NUMBERS 12 - Edisana ñwed Abasi Ibom

Miriam ye Aaron Esuk Moses Uyo

¹ NDIEN Miriam ye Aaron esuk Moses uyo ebaŋa ŋwan a Cush emi enye ɔkɔdɔde: koro enye ɔkɔdɔde ŋwan a Cush kiet.

² Mmɔ enyuŋ edɔhɔ, ete, Nte ye Moses ikpɔŋ ke Jehovah osuk ɔdɔhɔ? Nte enye idɔhɔke ye nnyin ŋko? Ndien Jehovah okop.

³ Ndien Moses oro edi ata suŋ-suŋ owo, akan kpukpru owo emi edude ke iso ererimbot.

⁴ Ndien ke idem idaha oro Jehovah ɔdɔhɔ Moses ye Aaron, ye Miriam ete, Mbufo owo mbita ewɔŋɔ edi ke efe esop. Ndien mmɔ mbita ewɔŋɔ eka.

⁵ Ndien Jehovah etie ke adaha obubit enyɔŋ ɔsuhɔre, edida ke usuŋ efe esop, onyuŋ okot Aaron ye Miriam edi: ndien mmɔ mbiba eto edi.

⁶ Ndien enye ɔdɔhɔ ete, Mbufo ekop ndien ikɔ mi: edieke prophet ediduŋde ke otu mbufo, ami Jehovah nyeyarare idem mi nnɔ enye ke ŋkukut, nnyuŋ ndɔhɔ ye enye ke ndap.

⁷ Moses owo mi itiehe ntem: enye edi owo akpanikɔ ke ofuri ufɔk mi.

⁸ Nneme ye enye ke inua ke inua; ke atatai, idige ke ŋke ikɔ; enye eyenyuŋ okut mbiet Jehovah: mbufo enam naŋa didie mifeheke ndisuk owo mi Moses uyo?

⁹ Ndien Jehovah ayat esit ye mmɔ; ndien enye ɔnyɔŋ.

¹⁰ Ndien obubit enyɔŋ odorore ke efe ɔdɔk; ndien sese, Miriam akabare akpa-mfia nte snow. Ndien Aaron ese Miriam, ndien sese, enye eyedi akpa-mfia.

¹¹ Ndien Aaron ɔdɔhɔ Moses, ete, Ɔbɔŋ mi, mbɔk, kudori nnyin idiɔk ido emi, emi nnyin inamde ndisime, emi nnyin inyuŋ iduede.

¹² Mbɔk, kuyak enye etie nte akpa-mfia, emi obuk esie edem kiet eyemerede adaŋemi enye otode eka esie ke idibi.

¹³ Ndien Moses eseme ɔnɔ Jehovah ete, Mbɔk, Abasi, nam udɔŋɔ okure enye ndien.

¹⁴ Ndien Jehovah ɔdɔhɔ Moses, ete, Edieke ete esie ɔkɔkɔkde enye etap ke iso, ikpetieke ke but usen itiaba? Yak ekuk enye ke edem nna ebaha ke usen itiaba, ndien eda enye eduk.

¹⁵ Ndien mmɔ ekuk Miriam ebaha ke edem nna ke usen itiaba: mmɔ inyuŋ idaŋake tutu eda Miriam eduk.

¹⁶ Ekem mmɔ edaŋa ke Hazeroth, ekenam nna ke wilderness a Paran.