ŊWED MME PSALM 51 - Edisana ñwed Abasi Ibom

Akam Ndibeŋe Abasi Edidahado Nnɔ

Eke etubom mbon ikwɔ. Psalm David, ke ini Nathan prophet edide ke ɔtɔ esie, ke enye ama okokot Bath-sheba.

¹ O ABASI, tua mi mbɔm, nte ima fo edide: sɔhi ndudue mi fep ke ediwak mbɔm fo.

² Diɔŋ yet mme ukwaŋ-ŋkpɔ mi fep, nyuŋ sio mi mme idiɔk ido ke idem fep, nam ndi edisana.

³ Koro mmɔfiɔk ndudue mi: idiɔk ido mi onyuŋ odu mi ke iso kpu-kpru ini.

⁴ Mmedue fi, kpa fi ikpɔŋ, mmonyuŋ nnam idiɔk ke iso fo: man afo enen ke ikɔ fo, onyuŋ edi edisana ke ini afo ekpede ikpe.

⁵ Sese, ŋkamana ke ukwaŋ; eka mi okonyuŋ oyomo mi ke idiɔk.

⁶ Sese, afo amama akpanikɔ ke esit: afo eyenyuŋ anam mi mfiɔk ifiɔk ke ɔwɔŋ esit.

⁷ Afo eyeda hyssop osio idiɔk ido mi efep, ndien nyesana: eyeyet mi idem, ndien nyafia ŋkan snow.

⁸ Eyenam ŋkop inemesit ye idaresit; mme ɔkpɔ emi afo okobuŋde eyedara.

⁹ Fuk iso fo, kuse mme idiɔk ido mi; nyuŋ sɔhi kpukpru mme ukwaŋ-ŋkpɔ mi fep.

¹⁰ Bot edisana esit nɔ mi, O Abasi; nyuŋ nam obufa spirit eke ɔsɔŋɔde ada, sin mi ke idem.

¹¹ Kumen mi ke iso fo uduɔk; kunyuŋ ubɔ mi edisana spirit fo.

¹² Tɔŋɔ ntak nɔ mi idara erinyaŋa fo; nyuŋ da edinyime spirit mum mi kama.

¹³ Nyeteme mme edue-ibet usuŋ fo; mme idiɔk owo eyenyuŋ ekabare etiene fi.

¹⁴ Biomore mi iyip ke idem fep. O Abasi, Abasi erinyaŋa mi: edeme mi eyetaŋa edinen ido fo.

¹⁵ O Ɔbɔŋ, tat mi mkpɔk-inua; ndien inua mi eyetiŋ itoro fo.

¹⁶ Koro afo muyomke uwa emem; (okpoyom) ŋkpɔnɔ: unyuŋ umaŋa edifɔp uwa.

¹⁷ Mme uwa emem Abasi edi spirit eke ɔbuŋɔde: O Abasi, afo usinke edibuŋɔ ye edinuaha esit ke ndek.

¹⁸ Fɔn ido ye Zion ke ima fo: diɔŋ ibibene Jerusalem.

¹⁹ Ke ini oro mme uwa eti ido, ye edifɔp uwa eke efɔpde ofuri, eyenem fi esit: ke ini oro eyedori enaŋ ke itie-uwa fo.