ŊWED MME PSALM 85 - Edisana ñwed Abasi Ibom

Ndibeŋe Mbɔm Abasi Nnɔ Idut

Eke etubom mbon ikwɔ. Eke nditɔ Korah. Psalm.

¹ O JEHOVAH, afo ɔmɔfɔn ido ye isɔŋ fo: amafiak etiene nditɔ Jacob emi eketaŋde efep.

² Amadahado ke idiɔk ido ikɔt fo, omofuk kpukpru mme ukwaŋ-ŋkpɔ mmɔ. [Selah.]

³ Afo omosio ofuri ifuresit fo efep: amakabare ɔkpɔŋ ikaŋ iyaresit fo.

⁴ Fiak tiene nnyin, O Abasi erinyaŋa nnyin; nyuŋ tre iyaresit fo ye nnyin.

⁵ Nte afo ediyat esit ye nnyin ke nsinsi?

⁶ Nte afo edinam iyaresit fo osim kpukpru emana? Nte afo udutɔŋɔke ntak udemere nnyin, man ikɔt fo ekpedara fi?

⁷ Nam nnyin ikut ima fo, O Jehovah, nyuŋ nɔ nnyin erinyaŋa fo.

⁸ Nyekop se Abasi Jehovah edidɔhɔde: koro enye eyedɔhɔ emem-emem ye ikɔt esie, ye mbon-ima esie: edi kuyak mmɔ efiak edem ke ndisime.

⁹ Erinyaŋa esie emekpere mmɔ eke ebakde enye ikpɔŋ-ikpɔŋ, man ubɔŋ oduŋ ke edem nnyin.

¹⁰ Ima ye akpanikɔ emesobo ɔtɔ kiet; erinen ye emem emetim kiet eken inua.

¹¹ Akpanikɔ omotibe ke isɔŋ; ndien edinen ido etie ke heaven otuk iso esie.

¹² Jehovah eyenyuŋ ɔnɔ se ifɔnde; ndien isɔŋ nnyin eyenɔ mbuŋwum esie.

¹³ Edinen ido eyesaŋa enye ke iso; eyenyuŋ esin nnyin ke usuŋ ikpat esie.