ŊWED MME PSALM 58 - Edisana ñwed Abasi Ibom

Abasi Eyesio Idiɔk Owo Usiene

Eke etubom mbon ikwɔ. Kusobo. Eke David. Michtam.

¹ NTE mbufo edi imum ke akpan? Mbufo ekpetiŋ se inende, ekpenyuŋ ekpe edinen ikpe, O nditɔ owo!

² Ŋkɔm mbufo enam idiɔk ŋkpɔ ke esit; mbufo ke edomo udop ŋkanubɔk mbufo ke isɔŋ.

³ Mme idiɔk owo ewaha etɔŋɔde ke idibi: mmɔ edue enyuŋ esu nsu, toto ke ini mmɔ ekememana.

⁴ Mmɔ eyenyene ifɔt eke ebietde ifɔt uruk-ikɔt: kpa nte inan asabɔ esiride utɔŋ esie;

⁵ emi midikopke uyo mbon idiɔŋ, ye owo eke otimde ndiŋwaŋ unŋwaŋ.

⁶ O Abasi, nuak mmɔ edet ke inua: O Jehovah, bom akwa edet mkparawa lion.

⁷ Yak mmɔ etara nte mmɔŋ, yak mmɔ enyɔŋɔ ekemɔ: yak enye etiga idaŋ, kpa nte edide ikpom.

⁸ Yak enye adaha nte ekwɔŋ eke atarade: nte eyen eke ŋwan amande ukeŋ, mmɔ ikwe utin.

⁹ Ke ini mme eso mbufo mika-ikopke ifia, edide ndisi, onyuŋ edide ɔsɔbɔ, enye eyefime enye efep.

¹⁰ Edinen owo eyedara, koro enye okutde usiene: enye eyeyet ikpat esie ke iyip mme idiɔk owo.

¹¹ Ndien owo eyedɔhɔ, ete, Kakpan ndinen owo edia mfri: kakpan Abasi eke ekpede ikpe ke ererimbot, omodu.