ŊWED MME PSALM 50 - Edisana ñwed Abasi Ibom

Abasi Edi Ebiere Ikpe

Psalm Asaph.

¹ ABASI ibom, kpa Jehovah, ɔdɔhɔ, onyuŋ okot ererimbot ɔtɔŋɔde ke edem usiaha-utin tutu osim ke edem emi enye osopde.

² Abasi etie ke Zion emi eyede ama, ayama.

³ Abasi nnyin eyedi, idinyuŋ idopke uyo: ikaŋ eyebem enye iso ata, oyobio onyuŋ ofime ɔkpɔsɔŋ akan enye okuk.

⁴ Enye eyefiori okot heaven ke enyɔŋ, ye isɔŋ, ete ikpe ikpe ikɔt imɔ.

⁵ “Mbufo ebon ikɔt ima mi enɔ mi, kpa mmɔ eke ekedade uwa ediomi ediomi ye ami.”

⁶ Ndien enyɔŋ eyebuk edinen ido esie: koro edide Abasi edi ebierikpe. [Selah.]

⁷ Mbufo, ikɔt mi, ekop, ndien nyedɔhɔ ikɔ; O Israel, kop, ndien nyesua nnɔ fi.

⁸ Ami ndi Abasi, kpa Abasi fo. Idige mme uwa emem fo ke ntɔhɔ ye afo mbaŋa; ndifɔp uwa fo edu ke iso mi kpukpru ini.

⁹ Ndidaha enaŋ eke otode ke ufɔk fo; ndidaha okpo ke nna ufene fo.

¹⁰ Koro kpukpru mme unam akai edide okim, ye ufene ke tɔsin ikpɔ obot:

¹¹ se isaŋade ke ikɔt odu ye ami.

¹² Biɔŋ ama ɔkpɔdɔŋ mi, ŋkpɔdɔhɔke fi: koro ekondo ye se iyɔhɔde ke esit edide okim.

¹³ Nte ndita unam nyara enaŋ, mme ndiŋwɔŋ iyip okpo ebot?

¹⁴ Wa ekɔm nɔ Abasi;

¹⁵ nyuŋ sio mme akaŋa fo nɔ Ata Edikoŋ. Ndien seme nɔ mi ke usen ukut: nyebabare fi mbaba, ndien afo eyekpono mi.

¹⁶ Edi Abasi ɔdɔhɔ idiɔk owo, ete, Afo anam didie ataŋa mme ewuhɔ mi, onyuŋ emen ediomi mi esin ke inua fo?

¹⁷ Sia afo asua item, onyuŋ ɔduɔk ikɔ mi ke edem fo.

¹⁸ Ke ini afo okokutde mmɔ, afo onyime ɔnɔ enye, udeme fo onyuŋ odu ye mbon efibe.

¹⁹ Afo esin inua fo ke idiɔk, edeme fo onyuŋ obot nsu.

²⁰ Afo etie ɔdɔhɔ adian eyen-usɔ; etiŋ ikɔ-edem adian eyen-uka.

²¹ Ntem ke afo akanam, edi ami ndop uyo; afo ese ete ke mbebiet fi: edi nyetɔhɔ ye afo, nnyuŋ mmen (mme idiɔk ido fo) ndiɔŋ nnim ke iso fo.

²² O mbufo emi efrede Abasi, etim ese emi, mbak ndiwai mbufo mbak-mbak, ndien owo eke anyaŋade iduhe.

²³ Owo eke awade uwa ekɔm eyekpono mi: ama onyuŋ edi owo eke otimde ndinim ido, nyewut enye erinyaŋa eke Abasi anyaŋade.