NUMBERS 11 - Edisana ñwed Abasi Ibom

Nditɔ Israel Esuk Abasi Uyo; Abasi Ɔnɔ Mmɔ Quails

¹ NDIEN adaŋemi mbio oro enamde nsukuyo, ɔdiɔk Jehovah ke utɔŋ: ndien Jehovah okop, onyuŋ ayat esit; ikaŋ Jehovah onyuŋ obumere ke otu mmɔ, onyuŋ ata owo ke utit nna.

² Ndien kpukpru owo eseme enɔ Moses; ndien ke ini Moses ekpede Jehovah ubɔk, ikaŋ oro onime.

³ Ndien enye osio ebiet oro enyiŋ Tabarah: koro ikaŋ Jehovah asakde ke otu mmɔ.

⁴ Ndien idiɔk itɔŋ ɔdɔŋ mbuaha udim owo emi edude ke otu mmɔ: nditɔ Israel enyuŋ etɔŋɔ ntak etua eyet, ete, Anie edinɔ nnyin unam eke itade?

⁵ Nnyin imeti iyak emi nnyin iketade ke Egypt ke ikpikpu, ye okokon, ye melon, ye leek, ye oyim ye garlic:

⁶ Ndien ke emi ukpɔŋ nnyin eyemere: baba ŋkpɔ kiet eke enyin ekutde iduhe, ke mibɔhɔke manna emi.

⁷ Ndien manna oro ebiet mkpasip coriander, onyuŋ ebiet bdellium.

⁸ Mmɔ esaŋa ekewobi, enyuŋ eda enye eyut ke itiat, enyuŋ etim enye ke uruŋ, enyuŋ etem enye ke eso, enyuŋ eda enye enam uyo; ndien inem esie ebiet inem uyo enyene aran.

⁹ Ndien ke ini mbara edepde ke nna ke okoneyo, manna oro onyuŋ edep ke esit.

¹⁰ Ndien Moses okop nte kpukpru owo etuade eyet, ke ufɔk, ke ufɔk, kpukpru owo ke usuŋ tent mmɔ: ndien esit ayat Jehovah eti-eti; onyuŋ ɔdiɔk Moses ke enyin.

¹¹ Ndien Moses ɔdɔhɔ Jehovah, ete, Nsinam afo ɔdiɔkde ye owo fo? ndien nsinyuŋ inam musehe mi iso, emi afo emende mbiomo mbio emi kpukpru obiomo mi ke idem?

¹² Nte edi ami ŋkaman kpukpru mbio emi? nte ami ŋkobon mmɔ, eke esinde afo ɔdɔhɔ mi, ete, Kama mmɔ ke ikpanesit fo, kpa nte edep akamade eyennsek, ka ke isɔŋ, emi afo ɔkɔŋwɔŋɔde ɔnɔ mme ete mmɔ?

¹³ Ke mmɔŋ ke ami ndida unam eke nnɔde kpukpru mbio emi? koro mmɔ etuade enɔ mi, ete, Nɔ nnyin unam eke itade.

¹⁴ Ami ŋkwe nte mbiomde kpukpru mbio emi ikpɔŋ: koro mmɔ edobide mbiomo ekan mi.

¹⁵ Ndien edieke afo anamde ntem ye ami, mbɔk, wowot mi, edieke nnemde fi: man ŋkukut idiɔk itie mi.

¹⁶ Ndien Jehovah ɔdɔhɔ Moses, ete, Bon mbiowo Israel, owo ata ye udop nɔ mi, emi afo ɔfiɔkde ete ke mmɔ edi mbiowo mbio emi, ye mme andidaha mmɔ; ndien da mmɔ di ke efe esop, man eda do ye afo.

¹⁷ Ndien nyesuhɔre ndidɔhɔ ye afo do: nyenyuŋ nda ubak spirit emi esinede fi ke idem, nsin mmɔ ke idem; ndien mmɔ eyetiene fi ebiom mbiomo mbio emi, man afo okubiom ke idem fo ikpɔŋ:

¹⁸ Nyuŋ dɔhɔ kpukpru owo, ete, Enam idem mbufo esana ebeŋe mkpɔŋ, ndien mbufo eyeta unam; koro mbufo eketuade Jehovah ke utɔŋ, ete, Anie edinɔ nnyin unam eke itade? koro ɔkɔfɔnde ye nnyin ke Egypt: Jehovah ndien eyenɔ mbufo unam eke etade,

¹⁹ Idige usen kiet ke mbufo edita, inyuŋ idige usen iba, inyuŋ idige usen ition, inyuŋ idige usen duop, inyuŋ idige usen edip;

²⁰ edi ke ofuri ɔfiɔŋ, tutu eyewɔrɔ mbufo ke odudu ibuo, onyuŋ anam mbufo ntek-esit: koro mbufo esuenede Jehovah emi odude ke otu mbufo, enyuŋ etuade eyet ke iso esie, ete, Nsinam nnyin ikɔwɔrɔde ke Egypt?

