NUMBERS 10 - Edisana ñwed Abasi Ibom

Mme Ukorowo Silver

¹ NDIEN Jehovah ɔdɔhɔ Moses, ete, Nam ukorowo silver iba nɔ idem fo; nam mmɔ ɔfiɔn-ɔfiɔn;

² ndien da mmɔ kot esop, nyuŋ teme, ete ewuhɔre nna.

³ Ndien ke ini efuride mmɔ yak kpukpru owo esop ke ɔtɔ fo ke enyin-usuŋ efe esop.

⁴ Ndien ema efuri kiet, yak mbɔŋ, mme etubom mme tɔsin Israel, esop idem ke ɔtɔ fo.

⁵ Ndien adaŋemi mbufo eduatde ɔkpɔsɔŋ, yak nna emi odude ke edem usiaha-utin ɔwuhɔre.

⁶ Ndien ŋko ke mbufo etɔŋɔde ntak eduat ɔkpɔsɔŋ, yak nna emi odude ke edem usuk ɔwuhɔre: yak eduat ɔkpɔsɔŋ man edaŋa isaŋ mmɔ.

⁷ Edi ke ini eyomde ndibon kpukpru owo ɔtɔ kiet, mbufo efefuri, edi ekudaduat.

⁸ Ndien edi nditɔ Aaron mme oku edifuri ukorowo oro; yak ana ɔnɔ mbufo ke nsinsi ewuhɔ ke ofuri emana mbufo.

⁹ Ndien ŋko ke adaŋemi mbufo edikade ekɔŋ ke isɔŋ mbufo ye mme asua emi efikde mbufo, mbufo eda ukorowo eduat; ndien Jehovah Abasi mbufo eyeti mbufo, onyuŋ anyaŋa mbufo osio mme asua ke ubɔk.

¹⁰ Ndien ŋko ke usen idara mbufo, ye ke ini usɔrɔ mbufo, ye ke iso ɔfiɔŋ mbufo, mbufo eda ukorowo efuri ebaŋa edifɔp uwa mbufo, ye mme uwa emem mbufo: man mmɔ edi ŋkpɔ eriti mbufo ke iso Abasi mbufo. Ami ndi Jehovah Abasi mbufo.

¹¹ Edikem ke ɔyɔhɔ usen udiana-akpa ɔfiɔŋ edip, ke udiana-akpa isua, obubit enyɔŋ oro odorode ke ebiet-iduŋ ntiense.

¹² Ndien nditɔ Israel edaŋa isaŋ mmɔ ekpɔŋ wilderness a Sinai: ndien obubit enyɔŋ oro atuak ada ke wilderness a Paran.

¹³ Ndien mmɔ ebem iso ewuhɔre ke uyo Jehovah ke ubɔk Moses.

¹⁴ Ɔfɔŋ etak ubom nna nditɔ Judah ebem iso adaha nte mme udim mmɔ edide: ndien Nahshon eyen Amminadab onyuŋ edi etubom ke udim esie.

¹⁵ Nethaneel eyen Zuar onyuŋ edi etubom ke udim esien nditɔ Issachar.

¹⁶ Ndien Eliab eyen Helon edi etubom ke udim esien nditɔ Zebulun.

¹⁷ Ndien esuhɔre ebiet-iduŋ; ndien nditɔ Gershon ye nditɔ Merari ebiom ebiet-iduŋ edaŋa.

¹⁸ Ndien ɔfɔŋ etak ubom nna Reuben adaha nte mme udim mmɔ edide. Elizur eyen Sheduer onyuŋ edi etubom ke udim mmɔ.

¹⁹ Shelumiel eyen Zurishaddai onyuŋ edi etubom ke udim esien nditɔ Simeon.

²⁰ Elisaph eyen Deuel onyuŋ edi etubom ke udim esien nditɔ Gad.

²¹ Ndien mme Kohathite emen edisana ŋkpɔ ebiom edaŋa: ndien mmɔ eken ewuk ebiet-iduŋ, ndien mmɔ (mme Kohathite) ediwɔrɔ.

²² Ndien ɔfɔŋ etak ubom nna nditɔ Ephraim adaha nte mme udim mmɔ edide; Elishama eyen Ammihud onyuŋ edi etubom ke udim mmɔ.

²³ Ndien Gamaliel eyen Pedazur edi etubom ke udim esien nditɔ Manasseh.

²⁴ Abidan eyen Gideoni onyuŋ edi etubom ke udim esien nditɔ Benjamin.

²⁵ Ndien ɔfɔŋ etak ubom nna nditɔ Dan adaha ke ukperedem kpukpru mme nna, nte mme udim mmɔ edide: Ahiezer eyen Ammishaddai onyuŋ edi etubom ke udim mmɔ.

²⁶ Ndien Pagiel eyen Ochran edi etubom ke udim esien nditɔ Asher.

²⁷ Ndien Ahira eyen Enan edi etubom ke udim esien nditɔ Naphtali.

²⁸ Ntem ke nditɔ Israel ewuhɔre nte mme udim mmɔ edide, adaŋemi mmɔ ewuhɔrede.

²⁹ Ekem Moses ɔdɔhɔ Hobab, eyen Reuel Midianite, ukot Moses, ete, Nnyin imɔŋ isaŋa ika ebiet emi Jehovah ɔkɔdɔhɔde, ete, Nyeda enye nnɔ mbufo: saŋa ye nnyin, ndien nnyin iyefɔn ye afo: koro Jehovah ɔmɔdɔhɔ se ifɔnde abaŋa Israel.

³⁰ Ndien enye ɔdɔhɔ enye, ete, Ndige: edi nyefiak ke isɔŋ mi, ye ke oruk mi.

³¹ Ndien enye ɔdɔhɔ, ete, Mbɔk, kukpɔŋ, nnyin; koro afo ɔfiɔkde ebiet eke nnyin inamde nna ke wilderness, afo eyenyuŋ edi enyin nnyin.

³² Ama ekem, ke afo asaŋade ye nnyin, nnyin iyeda mfɔn emi Jehovah edifɔnde ye nnyin, ifɔn ye afo ŋko.

³³ Ekem mmɔ edaŋa ke obot Jehovah, esaŋa isaŋ usen ita; ekebe ediomi Jehovah onyuŋ ebem mmɔ iso ke isaŋ usen ita, ndiyom ebiet nna nnɔ mmɔ.

³⁴ Ndien obubit enyɔŋ Jehovah odoro mmɔ ke uwemeyo, ke ini mmɔ edaŋade ke ebiet nna.

³⁵ Edikem, ke ini ekebe adahade, Moses ɔdɔhɔ ete, Daha ke enyɔŋ, O Jehovah, nyuŋ yak mme asua fo esuana; yak mmɔ eke esuade fi enyuŋ efeŋe itɔk ke iso fo.

³⁶ Ndien adaŋemi enye adade, enye ɔdɔhɔ, ete, O Jehovah, fiak tiene uwak mme tɔsin Israel.