ŊWED MME PSALM 42 - Edisana ñwed Abasi Ibom

Ndiyom Abasi ke Ofuri Ukpɔŋ

Eke etubom mbon ikwɔ. Maschil eke nditɔ Korah.

¹ KPA nte ebet eŋwekde oyom idim mmɔŋ, kpa ntre ke ukpɔŋ mi eŋwek eyom fi, O Abasi.

² Itɔŋ Abasi, kpa eke Abasi uwem, amasat mi ukpɔŋ; ke ini ewe ke ndikeme ndika ŋkowut Abasi idem mi?

³ Mmɔŋeyet mi edi udia mi ke uwemeyo ye ke okoneyo, ke mmɔ esuk edɔhɔde mi, ke ofuri usen, ete, Enye Abasi fo?

⁴ Nyeti ŋkpɔ emi, nnyuŋ ŋŋwaŋa ukpɔŋ mi ke idem mi, ke ini ndisaŋade ke akwa otu owo, ntiene mmɔ ŋka ke ufɔk Abasi, ke mkpo idara ye ekɔm, ke otu akwa udim eke enimde ederi.

⁵ Ukpɔŋ mi, nsinam afo ɔfuhɔde, onyuŋ etimerede mi ke idem? Dori enyin ye Abasi; koro nyesuk ŋkɔm enye ke erinyaŋa iso esie.

⁶ O Abasi mi, ukpɔŋ mi ɔfuhɔ mi ke idem: mmɔdo ntiede ke isɔŋ Jordan ye eke mme Hermon, ye eke ekpri obot Mizar, nti fi.

⁷ Udem ofiori okot udem ke uyom uda-mmɔŋ fo; ofuri odut fo ye aya efuk mi.

⁸ Jehovah owuk ima esie ke uwemeyo, ikwɔ esie onyuŋ odu ye ami ke okoneyo, nnyuŋ ŋkpe Abasi uwem mi ubɔk.

⁹ Nyedɔhɔ Abasi, edikoŋ itiat mi, nte, “Nsinam afo efrede mi Nnam didie nsaŋa ntua mbaŋa ufik usua?”

¹⁰ Nte ŋkpɔ eke enuakde mi ɔkpɔ, kpa ntre ke mme asua mi esuene mi: ke mmɔ edɔhɔde mi ofuri usen, ete, Enye Abasi fo?

¹¹ O ukpɔŋ mi, nsinam afo ɔfuhɔde? Nsinyuŋ inam afo etimerede mi ke idem? Dori enyin ye Abasi: koro nyesuk ntoro enye, kpa erinyaŋa iso mi, ye Abasi mi.