ŊWED MME PSALM 45 - Edisana ñwed Abasi Ibom

Ikwɔ Ndɔ Edidem

Eke etubom mbon ikwɔ. Asaŋa ye mme lily. Eke nditɔ Korah. Maschil. Ikwɔ ima.

¹ ETI ikɔ ofofut mi ke esit: ami ntiŋ se ŋkanamde nnɔ edidem; edeme mi edi nteŋwed owo ekeɔsɔpde ubɔk ewet.

² Afo emeye akan nditɔ owo: emeŋwaŋa uyai esin fi ke mkpɔk-inua: mmɔdo Abasi ɔmɔdiɔŋ fi ke nsinsi.

³ Owo uko, bɔp ofut fo ke ifuhi fo, kpa ubɔŋ fo ye uyai fo.

⁴ Nyuŋ da uyai fo doro (ke chariot) ka kan, baŋa akpanikɔ, ye emem, ye eti ido; ndien ubɔk nnasia fo eyeteme fi ŋkpɔ ndik.

⁵ Idaŋ fo emesɔbɔ, mme idut eduɔŋɔ fi ke idak; (idaŋ fo) emeduk mme asua edidem ke esit.

⁶ O Abasi, ebekpo fo odu ke nsinsi: mmɔnyɔ edinen ido edi mmɔnyɔ ubɔŋ fo.

⁷ Afo ama se inende, onyuŋ asua se ikwaŋade; oro esin Abasi, kpa Abasi fo, ada aran idara eyet fi, akan mme ufan fo.

⁸ Kpukpru edisine-ŋkpɔ fo efuɔŋ myrrh, ye aloes, ye cassia, eke etode ke ufɔk nduk-enin eke mmɔ edatde fi esit.

⁹ Nditɔ-iban ndidem edu ke otu iban ima fo: ɔbɔŋ-aŋwan esine gold ophir ada fi ke ubɔk nnasia.

¹⁰ O eyen-aŋwan, kop, nyuŋ se, nyuŋ kpaŋ utɔŋ fo; nyuŋ fre oruk fo ye ufɔk usɔ;

¹¹ ndien yak edidem oyom uyai fo eti-eti: koro enye edide Ɔbɔŋ fo: tuak ibuot nɔ enye ndien.

¹² Ndien adiaha Tyre, kpa mbon-inyene ke otu mbio-obio, eyeda enɔ eyom iso fo.

¹³ Adiaha edidem edi ubɔŋ-ubɔŋ ke esit: eda gold edɔk edisine-ŋkpɔ esie.

¹⁴ Eyesine enye mbuaha ɔfɔŋidem eda esɔk edidem, eda nditɔ-iban, mme nsaŋa esie emi etienede enye ke edem, esɔk fi.

¹⁵ Eyeda mmɔ edi ke idara ye mbre: mmɔ eyeduk ke akwa ufɔk edidem.

¹⁶ Nditɔ-iren fo eyesuk mme usɔ ke ibuot; afo eyeda mmɔ onim ke mbɔŋ ke ofuri ererimbot.

¹⁷ Nyanam eti enyiŋ fo ke ofuri emana: mmɔdo mme idut eyekɔm fi ke nsinsi-nsinsi.