ŊWED MME PSALM 90 - Edisana ñwed Abasi Ibom

Abasi Odu ke Nsinsi, Owo Edi Mmeme Ŋkpɔ

Akam Moses owo Abasi.

¹ O ƆBƆŊ, afo edi ebiet iduŋ nnyin ke ofuri emana.

² Ke ini ikpɔ obot mika-imanake kaŋa, ke afo muka-ubotke kaŋa isɔŋ ye ererimbot, kpa ke nsinsi-nsinsi afo edi Abasi.

³ Afo anam owo afiak ke ntan; onyuŋ ɔdɔhɔ ete, Mbufo, nditɔ owo, efiak (ke ntan).

⁴ Koro afo abatde tɔsin isua nte mkpɔŋ ke ini enye ebede, ye nte efen ke okoneyo.

⁵ Afo ada ukwɔ emen mmɔ efep; mmɔ etie nte idap.

⁶ Ɔkɔri ke usenubɔk nte mbiet; ke usenubɔk ke enye otibe, ndien ɔkɔri; ke mbubreyo ke esibe enye efep, ndien enye akpa.

⁷ Koro iyaresit fo esinde nnyin itak; ifuresit fo onyuŋ esin nsia oyomo nnyin.

⁸ Afo omonim mme idiɔk ido nnyin ke iso fo; onim ndibe-ndibe ŋkpɔ nnyin ke uŋwana iso fo.

⁹ Koro kpukpru mme usen nnyin ekabarede edaha ke iyaresit fo: nnyin ima isua nnyin nte ekikere kiet.

¹⁰ Isua ata ye duop edu ke eyo uwem nnyin, ye isua anaŋ, edieke nsɔŋidem odude; ndien iseri mmɔ edi ɔkpɔsɔŋ utom ye ukut: koro enye (isua) awarade ndibe, ndien nnyin idaŋa.

¹¹ Anie owo ɔfiɔk odudu iyaresit fo, ye ifuresit fo, nte ekemde ke uteŋe fo?

¹² Nam nnyin ifiɔk ndibat usen nnyin ntem, man nnyin ida esit ifiɔk idi.

¹³ Fiak di, O Jehovah, adaŋa didie! Nyuŋ tua mkpɔfiɔk baŋa ikɔt fo.

¹⁴ Nɔ nnyin ima fo ke usenubɔk yuhɔ; ndien esit eyedat onyuŋ enem nnyin ke ofuri uwem nnyin.

¹⁵ Dat nnyin esit nte mme usen emi afo ɔtuhɔde nnyin esaŋade, ye mme isua emi nnyin ikutde idiɔk.

¹⁶ Da se afo anamde wut ikɔt fo; nyuŋ wut nditɔ mmɔ uyai fo.

¹⁷ Ndien nam uyai Jehovah Abasi nnyin odoro nnyin ke idem: nyuŋ nam se ubɔk nnyin enamde ɔsɔŋɔ ada ye nnyin: nyuŋ nam se ubɔk nnyin enamde ɔsɔŋɔ ada.