ŊWED MME PSALM 91 - Edisana ñwed Abasi Ibom

Owo Eke Odude ke Mfut Ata Ɔkpɔsoŋ

Akam Moses owo Abasi.

¹ OWO eke etiede ke ndibe ebiet Ata Edikoŋ, ke oduŋ ke mfut Ata Ɔkpɔsɔŋ.

² Nyedɔhɔ Jehovah, nte, Ubɔhɔ mi, ye ɔkpɔsɔŋ ebiet mi; Abasi mi, nyebuɔt idem mi ye enye.

³ Koro enye eyesio fi ke afia ata-ikɔt, ye ke udɔŋɔ nsobo.

⁴ Enye eyeda ntaŋ esie ofuk fi, afo eyenyuŋ efehe oduk ke idak mba esie: akpanikɔ esie edi otu-ekɔŋ eke ekpemede fi.

⁵ Afo udufeheke ŋkpɔ ndik ke okoneyo, ye idaŋ eke efede ke uwemeyo;

⁶ ye idiɔk udɔŋɔ eke asaŋade ke ekim; ye nsobo eke abiatde ke ufɔt uwemeyo.

⁷ Tɔsin owo eyeduɔŋɔ fi ke ŋkaŋ, ye tɔsin duop ke ubɔk nnasia fo; edi idisimke fi.

⁸ Afo eyekut ke enyin ikpɔŋ-ikpɔŋ, onyuŋ okut usiene mme oburobut owo.

⁹ Koro afo, Jehovah, edide ebiet ubɔhɔ mi,

¹⁰ Afo omonim Ata Edikoŋ ke ebiet iduŋ fo. Baba idiɔk-ŋkpɔ idisimke fi, ufen idinyuŋ isaŋake ikpere iduk ke ataya fo.

¹¹ Koro enye eyewuk mme angel esie abaŋa fi, ete ekpeme fi ke kpukpru usuŋ fo.

¹² Mmɔ eyekama fi ke ubɔk mmɔ, mbak afo edituak ukot fo ke itiat.

¹³ Afo eyedigi lion ye ibɔm: eyetim akparawa lion ye dragon.

¹⁴ Koro enye adianade mi, ndien nyanam enye ɔbɔhɔ; nyemenere enye nnim ke enyɔŋ, koro enye ɔfiɔkde enyiŋ mi.

¹⁵ Enye eyeseme ɔnɔ mi, ndien nyeyere enye. Nda ye enye ke itie ukut; nyenyaŋa enye, nnyuŋ ŋkpono enye.

¹⁶ Nyeda ediwak usen nyuhɔ enye, nnyuŋ ŋwut enye erinyaŋa mi.