ŊWED MME PSALM 49 - Edisana ñwed Abasi Ibom

Owo Eke Ɔbuɔtde Idem ke Inyene Esie Edi Anana Ibuot Owo

Eke etubom mbon ikwɔ. Psalm eke nditɔ Korah.

¹ MBUFO kpukpru mme idut ekop ikɔ emi; kpukpru mme andiduŋ ererimbot,

² ekpaŋ utɔŋ: nditɔ ifin ye nditɔ owo ŋko, ye mbɔŋ ye mme ubuene.

³ Inua mi eyetiŋ ifiɔk; ekikere esit mi eyenyuŋ etiŋ ɔniɔŋ.

⁴ Nyekpaŋ utɔŋ mi ke ikwɔ: nyesiak ŋke mi ke harp.

⁵ Ŋkpedikhe didie ke idiɔk usen, ke ini idiɔk ido mmɔ eke edibede ebet mi, edikande mi okuk?

⁶ Mmɔ eke ebuɔtde idem mmɔ ke nsɔŋ mmɔ, enyuŋ eburede mbure ke akwa inyene mmɔ;

⁷ baba owo kiet ikemeke ndifak eyenete, inyuŋ ikemeke ndinɔ Abasi ŋkpɔ usio-isop esie:

⁸ (ndien ufak ibuot mmɔ ɔsɔŋ, onyuŋ etre ke nsinsi:)

⁹ man enye osuk odu uwem ke nsinsi, okunyuŋ okut mbiara.

¹⁰ Koro enye eyekut; mme ɔfiɔk-ŋkpɔ owo eyekpaŋa; mbon ndisime ye eke unana-ibuot eyetak ini kiet, enyuŋ ekpɔŋ inyene mmɔ enɔ owo efen.

¹¹ Mmɔ ekere ke esit mmɔ, ete ke ufɔk mmimɔ edibigi ke nsinsi ye iduŋ mmimɔ ke ofuri emana; mmɔ enyuŋ eda enyiŋ mmɔ esio iŋwaŋ mmɔ.

¹² Edi owo ibigike ke ukpono: enye ebiet mme unam, emi esobode.

¹³ Emi edi usuŋ mmɔ; ndisime anam mmɔ: ndien ubon mmɔ emi etienede mmɔ edem eyema uyo mmɔ. [Selah.]

¹⁴ Esin mmɔ ke udi nte otu erɔŋ; mkpa eyedia mmɔ; ndien ndinen owo eyekara mmɔ ke usenubɔk; udi eyenyuŋ enyene ndisio mmɔ ke iduŋ mmɔ nsobo mmɔ idem.

¹⁵ Edi Abasi eyefak ukpɔŋ mi osio udi ke ubɔk; koro enye eyebɔ mi onim. [Selah.]

¹⁶ Kudikhe koro owo akabarede edi owo inyene, koro ubɔŋ ufɔk esie ɔtɔtde.

¹⁷ Koro enye mididaha baba ŋkpɔ kiet ke mkpa esie; ubɔŋ esie idisuhɔkede itiene enye.

¹⁸ Koro enye eyediɔŋ ukpɔŋ esie ke uwem esie: ndien owo eyetoro fi, koro afo ɔfɔnde ido ye idem fo.

¹⁹ Enye eyesim emana mme ete esie; mmɔ idikwe uŋwana ke nsinsi.

²⁰ Owo eke enyenede ukpono, ndien mifiɔkke, ebiet mme unam, emi esobode.