²¹ Ndien Moses ɔdɔhɔ ete, Mbio emi ami ndude ke otu mmɔ esim tɔsin owo ke itie ikie itiokiet emi esaŋade ke ikpat; ndien afo ɔdɔhɔ ete, Nyenɔ mmɔ unam eke etade ofuri ɔfiɔŋ kiet.

²² Nte eyewot kpukpru ŋkpri ufene ye enaŋ enɔ mmɔ, man ekem mmɔ?

²³ Ndien Jehovah ɔdɔhɔ Moses, ete, Nte ubɔk Jehovah akabare ɔmuhɔ? Ke emi ke afo edikut mme ikɔ mi eyesu ɔnɔ fi, mme isuhɔ.

²⁴ Ekem Moses ɔwɔrɔ eketiŋ ikɔ Jehovah ɔnɔ kpukpru owo, onyuŋ obon mbiowo obio, owo ata ye duop, ndien anam mmɔ eda ekan tent ekuk.

²⁵ Ndien Jehovah etie ke obubit enyɔŋ ɔsuhɔre, edidɔhɔ ye enye, onyuŋ ada ubak spirit emi odude enye ke idem, esin mbiowo ata ye udop oro ke idem: ndien edikem, ke spirit oro odukde mmɔ ke idem, mmɔ etiŋ prophecy, ndien itiŋke aba.

²⁶ Ndien owo iba emi kiet ekerede Eldad, kiet eken onyuŋ ekere Medad, esuk ke nna: ndien spirit oduk mmɔ ke idem; mmɔ enyuŋ edu ke otu mmɔ emi ekewetde, edi ikewɔrɔke ika tent: ndien mmɔ etiŋ prophecy ke nna.

²⁷ Ndien akparawa kiet efehe eketiŋ ɔnɔ Moses, ete, Eldad ye Medad ke etiŋ prophecy ke nna.

²⁸ Ndien Joshua eyen Nun, asaŋa-utom Moses, akparawa esie kiet, ɔbɔrɔ ete, Ɔbɔŋ mi Moses, kpan mmɔ.

²⁹ Ndien Moses ɔdɔhɔ ete, Nte afo ofibe ufup ɔnɔ mi? Ofuri ikɔt Jehovah ekpakam ekabare edi prophet: Jehovah akpakam ɔnɔ mmɔ spirit esie!

³⁰ Ndien Moses ɔnyɔŋ ke nna, ye mbiowo Israel ŋko.

³¹ Ekem ofum oto Jehovah, ada ikukpa ke edem inyaŋ, ayak mmɔ ɔduɔŋɔ ke nna, osim isaŋ usen kiet ke edem emi, onyuŋ osim isaŋ usen kiet ke edem oko, akan nna okuk, ndien mmɔ ena ke isɔŋ nte afara kiet.

³² Ndien kpukpru owo eda ke ofuri uwemeyo, ye ke ofuri okoneyo, ye ke ofuri edem usen, etaŋ ikukpa: ndien owo eke ataŋde se ikpride ikan homer duop, iduhe: ndien mmɔ esuan mmɔ ke idem mmɔ ekan nna ekuk.

³³ Ndien ke ini unam osuk odude mmɔ ke edet, ntem, ke mikaitaha kaŋa, Jehovah ayat esit ikaŋ-ikaŋ ye mmɔ; Jehovah onyuŋ ada ata idiɔk ufen amia mmɔ.

³⁴ Ndien enye osio ebiet oro enyiŋ Kibroth-hattaavah: koro do ke ebuk mbon idiɔk itɔŋ.

³⁵ Edikem mmɔ edaŋa ke Kibroth-hattaavah eka Hazeroth; ndien eduŋ ke Hazeroth.