ŊWED MME PSALM 60 - Edisana ñwed Abasi Ibom

Ndibeŋe Abasi Uŋwam Nnɔ Idut ke Ini Mme Asua Ekande Mmɔ

Eke etubom mbon ikwɔ. Asaŋa ye mme lily ikɔ ntiense. Michtam David. Eke ekpekpepde. Adaŋemi enye aŋwanade ekɔŋ ye Aram-naharaim, ye Aram-zobah, ke ini Joab afiak-de aka okowot Edom ke itihere inuŋ, owo tɔsin duopeba.

¹ O ABASI, afo ɔkɔduɔk nnyin, onyuŋ asuan nnyin; afo akayat esit: afo eyetɔŋɔ ntak ɔnɔ nnyin ŋkpɔ.

² Afo enyene isɔŋ, onyuŋ asiak enye; diɔŋ ŋwure esie; koro enye eseherede.

³ Afo okowut ikɔt fo nsɔŋido: akanam nnyin iŋwɔŋ wine eke esinde owo eteŋ.

⁴ Afo amada banner ɔnɔ mmɔ eke ebakde fi, man emenere enye ke enyɔŋ ebaŋa akpanikɔ. [Selah.]

⁵ Man ikɔt ima fo ebɔhɔ, nyaŋa ke nnasia fo, nyuŋ yere nnyin.

⁶ Abasi ɔkɔdɔhɔ ke edisana ido esie; ete, Nyedara, nyebahare Shechem nnyuŋ ndemere itihere Succoth.

⁷ Gilead edi okim, Manasseh onyuŋ edi okim; Ephraim ŋko onyuŋ edi odudu ibuot mi; Judah edi owuk-ewuhɔ mi;

⁸ Moab edi akpaŋkpaŋ-uyet-ukot mi; nyetop ikpa-ukot mi nnɔ Edom: Philistia, sio mkpo idara baŋa mi.

⁹ Anie edida mi aka ke obio ibibene? Anie edida mi osim Edom? Nte idige afo,

¹⁰ O Abasi, emi ekemende nnyin ɔduɔk, ndien muwɔrɔke, O Abasi, ye mbon-ekɔŋ nnyin?

¹¹ Di, nyaŋa nnyin sio ke ukut: koro erinyaŋa eke owo anyaŋade edi ikpikpu.

¹² Nnyin iyeda Abasi inam uko: ndien enye eyedigi mme asua nnyin.