ŊWED MME PSALM 92 - Edisana ñwed Abasi Ibom

Ikwɔ Itoro ke Mfɔn Abasi

Psalm. Ikwɔ. Ke eke usen sabbath.

¹ ƆFƆN ndikɔm Jehovah, nnyuŋ ŋkwɔ enyiŋ fo, O Ata Edikoŋ:

² ndibuk ima fo ke usenubɔk, ye akpanikɔ fo ke okoneyo, ke ndido uruk duop,

³ ye ke psaltery, ye ke uyom harp.

⁴ Koro afo, O Jehovah, amadat mi esit ke utom fo: nyedara ke se ubɔk fo anamde.

⁵ O Jehovah, se afo anamde okpon didie! Ekikere fo emetuŋɔ eti-eti.

⁶ Owo ndutun ifiɔkke; ndisime inyuŋ itimke ikut emi.

⁷ Ke ini mme oburobut owo efiaride nte mbiet, ndien ke kpukpru mme anam-idiɔk esiahade, eyesobo mmɔ ke nsinsi.

⁸ Edi afo, O Jehovah, omokoŋ ke nsinsi.

⁹ Koro sese, mme asua fo, O Jehovah, koro, sese, eyesobo mme asua fo; kpukpru mme anam-idiɔk eyesuana.

¹⁰ Edi afo eyemenere nduk mi ke enyɔŋ nte eke editim: mmeyere obufa aran.

¹¹ Ndien enyin mi eyese mme asua mi, utɔŋ mi eyenyuŋ okop mme idiɔk owo emi enamde ikɔ ye ami.

¹² Edinen owo eyesiaha nte eyop: onyuŋ ɔkɔri nte cedar ke Lebanon.

¹³ Emetɔ mmɔ ke ufɔk Jehovah; mmɔ eyesiaha ke okure Abasi nnyin.

¹⁴ Eyesuk ekɔri ke usɔŋ, eyesehe enyuŋ esiak ikɔŋ.

¹⁵ Man ewut ete ke Jehovah enenen: enye edi akwa itiat mi, ndien ukwaŋ-ŋkpɔ iduhe enye ke esit.