ŊWED MME PSALM 57 - Edisana ñwed Abasi Ibom

Akam Ndibɔ Ufak Nto Abasi ke Ini Ukɔbɔ

Eke etubom mbon ikwɔ. Altash-heth. Eke David. Michtam: adaŋemi enye efehede ke iso Saul, ke aba itiat.

¹ TUA mi mbɔm, O Abasi, tua mi mbɔm, koro ukpɔŋ mi ɔbuɔtde idem ye afo: ami nnyuŋ mbuɔt idem ke mfut mba fo tutu mme idiɔk-ŋkpɔ emi efehe ebe.

² Nyeseme nnɔ Abasi Ata Edikoŋ; kpa Abasi emi anamde ŋkpɔ ɔnɔ mi ama.

³ Enye etie ke enyɔŋ ɔdɔŋ edinyaŋa mi; eduari owo eke oyomde ndimen mi. [Selah.] Abasi eyedɔŋ ima esie ye akpanikɔ esie utom.

⁴ Ukpɔŋ mi odu ke otu mme lion: nyena ke otu mmɔ eke esakde nte ikaŋ, kpa nditɔ owo emi edet mmɔ edide eduat ye idaŋ, ndien edeme mmɔ edi edisɔp ofut.

⁵ Menere idem fo ke enyɔŋ, O Abasi; yak ubɔŋ fo okoŋ akan ofuri isɔŋ.

⁶ Mmɔ ekɔbi iyire enɔ ikpat mi; owo onuk ukpɔŋ mi; mmɔ etibi obube enim mi ke iso, mmɔ ke idem mmɔ emeduɔŋɔ ke esit. [Selah.]

⁷ Esit mi ɔmɔwuhɔ, O Abasi, esit mi ɔmɔwuhɔ: nyekwɔ ikwɔ, myuŋ ntoro.

⁸ Ubɔŋ mi, demere; mbufo, psaltery ye harp, edemere: nyedemere usiere.

⁹ O Ɔbɔŋ, nyekɔm fi ke otu mbio-obio: nnyuŋ ŋkwɔ fi ke otu mme idut.

¹⁰ Koro ima fo omokpon tutu osim ke heaven, akpanikɔ fo onyuŋ osim ke ikpa-enyɔŋ.

¹¹ O Abasi, menere idem fo ke enyɔŋ: yak ubɔŋ fo akan ofuri isɔŋ.