ŊWED MME PSALM 61 - Edisana ñwed Abasi Ibom

Nsɔŋɔ nda ke Upeme Abasi

Eke etubom mbon ikwɔ. Asaŋa ye ndido uruk. Eke David.

¹ O ABASI, kop eseme mi; kpaŋ utɔŋ ke akam mi.

² Nyetie ke utit ererimbot mfiori ŋkot fi, ke ini esit mi ɔfuhɔde: da mi ka akwa itiat emi okoŋde akan mi.

³ Koro afo ekedide ebiet ubɔhɔ mi, ye ɔkpɔsɔŋ tower eke ndade mbɔhɔ mme asua.

⁴ Nyeduŋ ke tent fo ke nsinsi: nyedibe ke mfut mba fo. [Selah.]

⁵ Koro afo, O Abasi, okopde akaŋa mi: Afo ada udeme mmɔ eke ebakde enyiŋ fo ɔnɔ mi.

⁶ Afo eyeda usen ɔkɔrɔ ke usen edidem: isua esie eyetie nte ediwak emana.

⁷ Enye eyetie ke nsinsi ke iso Abasi; O nim ima ye akpanikɔ eke edikpemede enye.

⁸ Ntre ke ndikwɔ enyiŋ fo ke nsinsi, nnyuŋ nnɔ akaŋa mi kpukpru usen.