ŊWED MME PSALM 73 - Edisana ñwed Abasi Ibom

Edinen Ikpe Abasi

Psalm Asaph.

¹ ABASI osuk ɔfɔfɔn ido ye Israel, kpa ye mmɔ emi esit mmɔ asanade.

² Edi ama edi ami, osuk esisit ukot ɔkpɔfiɔnɔre mi; osuk ata esisit ikpat ekpefebede mi.

³ Koro ŋkefibede mbon iseri ufup, ŋkut ifure mme idiɔk owo.

⁴ Koro ndutuhɔ miduhe ke ini mkpa mmɔ: odudu mmɔ onyuŋ ɔsɔŋ.

⁵ Mmɔ ikwe ukut owo; inyuŋ itukke mmɔ nte owo efen.

⁶ Oro esin iseri abana mmɔ itɔŋ nte ŋkwa: edisine-ŋkpɔ nnama onyuŋ ofuk mmɔ.

⁷ Ubom esin enyin mmɔ ekpon: ekikere esit mmɔ ebe ɔwɔrɔ.

⁸ Mmɔ esak nsahi, enyuŋ edɔhɔ idiɔk: etie ke enyɔŋ etiŋ ufik.

⁹ Enim inua mmɔ ese enyɔŋ, edeme mmɔ onyuŋ asaŋa ke ererimbot.

¹⁰ Oro esin enye ada ikɔt esie afiak ken: mmɔ enyuŋ eŋwɔŋ mmɔŋ eyuhɔ,

¹¹ Ndien mmɔ edɔhɔ ete, Abasi edida nso ɔfiɔk? Mme ifiɔk onyuŋ odu ye Ata Edikoŋ?

¹² Sese, mme mmɔ emi edi mme idiɔk owo, ndien mmɔ etie ke ifure kpukpru ini, mmɔ ekɔ inyene.

¹³ Mmanam esit mi asana ikpikpu ikpikpu, monyuŋ nyet ubɔk mi ke edisana ido.

¹⁴ Ndien ŋkut ufen ofuri usen, enyuŋ etunɔ mi ke usenubɔk.

¹⁵ Mma ŋkpɔdɔhɔ nte, “Nyebuk ntem”; sese, ŋkpanam abiaŋa-abiaŋa ye emana nditɔ fo.

¹⁶ Ndien ntie ŋkere man mfiɔk ŋkpɔ emi; nse enye ke ŋkpɔ ukut,

¹⁷ tutu ndiduk ke edisana ebiet Abasi; nyefiɔk utit mmɔ.

¹⁸ Afo odori mmɔ kpa ke mfɔfiɔnɔ ebiet: ɔduɔk mmɔ ke nditaha.

¹⁹ Didie ke mmɔ ekabare edi ŋkpɔ nsobo ke idaha kiet! Mmɔ emekure ke akpakop ŋkpɔ ndik.

²⁰ Nte ndap ke ntop-ndemere; Ɔbɔŋ, afo eyesin mbiet mmɔ ke ndek, ke ini afo edemerede.

²¹ Koro ekeyayat mi esit, enyuŋ ekim mi ke ekput.

²² Ami nnyuŋ ndi ndisime, nnyuŋ mfiɔkke ŋkpɔ; ntie nte unam ye afo.

²³ Edi ami nsuk ndodu ye afo kpukpru ini: afo omum mi ubɔk nnasia.

²⁴ Afo eyeda mi usuŋ ke item fo, ndien ama ekem, eyeda mi edisim ke ubɔŋ.

²⁵ Ami nnyene anie ke enyɔŋ?

²⁶ Baba kiet ke isɔŋ inyuŋ inemke mi nte afo. Obukidem mi ye esit mi emekure: Abasi edi akwa itiat esit mi, ye udeme mi ke nsinsi.

²⁷ Koro, sese, mmɔ eke edianarede ekpɔŋ fi anyan usuŋ, eyetak: afo omosobo mmɔ eke ekpɔŋde fi enam use.

²⁸ Edi ama edi ami, ɔfɔn mi ndikpere Abasi: mberedem ye Ɔbɔŋ Jehovah, man mbuk kpukpru mme utibe ŋkpɔ fo.