ŊWED MME PSALM 71 - Edisana ñwed Abasi Ibom

Akam Owo Emi Ama Ɔkɔsɔŋ

¹ MMƆBUƆT idem ye afo, O Jehovah; kuyak mi ŋkut but ke nsinsi.

² Da utebe-ikpe fo sio mi, nyuŋ nam mi mbɔhɔ: kpaŋ mi utɔŋ fo nyuŋ nyaŋa mi.

³ Nim idem fo nɔ mi nte akwa itiat iduŋ, eke ŋkade do kpukpru ini: afo omowuk ete enyaŋa mi; koro afo edide akwa itiat mi ye ɔkpɔsɔŋ ufɔk mi.

⁴ O Abasi mi, nam mi mbɔhɔ idiɔk owo ke ubɔk, ke ita anam-idiɔk ye eke owo nnama.

⁵ Koro afo, O Ɔbɔŋ Jehovah, edide idori-enyin mi; ye iberedem mi, ɔtɔŋɔde ke ini uyen mi.

⁶ Mma mbere edem ye afo toto ŋkamamana: afo ama ɔkɔ mi nte ŋkoto eka mi ke idibi: itoro mi odu fi ke idem kpukpru ini.

⁷ Mmetie nte ŋkpɔ eke ediwak owo eyikde: edi afo edi ɔkpɔsɔŋ ebiet ubɔhɔ mi.

⁸ Itoro fo eyeyɔhɔ mi ke inua, ye uyai fo ofuri usen.

⁹ Kumen mi ke ini usɔŋ uduɔk; kukpɔŋ mi ke ini odudu eyemerede mi.

¹⁰ Koro mme asua mi edɔhɔde mi, mmɔ eke eyomde ukpɔŋ mi enyuŋ eduk odu ɔtɔ kiet, ete,

¹¹ Abasi ɔmɔkpɔŋ enye: mbufo ebine enye enyuŋ emum enye: koro owo eke anyaŋade miduhe.

¹² O Abasi, kukpɔŋ mi anyan usuŋ; Abasi mi, wara di nyaŋa mi.

¹³ Mmɔ eke esuade ukpɔŋ mi eyeda esuene enyuŋ ekpa: but ye esuene eyefuk mmɔ eke eyomde mi idiɔk.

¹⁴ Edi ami nyedori enyin kpukpru ini, nnyuŋ nnam ofuri itoro fo ɔdɔdiɔŋ aka iso.

¹⁵ Inua mi eyebuk mfɔnido fo, ye erinyaŋa fo ofuri usen: koro mmemfiɔkke ibat mmɔ.

¹⁶ Nyeda ese Ɔbɔŋ Jehovah ndi; nyetiŋ eti ido fo, kpa okuo ikpɔŋ-ikpɔŋ.

¹⁷ O Abasi, afo ama eteme mi toto ŋkedi eyenɔwɔŋ: ndien nsiak mme utibe ŋkpɔ fo tutu osim ini emi.

¹⁸ Ndien ŋko, O Abasi, kukpɔŋ mi tutu nsim usɔŋ ye iwat, tutu nsiak ubɔk fo nnɔ emana emi, nsiak odudu fo nnɔ kpukpru mmɔ eke edidide.

¹⁹ Ndien O Abasi, eti ido fo osim ke enyɔŋ, afo emi anamde ikpɔ ŋkpɔ: O Abasi, anie ebiet fi?

²⁰ Afo emi anamde nnyin ikut ikpɔ ye mme idiɔk ukut, eyenam nnyin itɔŋɔ ntak idu uwem, onyuŋ anam nnyin itɔŋɔ ntak ito ke edituŋɔ ebiet isɔŋ idɔk.

²¹ Afo eyenam ubom mi okpon, onyuŋ afiak edidɔŋ mi esit.

²² Ami ŋko nyekɔm, fi, ye akpanikɔ fo, ke psaltery, O Abasi mi: nyeda harp ŋkwɔ nnɔ fi, O Edisana Abasi Israel,

²³ Mkpɔk-inua mi eyedara: koro nyekwɔ nnɔ fi, ukpɔŋ mi emi afo afakde eyenyuŋ ɔkwɔ.

²⁴ Edeme mi ŋko eyetiŋ eti ido fo ofuri usen, koro but ye esuene enamde mmɔ eke eyomde mi idiɔk.