ŊWED MME PSALM 59 - Edisana ñwed Abasi Ibom

Ndibeŋe Abasi Edinyaŋa Nsio ke Ubɔk Mme Asua

Eke etubom mbon ikwɔ. Kusobo. Eke David. Michtam. Ke adaŋemi Saul ɔkɔdɔŋde eke-kpeme ufɔk esie, ete iwot enye.

¹ SIO mi mme asua mi ke ubɔk, O Abasi mi: menere mi nim ke enyɔŋ kan mmɔ eke enamde ikɔ ye ami.

² Sio mi mme anam-idiɔk ke ubɔk, nyuŋ nyaŋa mi sio ke ubɔk mbon afai.

³ Koro sese, mmɔ edibe eyom ukpɔŋ mi: mkpɔsɔŋ owo esop idem eyom mi; idige ndudue mi, inyuŋ idige idiɔk ido mi esin, O Jehovah.

⁴ Idiɔk ido iduhe, ndien mmɔ efeŋe eka eketim idem mmɔ.

⁵ Demere, disobo ye ami, nyuŋ se. Ndien afo, O Jehovah Abasi mme udim, Abasi Israel, demere, nyuŋ ka kese kpukpru mme idut: kutua baba owo mmɔ kiet emi enamde idiɔk ke abiaŋa mbɔm. [Selah.]

⁶ Mmɔ eyefiak edem ke mbubreyo; eyomo nte ebua, enyuŋ ekanare obio ekuk.

⁷ Sese, mmɔ ebehe ibehe ke inua mmɔ: ofut edu mmɔ ke mkpɔk-inua: ete, “Koro anie owo okop”?

⁸ Ndien afo, O Jehovah, eyekpa imam; afo eyesak kpukpru mme idut nsahi.

⁹ O Odudu mi, yak mbet fi: koro edi Abasi edi edikoŋ ebiet mi.

¹⁰ Abasi mi eyeda mbɔm esie osobo ye ami: Abasi eyenyuŋ anam mi nse mme asua mi.

¹¹ Kuwot mmɔ, mbak ikɔt mi edifre: da odudu fo nam mmɔ esaŋa ediyo; nyuŋ suhɔre mmɔ, O Ɔbɔŋ, otu-ekɔŋ nnyin.

¹² Ndudue inua mmɔ edi ikɔ mkpɔk-inua mmɔ: ndien eyeda mmɔ ke iseri mmɔ: ndien isuŋi ye nsu emi mmɔ esude, esin.

¹³ Sobo ke iyaresit, sobo, kunyuŋ uyak mmɔ edu aba: nyuŋ nam mmɔ efiɔk ete ke Abasi akara ke Jacob, tutu osim ke utit ererimbot. [Selah.]

¹⁴ Ndien yak mmɔ efiak ke mbubreyo; eyomo nte ebua, enyuŋ ekanare obio ekuk.

¹⁵ Mmɔ eyeyɔrɔ eyom udia; miyuhɔke, mmɔ eyedaŋ ke okoneyo.

¹⁶ Ndien ami nyekwɔ odudu fo; nnyuŋ ntoro ima fo ke usenubɔk: koro afo ekedide edikoŋ ebiet mi, ye ebiet ubɔhɔ mi ke usen nnanenyin mi.

¹⁷ O Odudu mi, nyekwɔ nnɔ fi; koro Abasi edide edikoŋ ebiet mi, ye Abasi ima mi.