NUMBERS 13 - Edisana ñwed Abasi Ibom

Moses Osio Mbon Uyep Ɔdɔŋ Eka Ekeyep Isɔŋ Canaan

¹ EDIKEM Jehovah ɔdɔhɔ Moses, ete, Sio owo dɔŋ ekeyep isɔŋ Canaan, emi nnɔde nditɔ Isarel;

² mbufo esio owo kiet kiet ke kpukpru esien mme ete mmɔ edɔŋ, yak kpukpru edi ikpɔ owo ke otu mmɔ.

³ Ndien Moses etie ke wilderness Paran ɔdɔŋ mmɔ utom, ke uyo Jehovah; kpukpru mmɔ oro edi mme etubom nditɔ Israel.

⁴ Ndien mme mmɔ emi edi enyiŋ mmɔ: eke esien Reuben, shammua eyen Zaccur.

⁵ Eke esien Simeon, Shaphat eyen Hori.

⁶ Eke esien Judah, Caleb, eyen Jephunneh.

⁷ Eke esien Issachar, Igal eyen Joseph.

⁸ Eke esien Ekpraim, Hoshea eyen Nun.

⁹ Eke esien Benjamin, Palti eyen Raphu.

¹⁰ Eke esien Zebulun, Gaddiel eyen Sodi.

¹¹ Eke esien Joseph: eke esien Manasseh, Gaddi eyen Susi.

¹² Eke esien Dan, Ammiel eyen Gemalli.

¹³ Eke esien Asher, Sethur eyen Michael.

¹⁴ Eke esien Naphtali, Nahbi eyen Vophsi.

¹⁵ Eke esien Gad, Geuel eyen Machi.

¹⁶ Mme mmɔ emi edi enyiŋ mbon oro Moses ɔkɔdɔŋde ekeyep isɔŋ oro. Ndien Moses osio Hoshea eyen Nun enyiŋ Joshua.

¹⁷ Ntem ke Moses ɔdɔŋ mmɔ ekeyep isɔŋ Canaan, onyuŋ ɔdɔhɔ mmɔ, ete, Mbufo edɔk ntem ke edem usuk, enyuŋ edɔk ke obot;

¹⁸ Enyuŋ ese isɔŋ nte etiede; ye mme andiduŋ enye, mme mmɔ edi mkpɔsɔŋ, mme edi mmeme, mme iwakke, mme ewak;

¹⁹ Ye isɔŋ emi mmɔ eduŋde nte etiede, me ɔfɔn, me ifɔnke; ye mme obio emi eduŋde nte etiede, mme ke tent, mme ke mkpɔsɔŋ ebiet;

²⁰ Ye isɔŋ ŋko nte etiede, mme edi nsek isɔŋ, mme edi idiɔk, mme akai edu ke esit, mme iduhe. Mbufo enyuŋ esɔŋ esit, enyuŋ eda mfri isɔŋ oro edi. Ndien ini oro edi ini emi akpa grape adatde.

²¹ Ndien mmɔ edɔk ekeyep isɔŋ oro, ɔtɔŋɔde ke wilderness Zin tutu osim ke Rehob, ke edem emi ekade Hamath.

²² Ndien mmɔ edɔk ke edem usuk, ekesim Hebron; ndien Ahiman, ye Sheshai, ye Talmai, nditɔ Anak, edu do. (Ndien ekebem iso ebɔp Hebron, ndien edibɔp Zoan ke Egypt ke isua itiaba ema ekebe.)

²³ Ekem mmɔ edisim ke itihere Eshcol, enyuŋ esibe ŋkɔk vine ye etuek grape kiet do, ndien owo iba esin ɔkɔŋ ebiom enye; mmɔ enyuŋ eda pomegranate ye fig enyɔŋɔ edi.

²⁴ Ebiet oro ekere itihere Eshcol, abaŋa etuek, grape emi nditɔ Israel ekesibede do.

²⁵ Ndien mmɔ eto ndiyep isɔŋ enyɔŋɔ edi, ke usen aba ema ekure.

²⁶ Ekem mmɔ edisim Moses, ye Aaron, ye ofuri esop nditɔ Israel ke wilderness Paran, ke Kadesh; enyuŋ eda mbuk edibuk enɔ mmɔ ye ofuri esop, enyuŋ ewut mmɔ mfri isɔŋ oro.

²⁷ Ndien mmɔ edɔhɔ enye, ete, Nnyin ima isim ke isɔŋ emi afo ɔkɔdɔŋde nnyin ete ika, ndien ke akpanikɔ enye ɔfɔfiɔrɔ mmɔŋ-eba ye aran-ɔkwɔk; emi onyuŋ edi mfri esie.

²⁸ Edi mme mmɔ emi eduŋde ke isɔŋ oro edi mkpɔsɔŋ, mme obio enyuŋ enyene ibibene, enyuŋ ekponi eti-eti: nnyin ima inyuŋ ikut nditɔ Anak do ŋko-ŋko.

²⁹ Amalek eduŋ ke edem usuk isɔŋ; mme Hittite, ye mme Jebusite, ye mme Amorite, enyuŋ eduŋ ke ikpɔ obot; mme Canaanite ŋko eduŋ ke mben inyaŋ, ye ke mben Jordan.

³⁰ Ndien Caleb anam kpukpru owo edop ndisuk Moses uyo, ete, Yak nnyin idɔk ini kiet, ikeda enye inyene: koro nnyin imetim ikeme ubɔk ye enye.

³¹ Edi mme mmɔ oro ekesaŋde ye enye edɔk, edɔhɔ ete, Nnyin ikemeke ndidɔk ŋkaŋwana ye mmɔ oro: koro mmɔ esɔŋde ekan nnyin.

³² Ndien mmɔ eda idiɔk mbuk ebaŋa isɔŋ oro mmɔ ekekade ndiyep, editiŋ enɔ nditɔ Israel, ete, Isɔŋ oro nnyin ikebede ika enye ndiyep, edi isɔŋ eke adiade mme andiduŋ enye; ndien kpukpru owo emi nnyin ikokutde ke esit ekoŋ idaha.

³³ Do ke nnyin ikenyuŋ ikut mme Nephilim: ndien nnyin ikese idem nnyin ke ŋkuku, mmɔ enyuŋ ese nnyin kpa ntre.