ŊWED MME PSALM 48 - Edisana ñwed Abasi Ibom

Uyai ye Ubɔŋ Zion

Ikwɔ. Psalm eke nditɔ Korah.

¹ JEHOVAH omokpon, onyuŋ ɔfɔn nte etorode enye akamba ke obio Abasi nnyin, kpa ke edisana obot esie.

² Obot Zion edi ediye obot, ye idaresit ofuri isɔŋ, ke edem edere-edere, kpa obio akwa edidem.

³ Emefiɔk Abasi ke ikpɔ ufɔk esie, ete ke enye edi ebiet-ubɔhɔ.

⁴ Koro, sese, ndidem esop idem, mmɔ ebe eka ini kiet.

⁵ Mmɔ ekut, ntre mmɔ eyik; mmɔ edikhe, efeŋe ebe.

⁶ Unyek-idem omum mmɔ do, nte ubiak omumde ŋwan uman.

⁷ Afo eyeda ofum ikɔrabak obuŋ ubom Tarshish.

⁸ Kpa nte nnyin ikokopde, kpa ntre ke nnyin ikut ke obio Jehovah mme udim, ke obio Abasi nnyin: Abasi eyenim enye ke nsinsi. [Selah.]

⁹ O Abasi, nnyin ida ima fo idomo ke esit temple fo.

¹⁰ Kpa nte enyiŋ fo etiede, O Abasi, kpa ntre ke itoro fo etie tutu osim ke utit ererimbot: eti ido ɔmɔyɔhɔ fi ke ubɔk nnasia.

¹¹ Obot Zion eyedara, nditɔ-iban Judah eyebre mbre ebaŋa mme ikpe fo.

¹² Mbufo ekanare Zion, esaŋa ekan enye ekuk: ebat mme tower esie.

¹³ Esin esit mbufo ke ibibene esie, etim ekere ikpɔ ufɔk esie; man mbufo ekpebuk enɔ emana ke iso.

¹⁴ Koro Abasi emi edide Abasi nnyin ke nsinsi: enye eyeda nnyin usuŋ tutu osim ke mkpa.