ŊWED MME PSALM 7 - Edisana ñwed Abasi Ibom

Akam Ndiyom Unen Ikpe

Shiggaion David emi enye ɔkwɔde ɔnɔ Jehovah abaŋa uyo Cush eyen Benjamin.

¹ JEHOVAH Abasi mi, mmɔbuɔt idem ye afo; nyaŋa mi sio kpukpru mme andikɔbɔ mi ke ubɔk, nyuŋ babare mi mbaba:

² mbak enye ediwai ukpɔŋ mi nte lion, awai mbak-mbak, ndien owo eke anyaŋade iduhe.

³ O Jehovah Abasi mi, edieke ŋkanamde ŋkpɔ emi; edieke ukwaŋ-ŋkpɔ odude mi ke ekaubɔk;

⁴ edieke ndade idiɔk nsio usiene nnɔ ufan mi; nnyuŋ mbumede owo eke otukde mi ke ikpikpu:

⁵ yak usua ebine ukpɔŋ mi, onyuŋ osim, onyuŋ edigi uwem mi adian ke ntan, onyuŋ anam ubɔŋ mi ana ke ntɔŋ. [Selah.]

⁶ O Jehovah, daha ke enyɔŋ ke iyaresit fo, men idem fo ke otu ifuresit mme asua mi: nyuŋ demere baŋa mi: afo omonim ikpe.

⁷ Ndien esop mme idut eyekan fi ekuk: fiak, ndien kada ke enyɔŋ mmɔ ke edikoŋ ebiet.

⁸ Jehovah eyekpe ikpe kpukpru owo: domo mi, O Jehovah, nte ekemde ye eti ido mi, ye mfɔn-mma mi emi ofukde mi ke idem.

⁹ Mbɔk, nam idiɔk ido mme idiɔk owo etre, nyuŋ nam edinen owo ɔsɔŋ ada: afo, edinen Abasi, onyuŋ odomo esit ye ekput.

¹⁰ Otu-ekɔŋ mi odoro Abasi ke idem, emi anyaŋade mbon esit akpanikɔ.

¹¹ Abasi ekpe ikpe edinen owo; Abasi onyuŋ ayat esit (ye mme idiɔk owo) kpukpru usen.

¹² Edieke enye (usua) mikabakere, Enye eyeban ofut esiemɔ; Enye ɔmɔkɔk utiga esie, onyuŋ otim enye.

¹³ Omonyuŋ eket enye ŋkpɔ mkpa; eyenam idaŋ esie esak nte ikaŋ.

¹⁴ Sese, enye enyene idibi idiɔk ŋkpɔ; oyomo ibak, onyuŋ aman nsu ŋko.

¹⁵ Enye otibi obube, onyuŋ otuŋ enye, ndien ɔduɔ ke ukpe emi enye anamde.

¹⁶ Ibak esie eyefiak ɔtɔ enye ke ibuot, afai esie eyenyuŋ ɔduɔ enye ke etiŋ-ibuot.

¹⁷ Nyekɔm Jehovah nte ekemde ye edinen ido esie: nnyuŋ ŋkwɔ enyiŋ Jehovah Ata Edikoŋ.