NUMBERS 14 - Edisana ñwed Abasi Ibom

Nditɔ Israel Esuk Moses ye Aaron Uyo Enyuŋ Esɔŋ Ibuot ye Abasi

¹ NDIEN ofuri esop emenere uyo mmɔ eseme: kpukpru owo enyuŋ etua eyet ŋko ke okoneyo oro.

² Ndien kpukpru nditɔ Israel esuk Moses ye Aaron uyo: ofuri esop enyuŋ edɔhɔ mmɔ, ete, Nnyin ikpekam ikpaŋa ke isɔŋ Egypt!

³ Ndien nsinam Jehovah akadade nnyin edi ke isɔŋ emi, ete ikpaŋa ke ofut, man iban nnyin ye nsek nditɔ nnyin enyuŋ edi ŋkpɔ mbume? Nte ndifiak ke Egypt ifɔnke nnyin ikan?

⁴ Ndien kiet ɔdɔhɔ kiet, ete, Yak nnyin inim owo ke etubom, ndien ifiak ke Egypt.

⁵ Ndien Moses ye Aaron eduɔ ke isɔŋ ekubi iso mmɔ ke iso ofuri esop nditɔ Israel emi ekebonode.

⁶ Ndien Joshua eyen Nun, ye Caleb eyen Jephunneh, emi edude ke otu mbon uyep isɔŋ, ewai edisine-ŋkpɔ mmɔ:

⁷ ndien mmɔ edɔhɔ ofuri esop nditɔ Israel, ete, Isɔŋ oro nnyin ikesaŋade ke esit ibe ika enye ndiyep, edi ata eti isɔŋ.

⁸ Edieke nnyin inemde Jehovah esit, enye eyeda nnyin oduk ke isɔŋ oro, onyuŋ ada enye ɔnɔ nnyin; isɔŋ emi ɔfiɔrɔde mmɔŋ-eba ye aran-ɔkwɔk.

⁹ Edi mbufo ekutun itun ye Jehovah, ekunyuŋ efehe nditɔ isɔŋ oro: koro mmɔ edi udia nnyin: iberedem mmɔ amakabare ɔkpɔŋ mmɔ, ndien Jehovah odu ye nnyin; mbufo ekufehe mmɔ.

¹⁰ Edi ofuri esop edɔhɔ ete, Yak etɔŋɔ mmɔ ke itiat. Ndien kpukpru nditɔ Israel ekut ubɔŋ Jehovah ke efe esop.

¹¹ Jehovah onyuŋ ɔdɔhɔ Moses, ete, Adaŋa didie ke mbio emi edisin mi ke ndek? Ke adaŋa ewe ini ke mmɔ edinim uyo mi ke akpanikɔ? ebaŋa kpukpru mme utibe ŋkpɔ emi ŋkanamde ke otu mmɔ?

¹² Nyeda idiɔk udɔŋɔ mmia mmɔ, nnyuŋ nsobo mmɔ, ndien nnam fi akabare edi obio eke okponde onyuŋ ɔsɔŋde akan mmɔ.

¹³ Ndien Moses ɔdɔhɔ Jehovah, ete, Ŋkɔm nditɔ Egypt ema ekekop: (koro afo akadade odudu fo osio mbio emi ke otu mmɔ

¹⁴ ɔdɔk;) Ema enyuŋ etiŋ enɔ mmɔ emi eduŋde ke edem emi: mmɔ ema ekekop ete ke afo Jehovah ama ayarare idem fo ke enyin mmɔ, ete ke obubit enyɔŋ fo onyuŋ adada mmɔ ke enyɔŋ; ke afo onyuŋ ebem mmɔ iso asaŋa ke adaha ikaŋ ke okoneyo.

¹⁵ Ndien edieke afo okotde mbio emi owot, nte owo kiet, mme idut emi ekekopde etop fo, eyedɔhɔ ete,

¹⁶ Oto ke oro Jehovah mikekemeke ndida mmɔ emi nduk ke isɔŋ emi enye ɔkɔŋwɔŋɔde ɔnɔ mmɔ, oro esin enye owot mmɔ ke wilderness.

¹⁷ Mbɔk, ndien, yak odudu Ɔbɔŋ mi okpokpon,

¹⁸ kpa nte afo ɔkɔdɔhɔde ete, Jehovah isɔpke iyaresit, edi awak ima, ke efen mme ukwaŋ-ŋkpɔ ye ndudue, edi idiyakke mbon isop ebɔhɔ; ada usiene ukwaŋ-ŋkpɔ mme ete osio ye nditɔ, tutu osim ɔyɔhɔ emana ita ye inaŋ.

¹⁹ Mbɔk dahado ke mme ukwaŋ-ŋkpɔ mbio emi, nte akwa ima fo edide, ye nte afo ekefende ɔnɔ mmɔ, ɔtɔŋɔde ke Egypt tutu osim emi.

²⁰ Ndien Jehovah ɔdɔhɔ ete, Mmadahado ke uyo fo;

²¹ Edi kpa nte ami nsuk ndudu uwem, ke akpanikɔ ubɔŋ Jehovah eyeyɔhɔ ke ofuri ererimbot.

