ŊWED MME PSALM 55 - Edisana ñwed Abasi Ibom

Idiɔk Ufan Ada Ufan Esie Okowot

Eke mme etubom mbon ikwɔ. Asaŋa ye ndido uruk. Maschil David.

¹ O ABASI, kpaŋ utɔŋ ke akam mi; ndien kudibe mkpe-ubɔk mi.

² Biɔŋ utɔŋ nɔ mi, nyuŋ yere mi: nyetat ekikere mi, nnyuŋ nyomo uyom;

³ mbaŋa uyo usua, mbaŋa ufik idiɔk owo: koro mmɔ edade idiɔk ido eduɔk mi ke idem, enyuŋ esuade mi ke iyaresit.

⁴ Esit mi amiaŋa mi ke idem: ndik mkpa onyuŋ ɔduɔ ofuk mi.

⁵ Ndik ye unyek-idem emeduk mi ke idem, nyomo-nsia onyuŋ ofuk mi.

⁶ Ndien ndɔhɔ nte, Ŋkpakam nyene mba nte ibiom! ŋkpefe ndaha ŋketie suŋ.

⁷ Sese, ŋkpefe ŋka anyan ebiet, ŋkpadaŋ ke wilderness. [Selah.]

⁸ Ŋkpawara mbɔhɔ usɔp ofum ye oyobio.

⁹ O Ɔbɔŋ, sosobo, bahare edeme mmɔ, koro ŋkutde afai ye utɔk ke obio.

¹⁰ Mmɔ ekanare enye ekuk ke ibibene esie, ke uwemeyo ye okoneyo: idiɔk ido ye ukut edu enye ke ufɔt.

¹¹ Ibak odu enye ke ufɔt: utuk ye abiaŋa idinyuŋ idahake ke aŋwa esie.

¹² Koro midige usua esuene mi: (ekpedi enye) ŋkpɔyɔ oro: inyuŋ idige owo utɔk mi emenere idem-esie ke enyɔŋ akan mi; (ekpedi enye) ŋkpodibe enye:

¹³ edi edi afo owo emi ekemde ye ami, nsaŋa mi, ye owo mbre mi,

¹⁴ emi nnyin inemede edinem nneme kiet ye kiet, nnyin ikam ika ke ufɔk Abasi ke udim mbre.

¹⁵ Nsobo ke odoro mmɔ ke idem; mmɔ eyesuhɔre ndisi ke obio ekpo; koro ibak odude ke iduŋ mmɔ, ye ke esit mmɔ.

¹⁶ Ekpedi ami, nyeseme ŋkot Abasi; ndien Jehovah eyenyaŋa mi.

¹⁷ Mbubreyo, ye usenubɔk, ye ufɔt uwemeyo, ke ndiseme nnyuŋ ntua: ndien enye eyekop uyo mi.

¹⁸ Enye ada emem afak ukpɔŋ mi osio ke ekɔŋ emi eyide ye ami: koro ediwak owo enamde ikɔ ye ami. Abasi eyekop, onyuŋ eyere mmɔ, enye emi etiede ke nsinsi. [Selah.]

¹⁹ (Eyeyere) mmɔ emi minyeneke erikpuhɔre itie, minyuŋ ibakke Abasi.

²⁰ Enye amada ubɔk esie odori mme ufan esie: amabiat ediomi esie.

²¹ Inua esie emem akan mmɔŋ-eba, edi ekɔŋ odu enye ke esit: ikɔ esie edɔbɔ ekan aran, edi mmɔ edi ofut afai.

²² Top mbiomo fo nɔ Jehovah, ndien enye eyekama fi: enye idiyakke edinen owo esehere ke nsinsi.

²³ Ndien afo, O Abasi, eyenam mmɔ esuhɔre ke obube mbiara: mbon afai ye eke abiaŋa ididuhe ibio uwem mmɔ; edi ami nyebuɔt idem mi ye afo.