ŊWED MME PSALM 67 - Edisana ñwed Abasi Ibom

Yak Mme Idut Ekɔm Abasi

Eke etubom mbon ikwɔ; asaŋa ye ndido uruk. Psalm. Ikwɔ.

¹ O YAK Abasi atua nnyin mbɔm, onyuŋ ɔdiɔŋ nnyin; onyuŋ anam iso esie ayama ɔnɔ nnyin. [Selah.]

² Man efiɔk usuŋ fo ke isɔŋ, efiɔk erinyaŋa fo ke otu kpukpru mme idut.

³ O Abasi, yak mme idut ekɔm fi; yak kpukpru mme idut ekɔm fi.

⁴ Yak mme obio edara enyuŋ ekwɔ: koro afo eyekpe ikpe mme idut nte enende, onyuŋ akama mme obio ke isɔŋ. [Selah.]

⁵ O Abasi, yak mme idut ekɔm fi, yak kpukpru mme idut ekɔm fi.

⁶ Isɔŋ omoŋwum mbuŋwum esie; Abasi, kpa Abasi nnyin eyediɔŋ nnyin.

⁷ Abasi eyediɔŋ nnyin; ndien kpukpru mme idut ererimbot eyebak enye.