²² Koro kpukpru mmɔ eke ekutde ubɔŋ mi, ye mme utibe ŋkpɔ mi emi ŋkanamde ke Egypt, ye ke wilderness, ema ekedomo mi utim ikoduop emi, ema enyuŋ esin uyo mi ndikop:

²³ ke akpanikɔ mmɔ idikwe isɔŋ emi ŋkɔŋwɔŋde nnɔ mme ete mmɔ, baba owo eke osuŋide mi kiet idinyuŋ ikwe enye:

²⁴ edi ama edi owo mi Caleb, koro spirit efen okodude enye ke esit, enye onyuŋ otimde etiene mi nyeda enye nduk ke isɔŋ emi enye okodukde ke esit; ubon esie eyenyuŋ enyene enye.

²⁵ Ndien mme Amalekite ye mme Canaanite etie ke itihere; mkpɔŋ mbufo ewɔŋɔre edaŋa eka ke wilderness usuŋ Ididuot Inyaŋ.

²⁶ Ndien Jehovah ɔdɔhɔ Moses, ye Aaron, ete,

²⁷ Adaŋa didie ke ndidahado nnɔ idiɔk mbon esop emi esukde mi uyo? Mmokop nsukuyo nditɔ Israel, emi mmɔ esukde mi?

²⁸ Dɔhɔ mmɔ ete, Jehovah ete, Kpa nte emi ndude uwem, ke akpanikɔ nyenam ye mmɔ kpa nte mmɔ edɔhɔde esin mi ke utɔŋ:

²⁹ Mme okpo mbufo eyeduɔŋɔ mi ke wilderness; ndien mbufo kpukpru emi ekebatde, ke adaŋa nte ofuri ibat mbufo edide, ɔtɔŋɔde ke owo isua edip, ye mmɔ emi ebede oro, emi esukde mi uyo,

³⁰ ke akpankɔ mbufo ididukke ke isɔŋ emi ŋkɔŋwɔŋɔde nte nyenam mbufo eduŋ ke esit, ke mibɔhɔke Caleb eyen Jephunneh, ye Joshua eyen Nun.

³¹ Edi ama edi nditɔwɔŋ mbufo emi mbufo ekedɔhɔde ebaŋa, ete ke mmɔ eyedi ŋkpɔ mbume, nyeda mmɔ nduk, ndien mmɔ eyefiɔk isɔŋ emi mbufo esinde ke ndek.

³² Edi ama edi mbufo, mme okpo mbufo eyeduɔŋɔ mi ke wilderness.

³³ Ndien nditɔ mbufo eyediyo ke wilderness ke isua aba, eyenyuŋ esio isop use mbufo, tutu mme okpo mbufo ebu ke wilderness.

³⁴ Ke adaŋa ibat usen oro mbufo ekedade eyep isɔŋ, kpa usen aba oro, usen kiet isua kiet, usen kiet isua kiet, ke mbufo edibiom mme ukwaŋ-ŋkpɔ mbufo, kpa isua aba, ndien mbufo eyefiɔk asua mi.

³⁵ Ami Jehovah mma ndɔhɔ nte, Nditreke ndinam emi ye ofuri idiɔk esop emi esopde enam ikɔ ye ami; kpa ke wilderness emi ke mmɔ edisobo, edinyuŋ ekpaŋa do.

³⁶ Ndien mbon emi Moses ɔkɔdɔŋde, ete ekeyep isɔŋ oro, emi ekenyuŋ efiakde, enyuŋ enam ofuri esop esuk enye uyo, ke erida idiɔk etop isɔŋ oro ndi,

³⁷ kpa mme mmɔ emi ekedade idiɔk etop isɔŋ edi, ekekpaŋa ndisi mkpa ke iso Jehovah.

³⁸ Edi Joshua eyen Nun, ye Caleb eyen Jephunneh, edu uwem ke otu mmɔ emi ekekade ndiyep isɔŋ.

³⁹ Ekem ke adaŋemi Moses eketiŋde ikɔ emi ɔnɔ kpukpru nditɔ Israel, mmɔ etua eyet eti-eti.

⁴⁰ Ndien mmɔ ebak edaha ke enyɔŋ ke usenubɔk, ekedɔk ke ibuot obot, ete, Se nnyin nnyin, imenyime ndidɔk ke ebiet emi Jehovah ɔkɔdɔhɔde: koro nnyin ima idue.

⁴¹ Ndien Moses ete, Nsinam mbufo mikopke uyo Jehovah ntem? Edi mbufo idikwe unen.

⁴² Ekudɔk: koro Jehovah miduhe ke otu mbufo; mbak mme asua mbufo edisuan mbufo.

⁴³ Koro mme Amalekite ye mme Canaanite edude do ke iso mbufo, mbufo eyenyuŋ ekpaŋa ke ofut: koro emekabare ekpɔŋ Jehovah, mmɔdo Jehovah midinyuŋ iduhe ye mbufo.

⁴⁴ Edi mmɔ esɔŋ esit edɔk ke ibuot obot: edi ekebe ediomi Jehovah, ye Moses iwɔrɔke ke nna.

⁴⁵ Ndien mme Amalekite ye mme Canaanite emi eduŋde ke obot oro, esuhɔre ekewot mmɔ, enyuŋ esuan mmɔ, tutu esim ke Hormah.