ŊWED MME PSALM 5 - Edisana ñwed Abasi Ibom

Akam Ukpeme

Eke etubom mbon ikwɔ ke Nehi-loth. Psalm David.

¹ O JEHOVAH, kop ikɔ mi, tim fiɔk se ŋkerede. Kpaŋ utɔŋ ke uyo mfiori mi,

² O edidem mi, ye Abasi mi; koro mmɔŋ mkpe fi ubɔk.

³ O Jehovah, afo eyekop uyo mi ke usenubɔk; ke usenubɔk ke nditim mbɔŋ akam nnɔ fi, nnyuŋ ntie ŋkpeme.

⁴ Koro afo mudige Abasi eke idiɔk ido enemde fi; idiɔk ididuŋke ye afo.

⁵ Mbon iseri ididaha fi ke iso: afo asasua kpukpru mme anam idiɔk ido.

⁶ Afo eyesobo mme osu-nsu: Jehovah ese owo afai ye owo abiaŋa ke mbubiam ŋkpɔ.

⁷ Edi ama edi ami, nyeduk ke ufɔk fo ke uwak ima fo; nyeda uteŋe fo ntuak ibuot nse edisana temple fo.

⁸ O Jehovah, da mi usuŋ ke edinen ido fo, mbak mme asua mi; nam usuŋ fo eneŋere ana mi ke iso:

⁹ koro baba akpanikɔ miduhe enye ke inua; ɔwɔŋ esit mmɔ ɔmɔdiɔk eti; odudu itɔŋ mmɔ edi ana-iŋwaŋ udi; mmɔ eyaŋ ke edet.

¹⁰ Nam ikɔ obiomo mmɔ, O Abasi; nam uduak mmɔ esin mmɔ eduɔŋɔ: bin mmɔ fep ke uwak oburobut ido mmɔ: koro mmɔ esɔŋde ibuot ye afo.

¹¹ Ndien kpukpru mmɔ eke ebuɔtde idem ye afo eyedat esit: mmɔ eyedara ke nsinsi, afo eyenyuŋ ekpeme mmɔ: ndien mmɔ eke emade enyiŋ fo eyedara fi.

¹² Koro afo, Jehovah, eyediɔŋ owo edinen ido; eyeda mfɔnido nte otu-ekɔŋ akan enye okuk.