¹⁴ Afo uka unyuŋ udaha nnyin uduk ke isɔŋ emi ɔfiɔrɔde mmɔŋ-eba ye aran-ɔkwɔk, uka unyuŋ unɔŋɔ nnyin iŋwaŋ ye iŋwaŋ vine ŋko inyene: nte afo oyom nditibi mbon emi enyin? Nnyin idige.

¹⁵ Ndien Moses ayat esit eti-eti, onyuŋ ɔdɔhɔ Jehovah, ete, Kuwɔŋɔre use enɔ mmɔ: ŋkɔbɔhɔ mmɔ baba ass kiet, ŋkonyuŋ ndiɔkke ye baba owo mmɔ kiet.

¹⁶ Ndien Moses ɔdɔhɔ Korah, ete, Afo ye ofuri esop fo edi ke iso Jehovah, afo ye mmɔ, ye Aaron, mkpɔŋ:

¹⁷ Mbufo kpukpru enyuŋ eda censer mbufo, enyuŋ esin mmɔ incense ke esit, ndien yak kpukpru owo eda censer mmɔ edi ke iso Jehovah, censer ikie iba ye aba ye duop; afo ŋko ye Aaron eda censer mbufo edi.

¹⁸ Ekem kpukpru mmɔ eda censer mmɔ, enyuŋ esin mmɔ ikaŋ ke esit, ndien eda incense edori ke esit, ndien eda ke enyin-usuŋ efe esop, ye Moses ye Aaron.

¹⁹ Korah onyuŋ obon kpukpru mbon esop, man enam ikɔ ye mmɔ, ke usuŋ efe esop: ndien kpukpru mbon esop ekut ubɔŋ Jehovah.

²⁰ Ndien Jehovah ɔdɔhɔ Moses ye Aaron, ete,

²¹ Mbufo edianare idem mbufo ke esop emi, ndien nyesobo mmɔ ini kiet.

²² Ndien mmɔ eduɔ ke isɔŋ ekubi iso mmɔ ete, O Abasi, Abasi spirit kpukpru owo, nte afo eyeyat esit ye ofuri esop, koro owo kiet eduede?

²³ Ndien Jehovah ɔdɔhɔ Moses, ete, Dɔhɔ mbon esop emi, ete,

²⁴ Mbufo edaŋa ke mme tent Korah, Dathan, ye Abiram.

²⁵ Ndien Moses adaha ke enyɔŋ aka ke ɔtɔ Dathan, ye Abiram; mbiowo Israel enyuŋ etiene enye eka.

²⁶ Ndien enye ɔdɔhɔ mbon esop, ete, Mbɔk edaŋa ke mme tent mme idiɔk owo emi, ekunyuŋ etuk baba ŋkpɔ kiet eke mmɔ enyenede, mbak edisobo mbufo ke kpukpru mme idiɔk ido mmɔ.

²⁷ Ndien mme mmɔ emi ekande mme tent Korah, ye Dathan, ye Abira, ekuk, edaŋa: ndien Dathan ye Abiram ewɔŋɔ eda ke usuŋ mme tent mmɔ, ye iban mmɔ, ye nditɔ-iren mmɔ, ye ŋkpri nditɔ mmɔ.

²⁸ Ndien Moses ɔdɔhɔ ete, Mbufo eda emi efiɔk ete ke Jehovah ɔkɔdɔŋ mi ndinam kpukpru ŋkpɔ emi: ke itoho ke esit mi.

²⁹ Edieke mme mmɔ emi edikpaŋade nte kpukpru owo: idige Jehovah ɔkɔdɔŋ mi utom.

³⁰ Edi Jehovah ama anam utibe ŋkpɔ, isɔŋ ama onyuŋ atat inua esie, emen mmɔ, ye kpukpru se mmɔ enyenede, mmɔ ema enyuŋ esuhɔre ke udi ndisi; ndien mbufo eyefiɔk ete ke mmɔ emi emesin Jehovah ke ndek.

³¹ Ndien edikem ke enye ama ɔkɔdɔhɔ kpukpru ikɔ emi ama, isɔŋ emi odude mmɔ ke idak asiaha:

³² Isɔŋ onyuŋ atat inua esie emen mmɔ, ye ufɔk mmɔ, ye kpukpru owo emi enyenede Korah, ye kpukpru ŋkpɔ mmɔ.

