ŊWED MME PSALM 52 - Edisana ñwed Abasi Ibom

Ubierikpe Emi Anade Ɔnɔ Mbon Abiaŋa

Eke etubom mbon ikwɔ. Maschil David; adaŋemi Doeg eyen Edom odukde eke tiŋ ɔnɔ Saul, onyuŋ ɔdɔhɔ enye, ete, ke David ama aka ke ufɔk Ahi-melech.

¹ OWO uko, afo edinam didie obure mbure ke idiɔk? Ima Abasi odu ke ofuri usen.

² Edeme fo aduak ibak, ebiet akaraŋ eke ebande efere, ke anam abiaŋa.

³ Afo ama idiɔk akan eti; ama nsu akan ndidɔhɔ se inende. [Selah.]

⁴ Edeme nsu, afo ama kpukpru ikɔ nsobo.

⁵ Abasi eyenyuŋ osobo fi ke nsinsi, enye eyemen fi ɔnyɔŋ, onyuŋ afabare fi ke tent fo efep; onyuŋ odibere fi ke isɔŋ mme andidu uwem. [Selah.]

⁶ Ndien mbon eti ido eyese enyuŋ edikhe, enyuŋ ekpa enye imam: ete,

⁷ “Se owo emi minimke Abasi ke odudu esiemɔ: edi ɔbuɔt idem esie ke uwak inyene esie, onyuŋ ɔsɔŋɔ ke ibak esie.”

⁸ Edi ami mbiet awawa olive ke ufɔk Abasi; mmɔbuɔt idem mi ke ima Abasi ke nsinsi.

⁹ Nyekɔm fi ke nsinsi, koro afo akanamde [emi]; nyenyuŋ ndori enyin mi ke enyiŋ fo; koro ɔfɔnde, ke iso mbon-ima fo.