ŊWED MME PSALM 44 - Edisana ñwed Abasi Ibom

Mme Edinyaŋa Abasi ke Mme Usen Edem ye Mme Afanikɔŋ Emi Adade Owo ke Iso

Eke etubom mbon ikwɔ. Eke nditɔ Korah. Maschil.

¹ O ABASI, nnyin imokop ke utɔŋ nnyin, mme ete nnyin ekemen ŋkpɔ oro afo akanamde ke ini mmɔ, ke ini eset, etiŋ enɔ nnyin.

² Afo, kpa ubɔk fo, ekebin mme idut, ndien ada mmɔ (mme ete) ɔtɔ; afo akanuak mme obio oro edi anam mmɔ eken etɔt:

³ koro midige ofut mmɔ ke mmɔ eda ebɔ isɔŋ enyene, minyuŋ idige ubɔk mmɔ anyaŋa mmɔ: koro edide ita nnasia fo, ye ubɔk fo, ye uŋwana iso fo, koro afo amade mmɔ.

⁴ Edi afo edi enye, edidem mi, O Abasi: wuk ete enyaŋa Jacob.

⁵ Nnyin iyeda fi inuk mme asua nnyin iduɔk (ke isɔŋ): iyeda enyiŋ fo idigi mmɔ eke eŋwanade ye nnyin.

⁶ Koro midige utiga mi ke mbuɔt idem ke esit, ofut mi idinyuŋ inyaŋake mi.

⁷ Koro afo anyaŋade nnyin osio mme asua nnyin ke ubɔk, onyuŋ anamde mbon utɔk nnyin ekut but.

⁸ Nnyin ida Abasi itoro ofuri usen, iyenyuŋ ikɔm enyiŋ fo ke nsinsi. [Selah.]

⁹ Edi afo ɔmɔduɔk, onyuŋ esuene nnyin; udunyuŋ uwɔrɔke ye mbon-ekɔŋ nnyin.

¹⁰ Afo eyenam nnyin ikpa edem inɔ mme asua; ndien mbon utɔk nnyin ebume ke idem mmɔ.

¹¹ Afo onim nnyin nte erɔŋ eke etade; onyuŋ asuan nnyin ke otu mme idut.

¹² Afo anyam ikɔt fo ke ikpikpu, ndien uforoke ke ekɔm-urua mmɔ.

¹³ Onim nnyin ke ŋkpɔ nsahi mbɔhɔ-iduŋ nnyin, ye ke se mmɔ eke ekande nnyin ekuk, esuenede enyuŋ esakde.

¹⁴ Afo onim nnyin ke ufiet ke otu mme idut, ye se mme obio eyipde ibuot.

¹⁵ Esuene mi ana mi ke iso ke ofuri usen, but onyuŋ ofuk mi iso.

¹⁶ Oto ke uyo andisuene ye andisuŋi; oto ke usua ye osio-usiene.

¹⁷ Kpukpru ŋkpɔ emi emesim nnyin; edi nnyin ifreke fi, inyuŋ inamke abiaŋa ke ediomi fo.

¹⁸ Esit nnyin ifiakke edem, ikpat nnyin inyuŋ iwahake ikpɔŋ usuŋ fo;

¹⁹ eke ekpesinde fi anuak nnyin ke ebiet mme idiɔk unam, onyuŋ ofuk nnyin ke mfut mkpa.

²⁰ Edieke nnyin ifrede enyiŋ Abasi nnyin, inyuŋ inyande eka-ubɔk nnyin inɔ esen abasi;

²¹ nte Abasi ididuŋɔke emi? koro enye ɔfiɔkde ndibeŋkpɔ esit owo.

²² Koro ekewotde nnyin ke ofuri usen ebaŋa fi; ekebat nnyin ke erɔŋ mkpa.

²³ O Ɔbɔŋ, men idem, nsinam afo edede idap? Demere, kuduɔk nnyin ke nsinsi.

²⁴ Nsinam afo odipde iso fo, onyuŋ efrede ukut nnyin ye ufik nnyin?

²⁵ Koro ukpɔŋ nnyin ɔtuhɔde ke ntan: idibi nnyin adiana ke isɔŋ.

²⁶ Daha ke enyɔŋ di nyaŋa nnyin, nyuŋ fak nnyin baŋa ima fo.