ŊWED MME PSALM 47 - Edisana ñwed Abasi Ibom

Abasi Edi Edidem Ofuri Ererimbot

Etubom mbon ikwɔ. Psalm eke nditɔ Korah.

¹ MBUFO, kpukpru mme idut, ekwak ubɔk; esio mkpo idara enɔ Abasi.

² Koro Jehovah, Ata Edikoŋ, enyenede ndik: enye edi akwa edidem ke ofuri ererimbot.

³ Enye eyenam kpukpru owo emem isin enɔ nnyin, onyuŋ ada mme idut edak nnyin ke ikpat.

⁴ Enye eyemek udeme nnyin ɔnɔ nnyin, kpa ubɔŋ Jacob emi enye amade. [Selah.]

⁵ Abasi ɔmɔdɔk ke mkpo idara, Jehovah, ke uyom ukorowo.

⁶ Mbufo ekwɔ enɔ Abasi, ekwɔ; ekwɔ enɔ edidem nnyin, ekwɔ.

⁷ Koro Abasi edide edidem ke ofuri ererimbot; mbufo etim ekwɔ.

⁸ Abasi edi edidem mme idut: Abasi ɔmɔsuhɔre etie ke edisana ebekpo esie.

⁹ Mbɔŋ obio emesop idem, kpa ikɔt Abasi Abraham: koro mme otu-ekɔŋ ererimbot enyenede Abasi: enye okoŋ eti-eti.