ŊWED MME PSALM 62 - Edisana ñwed Abasi Ibom

Ikwɔ Ɔyɔhɔ mbuɔridem ke Abasi Ikpɔŋ Ikpɔŋ

Eke etubom mbon ikwɔ; eke Jeduthun. Psalm David.

¹ UKPƆŊ mi odop ɔnɔ Abasi ikpɔŋ-ikpɔŋ: erinyaŋa mi oto enye.

² Edi enye ikpɔŋ-ikpɔŋ edi akwa itiat mi ye erinyaŋa mi; ye ebiet ubɔhɔ mi; ndifumke eti-eti.

³ Mbufo edisuk ekpot ye owo adaŋa didie? Nte mbufo kpukpru emɔŋ ewot enye, ebiet ibibene eke ebehede, ye ɔkɔ eke ɔnyuhɔde.

⁴ Mmɔ eduak ndinuk enye kpa ke uforo esie mfep: ema abiaŋa: eda mkpɔk-inua mmɔ ekɔm, edi esuŋi ke esit mmɔ. [Selah.]

⁵ O ukpɔŋ mi, dop nɔ Abasi ikpɔŋ-ikpɔŋ: koro idorienyin mi otode enye.

⁶ Enye ikpɔŋ ikpɔŋ edi akwa itiat mi ye erinyaŋa mi, ye ebiet ubɔhɔ mi; ndisehekede.

⁷ Erinyaŋa mi ye ubɔŋ mi edoro Abasi ke idem: ɔkpɔsɔŋ itiat mi ye ubɔhɔ mi edu ke Abasi.

⁸ Mbufo kpukpru owo, ebuɔt idem ye enye kpukpru ini; enwaŋa esit mbufo ke iso esie: Abasi edi ebiet ubɔhɔ nnyin. [Selah.]

⁹ Mbon ubuene edi kpasuk ikpikpu: mbon inyene edi nsu: esine ke balance, eyedɔk: mmɔ edi ata ikpikpu ŋkpɔ.

¹⁰ Mbufo ekubuɔt idem ke ufik, ekunyuŋ ebure ke mbume: ke ini inyene etɔtde, mbufo ekusin esit ke mmɔ.

¹¹ Abasi ɔdɔhɔ ini kiet; mmaŋkop emi utim ikaba, ete ke Abasi emenyene odudu;

¹² ete ke afo, Ɔbɔŋ, omonyuŋ enyene ima, koro ɔnɔde owo ekem ye se owo anamde.