ŊWED MME PSALM 56 - Edisana ñwed Abasi Ibom

Akam Mbuɔridem

Eke etubom mbon ikwɔ. Asaŋa ye Jonath-elem-rehokim. Eke David: Michtam: adaŋemi mme Philistine emumde enye ke Gath.

¹ O ABASI, tua mi mbɔm; koro owo oyomde ndimen mi: owo ekɔŋ efik mi ofuri usen.

² Mme asua mi eyom ndimen mi ofuri usen: koro mmɔ eke eŋwanade ekɔŋ ye ami ke iseri ewakde.

³ Ke usen eke ndik anamde mi, nyebuɔt idem mi ye afo.

⁴ Nyebure ke Abasi, kpa ke uyo esie; mmɔbuɔt idem mi ye Abasi: ndik idinamke mi: nso ke obukidem ekeme ndinam mi?

⁵ Mmɔ eyut ikɔ mi ofuri usen: kpukpru se mmɔ ekerede ebaŋa mi, emediɔk.

⁶ Mmɔ esop idem, edibe ebet; kpa mmɔ ekpeme ikpat mi, kpa nte mmɔ eke etiede eyom ukpɔŋ mi.

⁷ Mmɔ eda idiɔk ido ebɔhɔ; da iyaresit suhɔre mme idut, O Abasi.

⁸ Afo omobuk eriyo mi: da mmɔŋeyet mi sin ke ekpeme fo: nte mmɔ iduhe ke ŋwed fo?

⁹ Ndien mme asua mi eyefiak edem ke usen eke ndisemede: mmɔfiɔk emi, koro Abasi adade ye ami.

¹⁰ Nyebure ke Abasi, kpa ke uyo esie: nyebure ke Johovah, kpa ke uyo esie.

¹¹ Mmɔbuɔt idem mi ke Abasi: ndik idinamke mi. Nso ke owo ekeme ndinam mi?

¹² O Abasi, mme akaŋa fo edoro mi ke idem: nyenɔ fi ekɔm.

¹³ Koro afo okosiode ukpɔŋ mi ke mkpa: nte afo udunimke ukot mi okufiɔnɔre, man nsaŋa ke iso Abasi ke uŋwana uwem?