ŊWED MME PSALM 54 - Edisana ñwed Abasi Ibom

Akam Ndibeŋe Abasi Ukpeme ke Ubɔk Mme Asua

Eke etubom mbon ikwɔ. Asaŋa ye ndido uruk. Mascil David; adaŋemi mbio-obio Ziph ekade eketiŋ enɔ Saul, ete, Nte David idibeke ke edem nnyin?

¹ O ABASI, da enyiŋ fo nyaŋa mi, nyuŋ da odudu fo kpe ikpe mi.

² O Abasi, kop mkpe-ubɔk mi; kpaŋ utɔŋ ke ikɔ inua mi.

³ Koro isen owo enamde ikɔ ye ami: mbon nsɔŋ-ido enyuŋ eyom ukpɔŋ mi: mmɔ inimke Abasi ke iso mmɔ. [Selah.]

⁴ Sese, Abasi edi andinyaŋa mi: Ɔbɔŋ mi odu ke otu mmɔ emi emumde ukpɔŋ mi ekama.

⁵ Idiɔk eyefiak osim mme asua mi: sibe mmɔ fep ke akpanikɔ fo.

⁶ Nyeda ŋkpɔ ima esit ŋwa nnɔ fi: nyetoro enyiŋ fo, O Jehovah; koro ɔfɔnde.

⁷ Koro enye amababare mi mbaba kpukpru: enyin mi omo-nyuŋ ese mme asua mi.