ŊWED MME PSALM 75 - Edisana ñwed Abasi Ibom

Abasi Ɔsɔsuhɔre Idiɔk Owo Onyuŋ Emenere Edinen Owo

Eke etubom ikwɔ. Kusobo. Psalm Asaph. Ikwɔ.

¹ NNYIN ikwɔ fi, O Abasi; nnyin ikɔm fi: enyiŋ fo omonyuŋ ekpere; mmɔ ebuk mme utibe ŋkpɔ fo.

² Koro nyeda ini enimde; nyekpe ikpe nte enende.

³ Isɔŋ ye kpukpru mme andiduŋ ke esit emetara: ntim ŋwuk mme adaha esie. [Selah.]

⁴ Mmɔdɔhɔ mbon iseri, nte, Mbufo ekuseri iseri: (mmonyuŋ ndɔhɔ) mme idiɔk owo, nte, Mbufo ekumenere nduk ke enyɔŋ.

⁵ Ekumenere nduk mbufo enim ke edikoŋ ebiet: ekudɔhɔ ke itɔŋ iseri.

⁶ Koro uforo mitoho ke edem usiaha-utin, minyuŋ itoho ke edem usop-utin, minyuŋ itoho ke wilderness ikpɔ obot.

⁷ Koro edi Abasi ekpe ikpe: enye ɔsuhɔre owo kiet, onyuŋ ofori owo eken.

⁸ Koro cup odude Jehovah ke ubɔk; wine onyuŋ ofut mbuaha ɔyɔhɔ ke esit; enye onyuŋ ada enye ɔtɔhɔ: kpu-kpru mme idiɔk owo ke ererimbot enyene ndikɔrɔde nnyuŋ ŋŋwɔŋ ntak esie.

⁹ Edi ama edi ami, nyebuk mbuk ke nsinsi; nyekwɔ ikwɔ nnɔ Abasi Jacob.

¹⁰ Nyenyuŋ nsibe kpukpru nduk mme idiɔk owo mfep, edi eyemenere nduk nti owo enim ke enyɔŋ.