³³ Mmɔ enyuŋ esuhɔre ke udi ndisi, ye kpukpru owo emi edude ye mmɔ, ndien isɔŋ esire abaha mmɔ: enyuŋ esobo mmɔ ke otu esop efep.

³⁴ Ndien ofuri Israel emi ekande mmɔ ekuk efeŋe itɔk ke mfiori mmɔ: koro edɔhɔde ete, Mbak isɔŋ edimen nnyin ŋko.

³⁵ Ndien ikaŋ oto Jehovah, edita owo ikie ye aba ye duop emi efɔpde incense.

³⁶ Ndien Jehovah ɔdɔhɔ Moses, ete,

³⁷ Dɔhɔ Eleazar eyen Aaron oku, ete enye osio mme censer oro ke esit ikaŋ efep, afo nyuŋ da ikaŋ kɔduɔk nsan-nsan: koro mmɔ edide edisana:

³⁸ Kpa mme censer mbon emi ediɔkde ye ukpɔŋ mmɔ, ndien yak edom mbat-mbat, eda efuk itie uwa: koro mme mmɔ oro ekedade mmɔ edi ke iso Jehovah, mmɔdo mmɔ edide edisana: ndien mmɔ edidi idiɔŋɔ nditɔ Israel

³⁹ Ndien Eleazar oku ada mme censer okpoho, emi mme mmɔ emi eketade ikaŋ ekedade edi; ndien edom mmɔ mbat-mbat eda efuk itie-uwa:

⁴⁰ Man edi ŋkpɔ eriti nditɔ Israel, man esen owo, emi mitoho ke ubon Aaron, okusaŋa ekpere ndifɔp incense ke iso Jehovah; man okutie nte Korah ye mme nsaŋa esie: kpa nte emi Jehovah ɔkɔdɔhɔde enye ke ubɔk Moses.

⁴¹ Ndien mkpɔŋ kpukpru mbon esop nditɔ Israel esuk Moses ye Aaron uyo, ete, Mbufo emewot ikɔt Jehovah.

⁴² Ndien edikem, ke ini esop ebonode enam ikɔ ye Moses ye Aaron, mmɔ ekabare ese efe esop: ndien, sese, obubit enyɔŋ ofuk enye, mmɔ enyuŋ ekut ubɔŋ Jehovah.

⁴³ Ndien Moses ye Aaron edi ke iso efe esop.

⁴⁴ Ndien Jehovah ɔdɔhɔ Moses, ete, Mbufo edaha ke otu esop emi, man nsobo mmɔ ini kiet.

⁴⁵ Edi mmɔ eduɔ ke isɔŋ ekubi iso mmɔ.

⁴⁶ Ndien Moses ɔdɔhɔ Aaron ete, Da censer kiet, nyuŋ sio ikaŋ ke itie-uwa sin ke esit, ndien sin incense, nyuŋ sɔp itɔk iwiwa, duk ke otu mbon esop, nyuŋ sio isop nɔ mmɔ: koro iyaresit ɔmɔwɔrɔ Jehovah ke iso: udɔŋɔ ɔmɔtɔŋɔ.

⁴⁷ Ndien Aaron ada oro, kpa nte Moses ɔkɔdɔhɔde, onyuŋ efehe oduk ke ufɔt mbon esop; ndien, sese, udɔŋɔ ɔmɔtɔŋɔ ke otu mmɔ: ndien enye esin incense, onyuŋ osio isop ɔnɔ mmɔ.

⁴⁸ Enye onyuŋ ada ke ufɔt mme akpa mkpa ye mme odu uwem; ndien udɔŋɔ etre.

⁴⁹ Ndien mmɔ emi ekpaŋade ke udɔŋɔ oro edi tɔsin owo duopenaŋ, ye ikie itiaba, ekɔrɔ ye mme mmɔ emi ekpaŋade ke ikɔ Korah.

⁵⁰ Ndien Aaron afiak edem etiene Moses ke usuŋ efe esop: ndien udɔŋɔ oro etre.