ŊWED MME PSALM 66 - Edisana ñwed Abasi Ibom

Ekɔm Abasi ke Mme Ikpɔ Ŋkpɔ Emi Enye Anamde

Eke etubom mbon ikwɔ. Ikwɔ Psalm.

¹ MBUFO ofuri ekondo, esio mkpo idara enɔ Abasi.

² Ekwɔ ubɔŋ enyiŋ esie: enim itoro esie ke ŋkpɔ ubɔŋ.

³ Edɔhɔ Abasi, ete, Se afo anamde enyene ndik adaŋa didie! Akwa odudu fo esin mme asua fo enem inua enɔ fi.

⁴ Ofuri ekondo eyenuhɔ enɔ fi, enyuŋ ekwɔ enɔ fi; mmɔ eyekwɔ enyiŋ fo. [Selah.]

⁵ Mbufo eka ekese utom Abasi; se enye anamde abaŋa nditɔ owo enyene ndik.

⁶ Enye ama akabare akwa mmɔŋ anam asat: mmɔ eda ikpat esaŋa ke akwa mmɔŋ ebe: do ke nnyin idara enye.

⁷ Enye ada odudu esie akara ke nsinsi; enyin esie ese ke otu mme idut: ekuyak mbon nsɔŋibuot ekok idem. [Selah.]

⁸ Mbufo mbio-obio, ekɔm Abasi nnyin, enyuŋ enam ekop uyo itoro esie:

⁹ emi onimde ukpɔŋ nnyin ke uwem, ndien iyakke ukot nnyin esehere.

¹⁰ Koro afo odomode nnyin, O Abasi: omoduk nnyin, kpa nte edukde silver.

¹¹ Afo akada nnyin esin ke iyire; ada edidobi ŋkpɔ odori nnyin ke isin.

¹² Afo ayak owo odoro nnyin ke ibuot; nnyin ikoduk ke ikaŋ ye ke mmɔŋ: ndien afo ada nnyin ɔwɔrɔ ɔnɔ ediwak inyene.

¹³ Nyeda edifɔp uwa nduk ke ufɔk fo: nnyuŋ nnɔ fi akaŋa mi.

¹⁴ Emi mkpɔk-inua mi eketiŋde, uyo mi okonyuŋ asiakde ke ini ami ntiede ke itie ukut.

¹⁵ Nyeda edisehe ufene ye incense okukim mfɔp nnɔ fi mfuri; nyewa enaŋ ye okpo ebot. [Selah.]

¹⁶ Kpukpru mbufo emi ebakde Abasi, edi edikop, ndien nyesian mbufo se enye akanamde ye ukpɔŋ mi.

¹⁷ Ŋkada inua mi mfiori ŋkot enye, ikwɔ itoro onyuŋ odu mi ke idak edeme.

¹⁸ Mma ŋkpokut idiɔk ido ke esit mi, Ɔbɔŋ ikpokopke:

¹⁹ edi Abasi omokop ke akpanikɔ; omonyuŋ akpaŋ utɔŋ ke uyo mkpe-ubɔk mi.

²⁰ Ekɔm Abasi emi minukke mkpe-ubɔk mi ifep, minyuŋ ibɔhɔ mi ima esie.