ŊWED MME PSALM 81 - Edisana ñwed Abasi Ibom

Mfɔnido Abasi ye Nsɔŋibuot Nditɔ Israel

Eke etubom mbon ikwɔ. Asaŋa ye Gittith. Eke Asaph. Eke etubom mbon ikwɔ, asaŋa ye Gittith. Eke Asaph.

¹ MBUFO emenere uyo ekwɔ enɔ Abasi odudu nnyin: esio mkpo idara enɔ Abasi Jacob.

² Emen ikwɔ, enyuŋ etuak esima, edinem harp ye psaltery.

³ Mbufo efuri ukorowo ke obufa ɔfiɔŋ, ke ɔyɔhɔ ɔfiɔŋ, ke usen usɔrɔ nnyin.

⁴ Koro emi edide ewuhɔ Israel, ye ido Abasi Jacob.

⁵ Enye onim enye ke ikɔ ntiense ke Joseph, ke ini enye ɔwɔrɔde asaŋa ke isɔŋ Egypt: ŋkop usem eke mmemfiɔkke.

⁶ Mbiomore enye mbiomo ke afara; ubɔk esie ekpɔŋ akpasa.

⁷ Afo ekeseme ke itie ukut, ndien mbabare fi: ntie ke itie udibe obuma nyere fi: Ndomo fi ke ɔtɔ mmɔŋ Meribah. [Selah.]

⁸ Mbufo ikɔt mi ekop, ndien nyewuk mbufo: O Israel, mbufo ema ekop uyo mi;

⁹ ekuyak esen abasi odu ke otu mbufo; eku nyuŋ etuak ibuot enɔ abasi idut.

¹⁰ Ami ndi Jehovah Abasi mbufo, emi ŋkadade mbufo ke Egypt ndɔk: mbufo eŋwaŋa inua mbufo ndien nyesin ŋkpɔ ke esit nyɔhɔ.

¹¹ Edi ikɔt mi ikopke uyo mi: Israel inyuŋ inyimeke inɔ mi.

¹² Ndien nyak mmɔ nnɔ nsɔŋesit mmɔ: mmɔ esaŋa ke uduak idem mmɔ.

¹³ Ikɔt mi ekpekam ekop uyo mi, Israel ekpekam enyuŋ esaŋa ke usuŋ mi!

¹⁴ Ŋkpawara ndinam mme asua mmɔ esuhɔre idem mmɔ, ŋkponyuŋ ŋkabare ubɔk mi nnam mme asua mmɔ.

¹⁵ Mmɔ eke esuade Jehovah ekpenem inua enɔ enye; ndien eyo mmɔ ekpebigi ke nsinsi.

¹⁶ Enye okponyuŋ ɔnɔ mmɔ ata eti wheat edia: ŋkponyuŋ nsio aran-ɔkwɔk ke akwa itiat nnɔ fi ɔyuhɔ.